Santiago de Compostela, 3 de xullo de 2026

O Portal de Contratos Públicos de Galicia publica, na súa edición de hoxe, a licitación, por  un importe de 192.874 euros, da compra de equipamento electromédico para o novo Centro de Protonterapia de Galicia.

O procedemento responde á necesidade de adquirir un manequín de densidades electrónicas e multienerxía e un fantoma de auga 3D. Este último é un modelo físico ou simulador deseñado para imitar as propiedades e características do corpo humano.

Este equipamento ten por finalidade contribuír á calibración dos equipos da nova infraestrutura e para garantir a seguridade no tratamento aos pacientes.

As empresas interesadas neste contrato teñen de prazo ata o 20 de xullo para presentar as súas ofertas.

Actualmente, o proceso encamiñado á posta en servizo do Centro de Protonterapia de Galicia avanza segundo o previsto. Así, as obras de edificación xa están concluídas e a Xunta segue a traballar na calibración do seu equipamento e na formación do persoal necesario.

O persoal da empresa tecnolóxica responsable da fabricación, instalación e calibrado do equipo Proteus ONE atópase testando os sistemas clave para o funcionamento do centro, como é o caso do ciclotrón (xerador do feixe de protóns), do gantry (o sistema que dirixe o feixe de radiación), ou do brazo robotizado de posicionamento.

Durante o verán realizaranse quendas de traballo de 24 de horas para acadar os prazos establecidos no cronograma, estando fixada a súa entrega para finais do mes de outubro.

Unha vez que teña lugar a  aceptación formal das instalacións, a principios de novembro comezará a fase de “comisionado clínico”, de suma importancia xa que se realizará a calibración final dos equipos, previa ao uso médico, e que vai posibilitar comezar a tratar aos primeiros pacientes entre finais deste ano e principios do próximo 2027.

Galicia será a primeira comunidade autónoma en ofrecer tratamento con protonterapia na sanidade pública. A nova infraestrutura sanitaria será un referente a nivel estatal e atenderá tamén a pacientes procedentes de Castela e León, Asturias e do norte de Portugal, cunha capacidade estimada de 250 persoas ao ano.

O centro estará especialmente enfocado a pacientes oncolóxicos con alta expectativa de supervivencia, prestando atención destacada á poboación infantil.

O investimento total do Centro de Protonterapia de Galicia supera os 60 millóns de euros entre a edificación e o equipamento. Nese orzamento están recollidos os 28 millóns de euros achegados pola Fundación Amancio Ortega á sanidade pública galega no marco do acordo para o impulso da protonterapia en España. As obras do edificio, impulsadas polo Goberno galego, están cofinanciadas con fondos europeos do programa Feder de Galicia 2021-2027.