Santiago de Compostela, 10 de novembro de 2026

A Xunta pon en valor o papel divulgador de MeteoGalicia coa achega de información científica á sociedade. Así o sinalou o conselleiro de Medio Ambiente e Cambio Climático, Nicolás Vázquez, durante a visita que realizou esta mañá ás instalacións deste organismo en Santiago, xunto con medio cento de alumnos e alumnas de 6º de Educación Primaria do CEIP Campomaior de Ordes.

O alumnado puido coñecer hoxe da man dos profesionais deste servizo meteorolóxico de referencia en Galicia, dun xeito didáctico e experimental, a meteoroloxía como ciencia, os fenómenos atmosféricos e os métodos que se utilizan para realizar as predicións.

O conselleiro salientou que este organismo desenvolve un servizo público esencial para planificar o día a día das persoas e puxo tamén como exemplo deste impacto a importancia que ten o seu labor en actividades económicas con tanto peso en Galicia como o marisqueo, a agricultura ou o turismo.

Neste sentido, Nicolás Vázquez subliñou que co fin de continuar reforzando a calidade na predición meteorolóxica e a anticipación de fenómenos adversos, a Xunta vén de adxudicar por case 1,3 M€ a modernización do radar meteorolóxico de Cuntis.

Esta infraestrutura, segundo explicou, permite observar con precisión as frontes que chegan desde o Atlántico e seguir a súa evolución ao longo de todo o territorio galego. Grazas á actualización prevista, Galicia se situará á vangarda dos servizos meteorolóxicos de toda España, xa que ningunha outra comunidade autónoma conta cun radar destas características.

En concreto, o conselleiro destacou que esta mellora no radar permitirá optimizar a calidade, estabilidade e fiabilidade dos datos e facilitar o intercambio de información con outras redes e proxectos de ámbito europeo.

Así mesmo, tamén fixo fincapé en que este reforzo na anticipación posibilitará unha mellor resposta das administracións ante os retos meteorolóxicos derivados do cambio climático.