A Xunta activa a alerta laranxa para mañá por temporal costeiro en todo o litoral galego

O fenómeno adverso estará activo desde o mediodía por ventos do oeste ou noroeste de ata forza 7 e mar combinada do noroeste con ondas de ata 7 metros

Aconséllase consultar a páxina web do CIAE 112 (www.112galicia.org), que conta con información meteorolóxica e con ligazóns de interese

Compartir
  • whatsapp

Santiago de Compostela, 9 de febreiro de 2024

A Dirección Xeral de Emerxencias e Interior da Vicepresidencia Primeira da Xunta vén de activar a alerta laranxa para mañá sábado por temporal costeiro en todo o litoral galego. 

Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde o mediodía por vento do oeste ou noroeste de forza 7 que pode chegar ocasionalmente a forza 8 mar adentro en Lugo. Haberá tamén mar combinada do noroeste con ondas de ata 7 metros e temporalmente de ata 8 metros ao norte de Prior.

Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.

A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

Aconséllase consultar a páxina web do CIAE 112 (www.112galicia.org), que conta con información meteorolóxica e con ligazóns de interese.