O seguimento na quenda de tarde da folga médica contra o Estatuto Marco do Goberno central acada o 1,71 % na sanidade pública galega
Nos servizos de atención hospitalaria o seguimento da folga é do 2,04 %
No que atinxe á atención primaria, o seguimento da folga en rexeitamento do borrador presentado polo Ministerio de Sanidade acada o 1,44 %
Santiago de Compostela, 17 de xuño de 2026
O seguimento da folga de médicos a nivel nacional convocada contra o Estatuto Marco promovido polo Goberno central na quenda de tarde deste mércores foi do 1,71 % nos centros sanitarios da comunidade.
A porcentaxe de participación nos sete grandes hospitais do Servizo Galego de Saúde, na quenda de tarde, acadou o 2,45 %. En canto aos hospitais comarcais, a folga non contou con seguimento de tarde. Así, no conxunto dos servizos de atención hospitalaria a porcentaxe de seguimento da folga na xornada de tarde foi do 2,04 %.
No que respecta á atención primaria, o seguimento da folga en rexeitamento do borrador presentado polo Ministerio de Sanidade acadou o 1,44 % de participación.
No conxunto dos dous niveis asistencias a folga tivo un seguimento do 1,76 %.
Por centros hospitalarios, o paro foi secundado polo 0,88 % no caso do Complexo Hospitalario Universitario da Coruña; o 2,70 % no Hospital Universitario Lucus Augusti; o 7 % no Complexo Hospitalario Universitario de Ourense; o 6,15 % no Complexo Hospitalario Universitario de Pontevedra e o 0,96 % no Complexo Hospitalario Universitario de Vigo. No caso do Complexo Hospitalario Universitario de Ferrol e no do Complexo Hospitalario Universitario de Santiago de Compostela a folga non contou con seguimento na quenda de tarde.
En canto ao seguimento en atención primaria durante a quenda de tarde, por áreas sanitarias, foi o seguinte: na área sanitaria da Coruña e Cee, do 1,18 %; na de Lugo, A Mariña e Monforte de Lemos, do 1,92 %; na de Ourense, Verín e O Barco de Valdeorras, do 1,45 %; na de Pontevedra e O Salnés, 1,96 %; e na área sanitaria de Vigo, do 2,94 %. Nas áreas sanitarias de Santiago de Compostela e Barbanza, e na de Ferrol, a folga non tivo seguimento no primeiro nivel asistencial nesta quenda.
No caso das entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Urxencias Sanitarias de Galicia-061, a folga non contou con seguimento.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
