A delegada territorial visitou esta mañá o centro educativo acompañada do xefe territorial da consellería
Martina Aneiros felicita a dous alumnos do IES Punta Candieira polos seus resultados na XL Olimpiada Galega de Química
Os estudantes de 2º de Bacharelato, Sara Novais e Álvaro Otero, quedaron terceira e quinto no certame que tivo lugar o pasado mes na Coruña
A delegada territorial da Xunta en Ferrol, Martina Aneiros, acompañada do xefe territorial da Consellería de Cultura, Educación, FP e Universidades, Indalecio Cabana, visitou esta mañá o IES Punta Candieira de Cedeira, onde tivo a ocasión de felicitar aos alumnos, Sara Novais Meireles e Álvaro Otero polos bos resultados acadados na XL Olimpiada Galega de Química. Nesta competición tamén participou outra alumna do centro, Gemma López.
Aneiros interesouse pola experiencia destes dous alumnos de 2º de Bacharelato no certame no que Sara Novais e Álvaro Otero obtiveron uns meritorios terceiro e quinto posto, respectivamente.
Precisamente esa terceira praza foi o pasaporte da alumna cedeiresa á XXXVI Olimpiada Española de Química á que acudirá como representante galega. A competición, para a que Aneiros lle desexou moita sorte, terá lugar a próxima semana en Valencia.
Na visita tamén estivo presente o director do instituto, Francisco Javier Pérez Piñón, co que a delegada abordou outros asuntos de interese para o centro educativo.
Imaxes relacionadas
