A Lama (Pontevedra), 22 de xullo de 2026

O delegado territorial da Xunta en Pontevedra, Pablo Fernández, visitou esta mañá as instalacións da Asociación Centro Cultural de Veciños do Pelete e da Asociación de Veciños de Laxedo, no concello da Lama, beneficiarias das axudas da Xunta destinadas á mellora das infraestruturas das entidades veciñais.

Ao abeiro desta convocatoria, a Asociación Centro Cultural de Veciños do Pelete recibiu unha achega de 12.000 euros para o acondicionamento da cuberta da Casa do Pobo do Pelete, unha contía similar á recibida pola Asociación de Veciños de Laxedo  para a adecuación da aula da Casa do Pobo de Borela.

Estas axudas, xestionadas pola Dirección Xeral de Administración Local, teñen como obxectivo contribuír á conservación, mellora e modernización dos locais sociais, favorecendo que as entidades veciñais dispoñan de espazos adecuados para desenvolver as súas actividades e prestar servizo á veciñanza.

Cabe destacar que estas subvencións chegaron a un total de preto de 160 entidades da provincia de Pontevedra, cun investimento global superior aos 1,7 millóns de euros, entre a liña destinada á execución de obras e a orientada á adquisición de equipamento e material.

Durante a visita, o delegado territorial agradeceu o labor que desenvolven as asociacións veciñais e destacou que "o seu traballo resulta fundamental para manter vivos os nosos pobos, fortalecer a convivencia e dinamizar a vida social e cultural do rural". Neste sentido, lembrou que a Xunta continuará apoiando este tipo de entidades, "que son un piar esencial para fixar poboación e mellorar a calidade de vida da veciñanza".