O Vicedo (Lugo), 18 de agosto de 2026

A directora xeral de Desenvolvemento Pesqueiro, Ángeles V. Suárez, visitou as instalacións do criadoiro de semente de moluscos bivalvos do Vicedo. Durante o percorrido polas instalacións, a representante autonómica subliñou o firme compromiso do Goberno galego por garantir o abastecemento e subministro continuo de cría ao sector marisqueiro, unha peza angular para acelerar a rexeneración e a produtividade dos bancos marisqueiros galegos tras as incidencias climáticas.

A infraestrutura, que conta coa dirección e o soporte científico do equipo profesional do Centro de Investigacións Mariñas (CIMA) de Ribadeo, permite reforzar a capacidade técnica e produtiva de semente de bivalvos en Galicia, achegando solucións directas ás necesidades dos profesionais do mar.

A actividade do criadoiro do Vicedo enmárcase no proxecto Partbiv, unha iniciativa desenvolvida dentro da rede Redemar que une a administración, a comunidade científica e o sector produtivo. Liderado polo CIMA e o Instituto Galego de Formación en Acuicultura (IGAFA), coa colaboración da Federación Provincial de Confrarías de Pescadores de Lugo, o plan conta cun investimento superior aos 700.000 euros cofinanciados polo Fondo Europeo Marítimo, de Pesca e de Acuicultura (FEMPA).

O obxectivo desta iniciativa é integrar ás propias persoas mariscadoras en todo o ciclo de produción, desde os procesos de acondicionamento de reprodutores e cultivo larvario ata a sementeira final nos bancos naturais. Este traballo conxunto permite optimizar os criterios de selección de exemplares con maior taxa de supervivencia e crecemento, complementando a traxectoria de centros como o CIMA e o IGAFA, que en 2025 entregaron máis de 2,1 millóns de unidades de semente ás confrarías galegas. 

Axudas para a adquisición de semente

A directora xeral aproveitou a visita para salientar a posta en marcha da nova orde de axudas publicada no Diario Oficial de Galicia (DOG) o pasado venres 7 de agosto, dotada con 800.000 euros de fondos propios da Xunta para financiar a adquisición de semente destinada a repoboar os bancos damnificados polos temporais e os descensos de salinidade de comezos de ano. O prazo para a presentación de solicitudes remata o vindeiro 14 de setembro.

A convocatoria cobre ata o 100 % do gasto subvencionable, cun límite máximo de 20.000 euros por proxecto e un prezo tope de 0,025 euros por unidade de semente procedente exclusivamente de criadoiro comercial autorizado. Para axilizar a chegada dos fondos ás confrarías de pescadores, cooperativas, organizacións de produtores e entidades asociativas titulares de plans de xestión, a tramitación resólvese por concorrencia non competitiva por estrita orde de entrada e permite solicitar un pagamento anticipado de ata o 50 % da subvención.