Santiago de Compostela, 5 de xuño de 2026

O Diario Oficial de Galicia (DOG) publica, na súa edición de hoxe, a relación provisional coa orde de prelación e a puntuación obtidas polas persoas aspirantes admitidas no proceso de elaboración das listas de selección temporal de 11 categorías.

En concreto, as especialidades son: enfermeiro especialista en saúde mental, enfermeiro especialista en enfermaría do traballo, enfermeiro especialista en familiar e comunitaria, enfermeiro especialista en obstétrico-xinecolóxica (matrón), enfermeiro especialista en pediátrica, médico de familia, médico de urxencias hospitalarias, médico coordinador do 061, médico asistencial do 061, pediatra de atención primaria e técnico de saúde de atención primaria.

Resultaron admitidos 4.056 aspirantes: 101 en enfermeiro especialista de saúde mental; 122 en enfermeiro especialista en enfermaría do traballo; 808 en enfermeiro especialista en familiar e comunitaria; 527 en enfermeiro especialista en obstétrico-xinecolóxica (matrón); 188 en enfermeiro especialista en pediátrica; 971 en médico de familia; 604 en médico de urxencias hospitalarias; 131 en médico coordinador do 061; 219 en médico asistencial do 061; 127 en pediatra de atención primaria e 258 en técnico de saúde de atención primaria.

As listas atópanse publicadas, á disposición das persoas interesadas, na páxina web do Servizo Galego de Saúde, no apartado Emprego Público-Listaxes de persoal estatutario. Ademais, o estado de cada solicitude pode ser consultado polo aspirante no seu expediente electrónico persoal en Fides/expedient-e/sección de procesos.

Próxima publicación de listas

Proximamente publicaranse as listas provisionais das categorías de celador (quenda xeral e quenda de discapacidade intelectual), técnico en farmacia, técnico superior en anatomía patolóxica e citoloxía, técnico superior en dietética, técnico superior en documentación sanitaria, técnico superior en hixiene bucodental, técnico superior en imaxe para o diagnóstico, técnico superior en laboratorio de diagnóstico clínico, técnico superior en radioterapia, auxiliar administrativo, persoal de servizos xerais, cociñeiro e pinche.