Cee (A Coruña), 1 de xullo de 2026

O xerente do Servizo Galego de Saúde, Luis León Mateos, visitou este mércores o Hospital Público Virxe da Xunqueira de Cee para coñecer de primeira man a situación do centro e planificar as futuras necesidades asistenciais.

Durante a visita, na que estivo acompañado polo xerente da área sanitaria da Coruña e Cee, Luis Verde, pola directora de distrito, Carmen Otero, e a pola subdirectora de Enfermería, María Lema, tivo a oportunidade de coñecer o funcionamento do novo hospital de día oncolóxico que recentemente se puxo en marcha no Hospital Virxe da Xunqueira.

Así mesmo, puido supervisar o funcionamento das urxencias, que dispoñen dunhas instalacións completamente renovadas desde o ano 2024.

O xerente do Servizo Galego de Saúde avanza así na súa rolda de visitas aos hospitais comarcais, que xa o levou da aos centros de Monforte de Lemos e do Salnés.

A Xunta  está a realizar un grande esforzo pola potenciación dos hospitais comarcais, consolidando as melloras continuas orientadas a incrementar a súa capacidade asistencial e optimizar a xestión global dos recursos públicos.

As xuntanzas cos responsables da xestión sanitaria dos distritos serven para abordar as diversas realidades e horizontes dos centros, tanto no eido organizativo coma no estrutural e tecnolóxico.