Lugo, 2 de outubro de 2026

O conselleiro de Sanidade, Antonio Gómez Caamaño, subliñou hoxe que, grazas ao Código Ictus, Galicia ofrece unha mellor resposta sanitaria a preto de 2.000 casos de accidentes cerebro-vasculares ao ano.

O titular da carteira sanitaria, acompañado polo director xeral de Integración e Innovación Asistencial do Sergas, Alfredo Silva, e polo xerente da área sanitaria de Lugo, A Mariña e Monforte de Lemos, Ramón Ares, visitou hoxe no Hospital Lucus Augusti o Autobús do Cerebro, unha iniciativa da Sociedade Española de Neuroloxía no marco da Semana do Cerebro.

Gómez Caamaño explicou que o Código Ictus, en funcionamento desde 2016, permite coordinar a resposta asistencial ante unha sospeita desta enfermidade e activar os recursos necesarios para que o paciente poida recibir canto antes o tratamento máis axeitado.

Esta resposta que ofrece o sistema sanitario galego foi evolucionando coa incorporación de  novos recursos, coa extensión das unidades de ictus, dos tratamentos de reperfusión e da capacidade para realizar trombectomías, así como co reforzo da atención neurolóxica nos hospitais do Sergas.

Ao respecto deste tema, o conselleiro destacou os importantes paso dados nos últimos anos polo Hospital Universitario Lucus Augusti, que conta cunha unidade de ictus que permite ofrecer unha resposta máis rápida e máis próxima aos pacientes da súa área.

Engadido ao anterior, o Hospital Lucus Augusti conta cunha atención neurolóxica cada vez máis especializada, con consultas monográficas e proxectos innovadores como a primeira Neuroescola de Galicia.

Información personalizada

Tal e como detallou o conselleiro, o autobús que hoxe visitou permite que as persoas que se acheguen poidan recibir información personalizada e realizar probas para coñecer mellor a súa saúde cerebrovascular, ademais de recibir recomendacións para manter un cerebro san.

Para o máximo responsable do Sergas, este labor de concienciación é moi importante, posto que as enfermidades neurolóxicas teñen un impacto moi relevante sobre a saúde e a calidade de vida.

Tamén incidiu na importancia da prevención, xa que ata o 90 % dos ictus están relacionados con factores de risco modificables. Así mesmo, unha parte relevante das demencias e dos casos de epilepsia poderían previrse ou atrasarse actuando sobre estes factores.

Ao respecto, o conselleiro citou como hábitos que tamén son saúde, a realización de exercicio, o control da tensión arterial e da diabetes, o mantemento dunha alimentación equilibrada, coidar o sono e, ademais, evitar o tabaco e o alcohol.

Xunto coa prevención, Gómez Caamaño dixo que, desde a sanidade pública, debe garantirse unha resposta rápida, coordinada e especializada cando aparece unha enfermidade neurolóxica.

O conselleiro referiu que iniciativas como a que hoxe visitou son unha boa oportunidade para incidir na importancia de que a cidadanía coide a súa saúde cerebral, e resaltou o feito de contar cun sistema como o galego preparado para responder cando aparece a enfermidade.

Para rematar a súa intervención, agradeceu á Sociedade Española de Neuroloxía o seu labor de divulgación e concienciación, e destacou o traballo dos equipos de Neuroloxía e de todos os servizos que interveñen na atención destas patoloxías, tanto na prevención como no diagnóstico, no tratamento e no seguimento dos pacientes.