Santiago de Compostela, 8 setembro de 2026

A Xunta avanza nos traballos previos á posta en marcha da estación intermodal da Coruña, tras finalizar as obras da nova estación de autobuses e definir, en colaboración co Concello da Coruña, a configuración das liñas interurbanas.

Neste marco, nos últimos meses celebráronse cinco xuntanzas de traballo entre o persoal técnico da Xunta e do Concello da Coruña -unha en maio de 2025, outra en xaneiro deste ano, dúas en marzo e outra o pasado abril- nas que se analizaron e acordaron os itinerarios de entrada e saída da cidade dos autobuses interurbanos e as particularidades de cada un deles. En concreto, abordáronse os itinerarios, as paradas, un estudo de alternativas aos percorridos e paradas propostas polo Concello, así como a identificación e proposta de actuacións en puntos concretos, entre outras cuestións. Na actualidade  estanse a ultimar posibles axustes nalgunhas paradas para optimizar o servizo, sen que estas modificacións afecten aos itinerarios definidos co Concello.

Neste sentido, a Xunta avaliou diversas alternativas co fin de facilitar ás persoas usuarias o acceso á rede de transporte interurbano desde distintos puntos da cidade e garantir a continuidade e a adecuada prestación dos servizos. Entre as alternativas analizadas incluíuse a creación de novas paradas en zonas próximas á actual estación de autobuses, co propósito de evitar modificacións nos percorridos que puidesen incrementar os tempos de viaxe e reducir os desprazamentos necesarios para acceder aos servizos da rede de transporte autonómico.

Como resultado destes traballos, o Goberno galego vén de remitir ao Concello da Coruña unha proposta formal para implantar unha nova parada na Ronda de Outeiro, número 95, en sentido saída da Coruña cara á Gaiteira, fronte ao CEIP San Francisco Javier e xunto ao parque de Oza, situado a uns 300 metros da actual estación. Polo tanto, a súa posición resulta máis próxima para as zonas de Elviña e Monelos que a propia estación actual.

A documentación trasladada inclúe a información técnica necesaria para analizar a súa viabilidade, así como a súa compatibilidade cos percorridos actuais das liñas e a súa contribución á mellora do acceso ao transporte público. Así, na carta enviada ao Concello aclárase que na zona non existe unha área habilitada como parada senón unha zona de aparcamento e de carga e descarga. Polo tanto, aclárase que a creación desta parada suporía a realización por parte do Concello das actuacións necesarias para adecuar o espazo habilitando unha zona de parada e mesmo valorar a instalación dunha marquesiña debido á concentración de persoas en horas punta.

Na carta, a Dirección Xeral de Mobilidade dá audiencia desta proposta ao Concello por un prazo de dez días en base ao establecido na Lei 2/2017 de medidas fiscais, administrativas e de ordenación. Así, o Concello ten ese prazo para presentar, se fose o caso, unha ou varias alternativas nas que xustifique o mantemento dunha análoga ou mellor funcionalidade para as persoas usuarias. Transcorrido ese prazo e tras analizar as alegacións resolverase o establecemento da nova parada.

Cómpre aclarar que a nova parada proposta pola Xunta na Ronda de Outeiro daría servizo dende A Coruña a todas as liñas que actualmente circulan pola Avenida da Pasaxe, canalizando a demanda dos concellos limítrofes -Culleredo, Oleiros, Cambre e Sada-, así como as liñas de Betanzos e Ferrol con parada nos centros hospitalarios da cidade.

O novo punto de parada incluiríase nas expedicións de saída dende A Coruña pola Avenida da Pasaxe e trataríase dunha parada exclusivamente de subida de viaxeiros, xa que en todas as concesións existe a prohibición de tráficos para viaxes con orixe e destino dentro do termo municipal da Coruña.