A unidade de vixilancia de edificios xudiciais avala o servizo de seguridade previsto pola Xunta para a cidade da xustiza de Vigo
O director xeral de Xustiza, José Tronchoni, mantivo unha xuntanza cos responsables da unidade por parte da Policía Nacional e a Garda Civil
Santiago de Compostela, 15 de setembro de 2023
A Unidade de Vixilancia de Edificios Xudiciais (Uvex) avala o servizo de seguridade previsto pola Xunta para a Cidade da Xustiza de Vigo. Así llo trasladaron os responsables da unidade por parte da Policía Nacional, Vicente Rivero, e da Garda Civil, Miguel Estévez, ao director xeral de Xustiza, José Tronchoni, nunha xuntanza para avaliar a nova situación da seguridade xudicial en Vigo, tras a concentración de servizos na nova sede.
No encontro, os responsables da Uvex manifestaron que a seguridade da Cidade da Xustiza “está garantida e conta con todos os efectivos necesarios” conforme ao convenio co Ministerio do Interior, asinado en 2018 e que foi renovado e actualizado o pasado decembro para a súa aplicación este ano consonte á nova situación. Apuntan ademais que non é precisa a vixilancia presencial durante 24 horas.
Cómpre sinalar que, como resultado da construción da Cidade da Xustiza concentráronse nunha única sede todos os servizos xudiciais de Vigo, agás o Rexistro Civil, pasando de seis sedes xudiciais a dúas. Por este motivo, a Xunta, co aval do Ministerio do Interior, reorganizou o servizo de vixilancia para darlles resposta aos actuais riscos, características, estrutura, medios dispoñibles e necesidades do servizo.
Pódese garantir polo tanto que o servizo prestado é superior ao que se facía de maneira individual nas antigas sedes. En concreto, prestan os seus servicios nos dous edificios de Vigo, en combinación co de Redondela, 20 efectivos.
Imaxes relacionadas
