Santiago de Compostela, 17 de setembro de 2026

A Xunta de Galicia outorgou unha concesión para ocupar 411 m² do dominio público marítimo-terrestre (DPMT) no concello da Pobra do Caramiñal co fin de instalar un emisario submarino asociado á fábrica de Conservas Ría de Arosa SL.

Segundo o anuncio da Consellería de Medio Ambiente e Cambio Climático publicado hoxe no Diario Oficial de Galicia, trátase dun novo título concesional, de carácter accesorio e complementario ás instalacións xa existentes —que contan con concesión desde 2018— e destinado a conducir ao mar as augas residuais industriais previamente depuradas.

A solicitude inicial fora presentada ante Costas do Estado no ano 2009, expediente que recibiu a Xunta o verán pasado, tras asumir o traspaso efectivo das funcións e servizos para a xestión do litoral. A concesión outorgada agora corresponde exclusivamente á ocupación do dominio público necesaria para instalar un emisario submarino asociado á fábrica de conservas, cuxa actividade se desenvolve neste lugar desde 1906.

En concreto, a actuación prevista comprende unha tubaxe enterrada de aproximadamente 435 metros de lonxitude, dos cales 398 metros discorrerán por DPMT, así como un difusor submarino de 13 metros. O caudal máximo diario previsto é de 119 m³. As obras deberán comezar no prazo de 12 meses e rematar antes de 24 meses.

Ademais, cómpre subliñar que o título autoriza exclusivamente a ocupación do dominio público marítimo-terrestre e non substitúe os demais permisos, licenzas ou autorizacións esixibles conforme á normativa sectorial.