O presidente da Xunta participou na xornada inaugural do VIII Foro La Toja-Vínculo Atlántico
Rueda reivindica a voz das comunidades autónomas ante os retos globais e destaca a Galicia como modelo de estabilidade e moderación
Salienta que a comunidade ten moito que achegar nos grandes debates internacionais, con accións pioneiras en materia de intelixencia artificial, enerxías renovables ou captación de investimentos
Aposta pola reflexión, o diálogo e o respecto como vías para acadar acordos e avanzar cara a unha conversación construtiva lonxe de retóricas belixerantes
Felicita ao expresidente de Portugal Marcelo Rebelo de Sousa, galardoado co Premio Josep Piqué do Foro, a quen definiu como “un exemplo de político con maiúsculas” e un símbolo do país veciño
O Grove (Pontevedra), 1 de outubro de 2026
O presidente da Xunta, Alfonso Rueda, reivindicou hoxe a voz e a capacidade das comunidades autónomas para contribuír coa súa experiencia e propostas ás solucións dos grandes retos globais.
Neste sentido, fixo fincapé na necesidade de que as administracións locais e rexionais poidan “formar parte activa do debate e das solucións que se deseñen xa que se aplicarán en primeiro lugar nos ámbitos máis próximos”.
Na súa intervención durante a inauguración do VIII Foro La Toja-Vínculo Atlántico, o titular do Executivo galego defendeu que Galicia ten moito que aportar aos desafíos actuais. Así, referiuse ao liderado da Comunidade ao dotarse da primeira lei europea para regulamentar a intelixencia artificial, así como ao seu papel clave na autonomía estratéxica, con máis do 80% da produción enerxética procedente de fontes renovables e coa dispoñibilidade de 18 dos 34 materiais considerados críticos pola Unión Europea.
Así mesmo, o presidente puxo en valor o clima de seguridade xurídica, estabilidade política e moderación que se vive en Galicia, o que permite acadar acordos en asuntos fundamentais como a lingua. Destacou tamén a aposta pola construción de vivenda pública e por facilitar solo para a súa edificación, así como a capacidade de atraer grandes investimentos industriais á comunidade, como a futura fábrica do xigante da automoción SAIC.
Respecto e convivencia, o ADN galego
O titular do Executivo autonómico quixo agradecer unha vez máis á organización por celebrar na Toxa este encontro de reflexión, lembrando a vocación de Galicia como terra de acollida e diálogo vinculada ao Camiño de Santiago. Uns valores de respecto e convivencia que forman parte do ADN galego e que seguirán tendo especial protagonismo no vindeiro Xacobeo 2027.
Así, Rueda avogou por aproveitar o marco do Foro La Toja-Vínculo Atlántico para reivindicar o valor da reflexión, do diálogo e do respecto mutuo. Neste sentido, defendeu a necesidade de “deixar de lado as retóricas belixerantes en favor dunha conversa construtiva e eficaz”, traballar desde unha perspectiva de futuro sen cortoplacismos e amosar que desde o ámbito local e autonómico tamén se edifica o futuro do país.
Finalmente, o xefe do Executivo autonómico felicitou ao expresidente de Portugal Marcelo Rebelo de Sousa, galardoado co Premio Foro La Toja - Josep Piqué do Foro, a quen definiu como “un exemplo de político con maiúsculas” e un símbolo do país veciño.
Imaxes relacionadas
