Pontevedra, 14 de febreiro de 2023 O conselleiro de Sanidade, Julio García Comesaña, destacou hoxe, nun almorzo informativo da Asociación de construtores de Pontevedra, “os investimentos potentes, planificados e coherentes da Xunta tanto en atención primaria como en hospitalaria nesta provincia”.

Tal e como remarcou o máximo responsable da sanidade pública galega, os presupostos da sanidade pública galega para este ano son os maiores da historia en xeral e no capítulo de persoal e, loxicamente “tamén o son no que atinxe de investimentos”. Hai máis de 350 millóns de euros para investimentos entre primaria e hospitalaria. Descontando os equipamentos ou o material informático, quedan para obras uns 240 millóns, -remarcou Comesaña-.

Na provincia de Pontevedra hai varias obras xa iniciadas, entre as que o conselleiro destacou o Novo Montecelo, cunha primeira fase de máis de 130 millóns, para a que se reserva nas contas de 2023 unha partida de 64 millóns. 

Polo que respecta a Vigo, tamén hai obras hospitalarias moi importantes, estando a punto de adxudicarse, por 1,3 millóns, a instalación no Álvaro Cunqueiro da segunda unidade de hospitalización de saúde mental infanto xuvenil con ingreso de Galicia. Ademais, están xa iniciadas as obras da nova unidade de enfermidades raras e da unidade de necropsias de anatomía patolóxica. Así mesmo, están xa adxudicados os proxectos arquitectónicos de tres reformas máis, a unidade de rehabilitación cardíaca, o hospital de día de procesos médicos, e a nova zona para os equipos de hospitalización a domicilio.

Obras de adecuación de espazos no gran hospital de Vigo, pero, tamén, -proseguíu Comesaña-, obras de reforma no Hospital do Meixoeiro, centro no que se investiron máis de 22 millóns de euros desde que se puxo en marcha o Álvaro Cunqueiro.

Tamén destacou as obras no Hospital do Salnés, no que agora mesmo estase a terminar a nova central de esterilización que, entre obra e equipamento, suporá un investimento de 1,3 millóns de euros.

Atención primaria

No que atinxe á atención primaria, Comesaña destacou o Centro Integral de Saúde de Lalín, cun investimento de máis de 10 millóns de euros, cuxas obras xa están moi avanzadas, así como a ampliación do centro de saúde de Porriño, cun orzamento de 4,3 millóns.

Tamén dixo que xa está adxudicada, por 14,3 millóns, a obra do CIS Olimpia Valencia. A segunda obra a piques de empezar é o novo centro de saúde de Moaña, que suporá un investimento de sete millóns.