Santiago de Compostela, 8 de outubro de 2026

A Xunta de Galicia mantivo esta mañá un webinario informativo cos concellos costeiros galegos para trasladarlle os pasos a seguir no que respecta á explotación dos servizos de tempada na zona do dominio público marítimo-terrestre (DPMT) dos seus municipios durante o ano 2027. 

A subdirectora xeral do Litoral, Teresa Bernal, explicou hoxe a 50 representantes de concellos galegos que é o segundo ano, desde que o Goberno galego asumiu a xestión plena da costa, que as solicitudes para explotar estes servizos se tramitarán de forma directa desde a Administración.

Así mesmo, a representante da Consellería de Medio Ambiente e Cambio Climático informou sobre os prazos relativos aos servizos, actividades e eventos que se poderán instalar no DPMT de cara á tempada alta do vindeiro ano.

Tal e como se publicou no Diario Oficial de Galicia, o prazo tanto para as novas solicitudes como para as prórrogas permanece aberto desde o día 1 de outubro e ata o 30 do mesmo mes, para que as entidades locais poidan acceder con carácter preferente a través do procedemento único habilitado na sede electrónica da Xunta e tomando como referencia a guía e o modelo base para a elaboración do plan de explotación de cada concello -que terá unha vixencia de catro anos-.

Neste senso, a subdirectora xeral explicou aos concellos que todo este material xa está dispoñible no portal Galicia litoral da páxina web da Consellería e que o prazo de apertura para os servizos e actividades de tempada se estenderá desde o día 19 de marzo, o primeiro da próxima Semana Santa, e ata o 31 de outubro de 2027.

Durante este período, como xa se permitiu por primeira vez este ano, as instalacións autorizadas poderán permanecer abertas de forma ininterrompida. Ademais, tendo en conta o seu carácter temporal e desmontable, este tipo de construción terán que quedar retiradas do DPMT no prazo máximo de 15 días, contados desde a finalización da tempada.

Cómpre lembrar que desde o traspaso efectivo á Xunta o 1 de xullo de 2025 das funcións e servizos para a xestión do litoral, este é o segundo ano que o Goberno galego asume a tramitación directa das solicitudes dos municipios interesados na explotación das instalacións, actividades, eventos e servizos de tempada e praia no DPMT do seu termo municipal.

Este ano un total de 18 concellos galegos asumiron a xestión destas zonas de costa, ademais, nestes casos serán as propias administracións locais as que tramitarán o procedemento para a adxudicación a terceiros dos servizos e actividades que se desenvolverán nesta franxa da costa, incluída a publicación dos correspondentes anuncios, con indicacións neles dos prazos para a presentación de ofertas ou solicitudes de participación.