Santiago de Compostela, 10 de xuño de 2026

A Consellería de Sanidade acolleu esta mañá unha nova xuntanza da Mesa Sectorial na que o departamento sanitario da Xunta presentou ás organizacións sindicais o documento do grupo de traballo de axendas constituído para avanzar na reforma da Atención Primaria co fin acadar un modelo máis proactivo e resolutivo deste nivel asistencial.

Na xuntanza informouse das conclusións dun dos dous grupos de traballo constituídos, concretamente, o de Planificación asistencial e reforma organizativa da atención primaria, centrado en axendas e na organización da actividade nos centros de saúde.

Así, a Consellería de Sanidade propón un modelo de axendas de calidade, con tempos mínimos de consulta; a redución de tarefas administrativas ineficientes dos médicos mediante a potenciación das áreas administrativas; a estandarización e optimización de procedementos non propiamente asistenciais; o impulso do traballo en equipo; e a potenciación da nova Unidade técnica de apoio á Atención Primaria.

Tamén se porán en marcha novos modelos de gobernanza, onde se potenciará a figura dos Xefes de Servizo de atención primaria.

Ademais realizarase un seguimento continuo da atención sanitaria prestada, avaliando constantemente a capacidade de resposta dos distintos servizos sanitarios.

No encontro cos representantes sindicais desta mañá explicouse que a reforma da atención primaria que impulsa a Xunta se basea en tres eixes fundamentais: cambios estruturais, reorganización asistencial e sustentabilidade retributiva.

O documento completo de reforma da atención primaria será presentado polo miúdo en vindeiras datas, unha vez se dispoñan das conclusións do outro grupo de traballo creado, centrado nos recursos humanos e no modelo retributivo.

De feito, neste mes de xuño está previsto celebrar outra Mesa Sectorial de Sanidade para presentar as conclusións do segundo grupo de traballo, de Planificación Asistencial e Retribucións.

Co fin de potenciar e outorgar un maior protagonismo a este nivel asistencial a Xunta avanza na nova estrutura do Servizo Galego de Saúde, coa creación da Dirección Xeral de Atención Primaria e Comunitaria, e tamén co reforzo da atención primaria na estrutura das diferentes áreas sanitarias

O obxectivo da folla de ruta que está a impulsar a Consellería de Sanidade consolidará un novo modelo de atención primaria máis accesible, máis próximo e multiprofesional, garantindo a protección dos tempos clínicos e orientado a acadar resultados en saúde, fundamentándose en indicadores que permitan a rastrexabilidade dos obxectivos fixados.