Santiago de Compostela, 25 de xuño de 2026

O conselleiro de Sanidade, Antonio Gómez Caamaño reivindicou hoxe, na asemblea do Clúster Saúde de Galicia, a fortaleza da comunidade como un dos territorios con maior proxección de futuro en innovación sanitaria.

O titular da carteira sanitaria interveu esta mañá na inauguración da asemblea xeral extraordinaria desta entidade, na que se fixo balance do último exercicio e se fixaron os retos futuros que afronta o sector da saúde.

O conselleiro puxo en valor a vitalidade da innovación sanitaria na nosa comunidade, onde están a desenvolverse na actualidade proxectos públicos de enorme relevancia, entre os que citou o Xenoma Galicia, o futuro Centro de Protonterapia, o Centro de Fabricación de Terapias Avanzadas, o Rexistro galego de persoas centenarias ou o Centro de Ciberseguridade de Galicia.

Galicia, polo de referencia

Segundo Gómez Caamaño, a confluencia entre o compromiso da administración, o talento dos profesionais e o pulo empresarial, converten Galicia nun polo de referencia en innovación sanitaria.

Como mostra de proxección de futuro, o conselleiro citou a presentación, no día de hoxe da Business Factory Health & Care, unha nova aceleradora especializada orientada a impulsar startups e pymes do sector saúde, impulsada polo Clúster en colaboración do Igape, que conta con 1,8 millóns de euros para o bienio 2026-2028.

Gómez Caamaño subliñou que ao longo dos últimos 15 anos o Clúster da Saúde de Galicia se consolidou como unha plataforma de grande utilidade para articular un ecosistema que integra empresas, universidades, centros tecnolóxicos, entidades sociais, organismos públicos e profesionais para transformar coñecemento en innovación, co obxectivo de oportunidades e benestar para a comunidade.

Nesta asemblea, na que tamén se renovará a xunta directiva do Clúster para os vindeiros anos, o conselleiro destacou a actual carteira de proxectos da entidade, que supera os 2,5 millóns de euros.

O conselleiro rematou a súa intervención felicitando o equipo que levou as rendas do Clúster de Saúde de Galicia no último lustro, con Rocío Mosquera á fronte.