Dous doutorandos realizan as súas teses no ámbito da estatística aplicada ás ciencias da vida na empresa Biostatech co apoio da Xunta de Galicia

Ames (A Coruña), 29 de agosto de 2023

A directora da Axencia Galega de Innovación (Gain), Patricia Argerey, visitou esta mañá a consultoría de bioestatística Biostatech con sede no Milladoiro (Ames) que conta con dous doutorandos que están a realizar as súas teses de doutoramento no ámbito da estatística aplicada ás Ciencias da Vida e da Saúde na empresa, co apoio da Xunta de Galicia a través do programa Doutoramentos Industriais. En concreto, Biostatech poderá recibir unha axuda máxima de ata 94.000 euros en 4 anos por doutorando, apoio logrado nas edicións anteriores deste programa, para a contratación de dous estudantes de doutoramento, un da Universidade de Santiago de Compostela e outro da Universidade da Coruña.

Ambas teses doutorais enfócanse, por unha banda, no ámbito da medicina personalizada, na predición do risco dos pacientes de padecer enfermidades cardiovasculares, cancro e diabetes, entre outras, incorporando nova información destes ao longo do tempo. A segunda tese céntrase no descubrimento de proteínas do noso corpo que indiquen o desenvolvemento ou evolución dunha enfermidade (biomarcadores), mediante a análise proteómica, é dicir, a análise do conxunto de proteínas en sangue nunha condición determinada.

Argerey aproveitou a visita para lembrar que segue aberta, ata o 18 de setembro, a convocatoria de 2023 deste programa dotada con 1,9 millóns de euros. A previsión é apoiar a contratación de 15 estudantes do sistema universitario galego en empresas e centros tecnolóxicos con domicilio social ou centro de traballo en Galicia nos que desenvolverán a súa tese doutoral.

Doutoramentos Industriais, promovido polas Consellerías de Economía, Industria e Innovación e a de Cultura, Educación, Formación Profesional e Universidades, permite realizar a tese doutoral nunha contorna empresarial, orientando o proxecto de investigación á resolución das necesidades e problemas dunha empresa ou centro tecnolóxico, en colaboración cunha universidade do Sistema Universitario de Galicia (SUG) que se encargará da formación investigadora da persoa doutoranda. Os obxectivos son favorecer a investigación colaborativa entre unha empresa ou centro de innovación e tecnoloxía e a universidade -e con iso os procesos de transferencia-, promover a formación de mozos e mozas investigadores no marco de proxectos de interese empresarial, e estimular a súa posible inserción laboral unha vez que remate a axuda.

Estas achegas inclúen tanto os custos de contratación, gastos relacionados co proxecto no ámbito da empresa ou centro tecnolóxico e apoios para a realización de estadías de tres meses no estranxeiro, como gastos relacionados co desenvolvemento do proxecto no ámbito da universidade e o custo da matrícula.

A través das dúas edicións anteriores deste programa apoiouse a contratación de 30 persoas doutorandas industriais. Doutoramentos Industriais completa outras medidas postas en marcha polo Goberno galego co obxectivo de captar talento e crear emprego de calidade no eido da investigación como Principia, Oportunius, Ignicia, os programas de apoio predoutoral e posdoutoral e Investigo.

Para difundir a convocatoria están a desenvolverse xornadas online en colaboración coas tres universidades do SUG. A vindeira sesión será o 8 de setembro en colaboración coa Universidade da Coruña.

Biostatech é unha empresa de bioestatística creada no ano 2012, recoñecida como mellor spin-off de base tecnolóxica da Universidade de Santiago de Compostela en 2022. O seu equipo interdisciplinar está composto por profesionais que traballan no ámbito da aplicación de métodos estatísticos en diversos sectores, especialmente nas Ciencias da Vida e a Saúde. Ademais de Doutoramentos Industriais, Biostatech ten participado noutros programas da Xunta de Galicia de apoio á I+D+i como as aceleradoras Agrobiotech e Bioincubatech, os programas Principia, Investigo, InnovaPeme e os préstamos IFI Innova.