Narón (A Coruña), 30 de xullo de 2026

A Xunta apoia este ano con preto de 105.000 euros a actividade de 98 clubs e asociacións deportivas das comarcas de Ferrolterra, Eume e Ortegal. A delegada territorial da Xunta en Ferrol, Martina Aneiros, deu conta desta resolución das axudas para o desenvolvemento de actividades deportivas durante unha visita ao club de baile deportivo Un Paso Adelante (UPA), unha das entidades beneficiarias desta orde da Secretaría Xeral para o Deporte.

Alí, Aneiros puido descubrir a actividade do club da man da súa directora, Sandra García, e das mozas que conforman o grupo Revolution UPA, campión do mundo de danza coreográfica en categoría Youth en 2024 e 2025. A delegada puxo en valor o seu traballo polo deporte e o benestar, “sendo ademais escaparate cos vosos logros do que é Galicia Calidade tamén no ámbito da danza”, puntualizou, desexando ao equipo a renovación do seu título internacional.

Esta convocatoria de axudas está dirixida a clubs deportivos, sociedades anónimas deportivas, seccións deportivas e Núcleos de Adestramento Deportivo Especializado (NADE) xestionados por algunha das entidades anteriores. Estes deberán estar inscritos, en todos os casos, no Rexistro de Entidades Deportivas de Galicia para o desenvolvemento de actividades deportivas.

A convocatoria contou cun orzamento de 2 M€ que permitirá apoiar a máis de 1.420 entidades de toda Galicia. Entre os gastos subvencionables inclúense licenzas, seguros deportivos, inscricións en competicións, arbitraxes, adestradores/as, desprazamentos, manutención e aloxamento, material deportivo non inventariable, produtos de farmacia, aluguer de instalacións, persoal e servizos de profesionais de apoio ao rendemento.

Así mesmo, como xa se esixiu na convocatoria do ano pasado no marco do compromiso de loita contra a violencia, requírese a todas as entidades solicitantes que teñan aprobado o ‘Protocolo de protección dos nenos, nenas e adolescentes fronte a violencia no deporte’, así como que teñan designada á persoa delegada de protección e correctamente inscrita no Rexistro de Entidades Deportivas de Galicia.