Un total de 1.200 alumnos desde 6º de Primaria a 4º de ESO poderán mellorar as súas competencias en inglés na ‘Digitalweek’ o vindeiro outono
As estadías organizadas pola Xunta desenvolveranse nun centro residencial en Galicia en quendas dunha semana de duración
Cada centro poderá participar cun máximo de 25 alumnos do mesmo nivel educativo
A actividade é totalmente gratuíta para as familias
Un total de 1.200 alumnos desde 6º de Primaria a 4º de ESO poderán mellorar a súas competencias en inglés o vindeiro outono participando na iniciativa Digitalweek organizada pola Xunta de Galicia. O Portal Educativo publica a convocatoria deste programa de estadías lingüísticas, que se desenvolverá durante o primeiro trimestre do curso escolar 2023/24 nun centro residencial situado en Galicia en quendas dunha semana (desde o domingo pola tarde ata o sábado seguinte pola mañá).
O obxectivo é a práctica do idioma e a súa utilización en diferentes contextos para mellorar a comunicación oral a través de actividades dixitais, co apoio de profesorado nativo en lingua inglesa.
Así mesmo, o alumnado participante contará con actividades formativas non só académicas, senón tamén que fomenten a actividade física, a socialización e o coñecemento cultural e tecnolóxico cunha metodoloxía adecuada á súa etapa educativa. A metodoloxía será activa, lúdica e cooperativa, incidindo na educación en valores democráticos e nos aspectos relacionados coa sustentabilidade e coñecemento da contorna.
O prazo de presentación de solicitudes estará aberto ata o 25 de xuño e os centros interesados realizarana a través da aplicación de Programa Educativos. Cada centro poderá solicitar participar cun máximo de 25 alumnos do mesmo nivel educativo. O grupo irá acompañado dun docente cun coñecemento da lingua inglesa acorde e responsabilizarase da adecuada participación do seu grupo.
A actividade, á que a Consellería destina unha inversión de 597.00€ e que é totalmente de balde para as familias, organizarase nas seguintes quendas:
QUENDA | DATAS | CURSO | ALUMNADO | ||
1ª quenda | 1 – 7 outubro | 6º de Primaria | 125 | ||
2ª quenda | 8 – 14 outubro | 6º de Primaria | 125 | ||
3ª quenda | 15 – 21 outubro | 6º de Primaria | 125 | ||
4ª quenda | 22 - 28 outubro | 6º de Primaria | 125 | ||
5ª quenda | 29 outubro – 4 novembro | 1º de ESO | 125 | ||
6ª quenda | 5 – 11 novembro | 1º de ESO | 125 | ||
7ª quenda | 12 – 18 novembro | 2º de ESO | 125 | ||
8ª quenda | 19 – 25 novembro | 3º de ESO | 125 | ||
9ª quenda | 26 novembro – 2 decembro | 4º de ESO | 100 | ||
10ª quenda | 10 – 16 decembro | 4º de ESO | 100 | ||
TOTAL ALUMNADO | 1.200 | ||||
Esta acción enmárcase tanto na Estratexia Galega de Linguas Estranxeiras 2030 (Edulingüe), como na Estratexia Galega de Educación Dixital 2030 (Edudixital), dado que a aprendizaxe do alumnado realizarase a través de actividades do ámbito dixital.