Vilanova de Arousa (Pontevedra), 30 de setembro de 2026

A conselleira de Medio Ambiente e Cambio Climático, Ángeles Vázquez, salientou hoxe que a concesión que autorizou a Xunta de Galicia para a ocupación de 1.300 metros cadrados no dominio público marítimo-terrestre (DPMT) permite desbloquear o proxecto para a construción do colector das Valiñas, que é unha peza imprescindible para avanzar na mellora do saneamento de Vilanova de Arousa e Cambados.

De feito, durante a visita que realizou á contorna, a conselleira, que estivo acompañada do delegado territorial da Xunta en Pontevedra, Pablo Fernández, lembrou que este proxecto levaba paralizado seis anos pola negativa de Costas do Estado a autorizar a ocupación necesaria para a execución do colector, a pesar de que a iniciativa contaba cun informe favorable do Servizo Provincial de Costas da provincia.

Ángeles Vázquez incidiu que, fronte a esa situación, a Consellería de Medio Ambiente e Cambio Climático, ao abeiro da Lei de ordenación e xestión integrada do litoral e unha vez feito efectivo o traspaso de servizos e funcións por parte do Goberno central, retomou a tramitación e resolveu a concesión en pouco máis de seis meses. Deste xeito, un procedemento administrativo que levaba tempo bloqueando un proxecto clave para a ría de Arousa convértese agora nun paso adiante para facelo realidade.

Unha vez autorizada a concesión a ocupar 508,23 metros cadrados de DPMT en Vilanova de Arousa e 792,40 metros cadrados en Cambados, a Xunta continuará coa tramitación correspondente para que en colaboración cos concellos, as obras comecen canto antes.

En concreto, a actuación, que supera os 5 millóns de euros de investimento previsto, inclúe a renovación do colector litoral que canaliza as augas fecais desde Vilanova de Arousa cara á estación depuradora de augas residuais de Tragove, en Cambados, reducindo de maneira moi significativa o volume e o número de verteduras á ría. Ademais, tamén se acometerá a mellora das estacións de bombeo e a construción dun novo tanque de tormentas.

Segundo indicou a conselleira, o obxectivo desta actuación é reducir os vertidos, mellorar o saneamento e garantir unha maior protección para a ría de Arousa, así como dar servizo a unha poboación estimada de preto de 11.700 habitantes no ano horizonte 2044.

Así mesmo, Ángeles Vázquez fixo fincapé en que este proxecto é exemplo da axilidade administrativa que supuxo para a Comunidade que o Goberno galego exerza xa de forma directa a xestión plena do seu litoral, así como do compromiso de apoiar os concellos no exercicio das súas competencias en materia de saneamento.

Neste caso, esta actuación supón un importante impulso ao saneamento integral da ría de Arousa, que é unha contorna de especial relevancia ambiental, social e económica. Este proxecto é clave tanto para a protección do medio ambiente e da saúde pública como para a pesca, o marisqueo, a acuicultura e o turismo.