A Xunta incorporou xa a dous novos médicos con praza fixa na quenda de tarde do centro de saúde de Moaña
As prazas foron adxudicadas a través do sistema de concurso de méritos sen oposición habilitado pola Xunta a través dunha habilitación legal e os profesionais incorporáronse o pasado martes
O conselleiro de Sanidade, Julio García Comesaña, avanzou a adxudicación, neste mesmo mes, da obra de construción do novo centro de saúde de Moaña, lembrando que o goberno local tardou dous anos e medio en achegar a parcela
Santiago de Compostela, 8 de febreiro de 2023
“A Xunta incorporou xa a dous novos médicos con praza fixa na quenda de tarde do centro de saúde de Moaña”. Así o destacou o conselleiro de Sanidade, Julio García Comesaña, no Parlamento de Galicia, en resposta a unha pregunta do Bloque Nacionalista Galego, sobre o servizo médico na casa do mar deste concello.
Na súa intervención no Pazo do Hórreo, o titular da carteira sanitaria subliñou que os novos médicos xa se incorporaron o pasado martes, e que as prazas foron adxudicadas a través do sistema de concurso de méritos sen oposición, habilitado pola Xunta a través dunha habilitación legal.
O conselleiro tamén anunciou que, este mesmo mes, se adxudicará a obra de construción do novo centro de saúde de Moaña, “coa que se duplicará a superficie das infraestruturas actuais”. Sobre este particular, lembrou que “o Goberno local tardou dous anos e medio en achegar a parcela, mentres que a Xunta vai resolver os seus trámites en seis meses” (licitación, adxudicación e supervisión do proxecto). “Moaña podería ter xa un novo PAC funcionando, se o seu goberno local fose igual de áxil que a Xunta”, -remarcou o conselleiro de Sanidade-.
A realidade é que, grazas ás medidas postas en marcha polo Goberno galego para paliar a falta de médicos do primeiro nivel asistencial, “hoxe hai tres médicos máis con praza fixa no centro de saúde de Moaña, os dous de agora e outro profesional que se incorporou en novembro”.
Imaxes relacionadas
