Así o indicou o director xeral de Integración e Innovación Asistencial do Servizo Galego de Saúde, Alfredo Silva, no marco da Comisión 5ª do Parlamento de Galicia
O Servizo Galego de Saúde destaca que menos de 700 pacientes, dos preto de 8.000 que solicitaron cambio de Povisa ao Hospital Público Álvaro Cunqueiro, tiñan asistencia sanitaria pendente
Ademais, o 90 % procesos pendentes de atención son de baixa complexidade
A Xunta garante que o Hospital Público Álvaro Cunqueiro está capacitado para atender a poboación da área sanitaria, xa que reforzou o seu cadro de persoal con 40 profesionais e prevé a ampliación das urxencias
Nos últimos cinco anos, o Complexo Hospitalario Universitario de Vigo absorbeu máis de 12.600 pacientes, o que supuxo preto de 66.000 consultas médicas, máis de 30.000 consultas doutras especialidades e máis de 17.600 probas
O Hospital Povisa rebaixou a lista de espera en 5,5 días menos de media a decembro de 2025, con respecto ao ano anterior
Santiago de Compostela, 9 de xullo de 2026
O director xeral de Integración e Innovación Asistencial do Servizo Galego de Saúde, Alfredo Silva, subliñou que menos de 700 pacientes dos preto de 8.000 que solicitaron cambio de atención especializada do Hospital Povisa ao Hospital Público Álvaro Cunqueiro tiñan asistencia pendente no momento do cambio.
No marco da Comisión 5ª de Sanidade, Política Social e Emprego, o director xeral engadiu que o 90 % dos casos deses pacientes pendentes son procesos de baixa complexidade.
Polo tanto, Alfredo Silva transmitiu que a Xunta pode garantir que o Hospital Público Álvaro Cunqueiro está capacitado para atender a poboación da área sanitaria garantindo a calidade asistencial.
Xustificou esta capacidade no reforzo dos recursos humanos que realizou o Servizo Galego de Saúde na área sanitaria de Vigo coa contratación de 40 profesionais de diferentes categorías e especialidades médicas, entre eles, neurocirurxiáns, especialistas en cardioloxía, fisioterapeutas, terapeuta ocupacional, profesionais de logopedia, especialistas en neuroloxía, oncoloxía médica, hematoloxía e farmacia hospitalaria, ademais de profesionais de enfermaría, técnicos en coidados auxiliares de enfermaría e celadores.
Como mostra, o director xeral de Integración e Innovación Asistencial do Sergas indicou que o Complexo Hospitalario Universitario de Vigo xa absorbeu, ao longo dos últimos cinco anos, 12.611 pacientes procedentes do Hospital Povisa. Isto supuxo preto de 66.000 consultas médicas, 30.293 consultas doutro tipo —entre elas enfermería, interconsultas e psicoloxía—, 17.622 probas diagnósticas e terapéuticas e 2.873 entradas na lista de espera cirúrxica.
Xunto con isto, avanzou que proximamente está previsto licitar as obras de ampliación das urxencias do Hospital Público Álvaro Cunqueiro.
Alfredo Silva lembrou que, no Hospital Povisa, o tempo medio de espera a decembro de 2025 se situou 5,5 días por debaixo do rexistrado no mesmo período de 2024.
Deste xeito, o Servizo Galego de Saúde mantén a calidade asistencial a toda a poboación da área sanitaria de Vigo con independencia do centro hospitalario de referencia que poida escoller libremente.
Imaxes relacionadas
