Santiago de Compostela, 11 de setembro de 2026

O conselleiro de Sanidade, Antonio Gómez Caamaño, visitou hoxe a nova unidade resonancia magnética móbil con base no Hospital Meixoeiro. Este equipo é o máis avanzado na sanidade pública de España e conta cun investimento da Xunta de 1.724.044 euros.

Durante a visita, o titular da carteira sanitaria estivo acompañado da delegada territorial da Xunta en Vigo, Ana Ortiz, do director xeral de Integración e Innovación Asistencial, Alfredo Silva, do xerente da área sanitaria, Javier Puente, e da xerente de Galaria, Rocío Mosquera.

O novo equipamento inclúe tecnoloxía punteira coa incorporación da intelixencia artificial aplicada ao posicionamento e reconstrución das imaxes. Isto permite reducir o ruído e axilizar os procesos de diagnóstico, especialmente en pacientes con dor, tremor ou dificultades para colaborar.

Ademais, incorpora importantes melloras na accesibilidade e confort. Entre elas destaca a apertura de 70 centímetros fronte aos 60 dos modelos convencionais e unha menor lonxitude do tubo, facendo que a exploración sexa máis cómoda.

A unidade de alto campo conta tamén cun potente imán, de entre 1,5 e 3 teslas, que permite xerar imaxes cunha nitidez moi superior e reducir o ruído das probas. Deste xeito, estas unidades son capaces de ofrecer uns resultados equivalentes aos que se obteñen nas resonancias fixas dos centros hospitalarios.

Outras das novidades que incorpora a unidade son as melloras desde o punto de vista ecolóxico e a redución dos custos operativos, reducindo en máis dun 30 % a necesidade de helio.

A unidade contará cun cadro de persoal de 3 técnicos especialistas, 3 enfermeiros, 2 facultativos especialistas en radiodiagnóstico e 1 auxiliar administrativo. A súa formación comezará este mesmo mes de setembro e terá unha duración de dúas semanas: unha de carácter teórico -sobre o uso de todos os programas e equipamento- e outra con pacientes, para  comprobar que a calidade dos resultados e o confort das probas sexan óptimos.

A sanidade Galega, pioneira no sistema de resonancias móbiles

Galicia é a única comunidade española que dispón dun sistema público e estruturado de unidades móbiles de resonancia magnética.

O programa, xestionado pola entidade Galaria a través da Unidade de Diagnóstico por Imaxe, iniciouse no ano 2006 coa primeira unidade con base no Hospital de Barbanza. Posteriormente fóronse incorporando novos equipos ata conformar a rede das catro unidades das que dispón actualmente o Servizo Galego de Saúde.

Desde a súa posta en marcha, este programa realizou máis de 231.000 estudos, chegando a beneficiar a 364.120 pacientes, reducindo en preto de 40 millóns os quilómetros en desprazamentos evitados e evitando unhas 5.933 toneladas de CO².

Cada equipo realiza máis de 7.600 resonancias por ano. Coa posta en marcha desta nova unidade pretende sumarse ata unhas 8.000 resonancias anuais máis, contribuíndo a reducir as listas de espera e mellorando a eficiencia no uso dos recursos sanitarios.

Durante as declaracións aos medios, o conselleiro destacou o traballo das sete áreas sanitarias de Galicia, que traballan de xeito coordinado para planificar as rutas das distintas unidades, adaptando o servizo á demanda asistencial dos hospitais.

Grazas a esta rede móbil, o Servizo Galego de Saúde achega alta tecnoloxía diagnóstica aos hospitais comarcais, reforzando a equidade territorial, e eficiencia e a sustentabilidade do sistema.