A Xunta traballa nunha nova lei de cooperativas para axilizar a creación de entidades e regular novos modelos de traballo colaborativo
A conselleira de Promoción do Emprego e Igualdade, Elena Rivo, visitou hoxe en Ribadavia as adegas de Viña Costeira, onde referendou o seu compromiso cunha fórmula que “dá prioridade aos beneficios sociais antes que á rendibilidade financeira”
Reafirmou o apoio da Xunta á economía social, que representa máis do 7% do Produto Interior Bruto da nosa Comunidade, ao tempo que destacou que 21 cooperativas galegas se sitúan entre as 600 máis relevantes do Estado
Aproveitando a visita á cooperativa vitivinícola Viña Costeira, que cualificou de “exemplo emblemático deste traballo cooperativo durante 55 anos”, a conselleira destacou que a economía social implica ”solidariedade e darlle prioridade aos beneficios sociais antes que á rendibilidade financeira”. Afirmou que cada vez hai máis cooperativas e que destaca o liderado das mulleres. Nesa liña, na nosa Comunidade case 29.000 mulleres forman parte de cooperativas, das cales preto de 27.000 son socias.
En termos económicos, a titular de Promoción do Emprego e Igualdade salientou que a economía social representa máis do 7% do noso Produto Interior Bruto (PIB), o que se traduce nun impacto anual duns 850 millóns de euros. De feito, 21 cooperativas galegas sitúanse entre as 600 máis relevantes do Estado.
Deste xeito, a conselleira referendou o compromiso da Xunta co cooperativismo por ser unha “fórmula moi importante para a economía galega”. Nese senso, cómpre lembrar apoios do Goberno galego como o programa Aprol Economía Social, que fomenta a incorporación de persoas tanto desempregadas como ocupadas a cooperativas e sociedades laborais; así como a Rede de polos de emprendemento e apoio ao emprego, despregada polo territorio para asesorar novos negocios. Tamén a Rede Eusumo, que leva máis dunha década acompañando ás entidades que apostan pola economía social e polo cooperativismo en Galicia.
Imaxes relacionadas
