Santiago de Compostela, 20 de agosto de 2026.

A Xunta licita por un orzamento inicial de 250.173,07 euros, IVE incluído, a construción dunha nova estación depuradora de augas residuais (EDAR) no núcleo de Sorribas, no concello coruñés de Rois, para mellorar o saneamento nesta localidade.

En concreto, o obxecto do contrato é a execución dunha nova EDAR que contará cos seguintes elementos: pretratamento, fosa séptica soterrada e humidal de fluxo subsuperficial. A maiores, executarase un colector para conducir as augas residuais ata a nova depuradora e outro para levar a auga xa tratada ata o punto de vertido, ambos cos correspondentes pozos de rexistro.

Esta nova infraestrutura está dimensionada para dar servizo a 46 habitantes deste concello da provincia da Coruña no horizonte 2044 e substituirá o actual sistema de depuración, que presenta un funcionamento deficiente.

O prazo para a presentación de ofertas por parte das empresas interesadas remata o próximo 18 de setembro e unha vez resolto o procedemento de licitación, a adxudicataria disporá de 4 meses para a execución das obras.

No relativo ao financiamento, cómpre lembrar que esta actuación está enmarcada no convenio de colaboración subscrito entre Xunta e o Concello. Así, a Consellería de Medio Ambiente e Cambio Climático , a través de Augas de Galicia, asumirá o 80% do investimento previsto e a Administración local, o 20% restante. A actuación está, ademais, cofinanciada pola Unión Europea a través do Fondo Europeo Agrícola de Desenvolvemento Rural (FEADER), que financia o 60% do gasto elixible no marco do Plan Estratéxico da PAC 2023-2027 (PEPAC) en Galicia.

Cómpre lembrar que a planificación hidráulica e a prestación dos servizos municipais relacionados coa auga no rural galego presenta unha complexidade específica pola dispersión da poboación, a existencia de numerosos núcleos e parroquias (de feito, Galicia concentra máis da metade dos núcleos de poboación de España), a presenza de vivendas afastadas dos sistemas principais e a necesidade de empregar solucións proporcionadas á escala de cada ámbito.

Isto explica que as actuacións deseñadas non respondan a un modelo único, senón que combinan melloras de abastecemento, ampliacións de redes de saneamento, novas estacións depuradoras, posta a punto de instalacións existentes, bombeos, colectores, ramais de conexión e renovación de infraestruturas básicas.

A intervención de Sorribas, Rois, forma parte dunha nova carteira de actuacións de abastecemento, saneamento e depuración no rural impulsada ao abeiro da programación FEADER-PEPAC, que dá continuidade ás actuacións desenvolvidas nos últimos anos con financiamento europeo.

En conxunto, Augas de Galicia está a impulsar unha trintena de actuacións hidráulicas (xa executadas, en obras ou en tramitación) co fin de reforzar e garantir os servizos básicos relacionados coa auga no rural galego, que suman un investimento global estimado de case 28 millóns de euros.