O Grove (Pontevedra), 11 de xullo de 2026

A Xunta de Galicia está a executar un total de 20 obras en centros escolares da comarca do Salnés cun investimento global de máis de 8,8 M€. Así o destacou esta mañá o conselleiro de Educación, Ciencia, Universidades e FP, Román Rodríguez, durante unha visita á ampliación do Colexio Rosalía de Castro no Grove, unha das actuacións de gran envergadura que o Goberno autonómico ten actualmente en marcha na zona dentro do Plan de nova arquitectura pedagóxica.

O titular de Educación subliñou que a Xunta está realizando no Salnés sete intervencións de gran envergadura, cun investimento superior aos 8,3 millóns de euros. Entre elas destacan a ampliación do Centro Integrado de FP Fontecarmoa, en Vilagarcía de Arousa, cun orzamento de máis de 3,7 millóns de euros, e a rehabilitación integral do Centro Público Integrado de Cuntis, con preto de 2 millóns de euros de investimento. “Seguimos avanzando non só na reforma e modernización dos máis de 1.600 edificios educativos de Galicia, senón tamén na creación de novos espazos que respondan ás necesidades presentes e futuras da comunidade educativa”, sinalou o conselleiro.

A maiores destas actuacións, a Xunta aproveita o período estival para desenvolver 13 obras de pequena e mediana envergadura na zona, cun investimento de máis de 500.000€ a través do Plan Ben_Estar 2026. Trátase de mellorar o benestar, a accesibilidade, a conservación e o mantemento dos centros con intervencións como renovación de baños, a reparación de cubertas, a mellora de peches e muros ou posta a punto das instalacións. No caso do Grove, este verán están a executarse obras no Colexio As Bizocas, no Plurilingüe Conmeniño e no IES Monte da Vila, cun investimento superior aos 125.000€.

Ampliación do Colexio Rosalía de Castro

Durante a súa visita ao CEIP Rosalía de Castro, o representante do Executivo galego comprobou o avance das obras de ampliación do centro, onde xa estivo meses atrás, unha actuación que xa supera o 40% de execución e que se prevé rematar antes de finalizar o ano. O conselleiro destacou que esta intervención suporá unha “mellora moi importante” para a comunidade educativa, ao dotar o colexio de instalacións máis amplas, modernas, accesibles e adaptadas ás necesidades do alumnado.

A obra contempla a construción dun novo edificio de dúas plantas no lugar das antigas vivendas de mestres, onde se habilitarán un comedor de maior capacidade e un ximnasio, ademais de vestiarios, almacéns e outros espazos de servizo. O inmoble, de case 1.000 m², incorporase con criterios de eficiencia enerxética e sustentabilidade, incluíndo unha nova caldeira de biomasa e melloras na accesibilidade con novas ramplas de acceso.