O seguimento na quenda de tarde da folga médica contra o Estatuto Marco do Goberno central acada o 1,68 % na sanidade pública galega
Nos servizos de atención hospitalaria o seguimento da folga é do 2,13 %
No que atinxe á atención primaria, o seguimento da folga en rexeitamento do borrador presentado polo Ministerio de Sanidade acada o 1,26 %
Santiago de Compostela, 16 de xuño de 2026
O seguimento da folga de médicos a nivel nacional convocada contra o Estatuto Marco promovido polo Goberno central na quenda de tarde deste martes foi do 1,68 % nos centros sanitarios da comunidade.
A porcentaxe de participación nos sete grandes hospitais do Servizo Galego de Saúde, na quenda de tarde, acadou o 2,57 %. En canto aos hospitais comarcais, a folga non contou con seguimento de tarde. Así, no conxunto dos servizos de atención hospitalaria a porcentaxe de seguimento da folga na xornada de tarde foi do 2,13 %.
No que respecta á atención primaria, o seguimento da folga en rexeitamento do borrador presentado polo Ministerio de Sanidade acadou o 1,26 % de participación.
No conxunto dos dous niveis asistencias a folga tivo un seguimento do 1,73 %.
Por centros hospitalarios, o paro foi secundado polo 1,75 % no caso do Complexo Hospitalario Universitario da Coruña; do 1,05 % no Complexo Hospitalario Universitario de Santiago de Compostela; o 2,70 % no Hospital Universitario Lucus Augusti; o 6,67 % no Complexo Hospitalario Universitario de Ourense; e o 5,88 % no Complexo Hospitalario Universitario de Pontevedra. No caso do Complexo Hospitalario Universitario de Ferrol e do Complexo Hospitalario Universitario de Vigo, a folga non contou con seguimento na quenda de tarde.
En canto ao seguimento en atención primaria durante a quenda de tarde, por áreas sanitarias, foi o seguinte: na de Santiago de Compostela e Barbanza, do 0,88 %; na de Ourense, Verín e O Barco de Valdeorras, 1,32 %; na de Pontevedra e O Salnés, 1,96 %; e na área sanitaria de Vigo, do 3,70 %. Nas áreas sanitarias da Coruña e Cee; de Ferrol; e na de Lugo, A Mariña e Monforte de Lemos, a folga non tivo seguimento no primeiro nivel asistencial nesta quenda.
No caso das entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Urxencias Sanitarias de Galicia-061, a folga non contou con seguimento.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
