Estratexia galega de acción exterior 2025-2029

Trátase dunha estratexia de país que ten que adaptarse axiña ao novo entorno mundial e europeo. Coa aprobación da Lei 10/2021, Galicia pode xa artellar a súa acción exterior coas máximas garantías xurídicas e institucionais.

Priorizáronse áreas, aludindo primeiramente á Eurorrexión Galicia-Norte de Portugal e á lusofonía, e posteriormente á UE e ao resto da Europa, ficando despois os restantes ámbitos.

Cara ao futuro, a opción estratéxica por unha Europa plenamente integrada resulta crucial para Galicia. Hai que salientar a cerna básica das relacións internacionais de España cara ao exterior:

• A promoción dos dereitos humanos, a democracia, a seguridade, o feminismo e a diversidade como referentes da acción de España no mundo.
• Impulsar a construción no plano global dun novo contrato social e interxeracional, sobre a base da Axenda 2030 e o pleno desenvolvemento dos dereitos políticos, sociais, económicos e ambientais.
• A defensa dun planeta máis sostible, habitable, resiliente e verde.
• Prestar especial atención ás cuestións da paz, a seguridade e a defensa, desde unha concepción holística e integral da seguridade humana e a dignidade das persoas.
• Impulsar a Política Exterior e de Seguridade Común e a Política Común de Seguridade e Defensa.

Asemade, os Obxectivos de Desenvolvemento Sostible (ODS) han informar de todas as iniciativas e actuacións da nosa acción exterior, e cómpre o aliñamento da EGAEX 2025-2029 con eles para contribuír a acadalos.

Esta estratexia debe verse como un instrumento para aprender a valorar o influxo exterior e para aproveitar as oportunidades consubstanciais á internacionalización da economía e das empresas.

Desde a perspectiva exterior, serían cinco os eixes de atención a considerar polos operadores galegos:

• Galicia debe involucrarse nos retos do mundo que inciden sobre ela. Este ámbito de actuación é a chave para gañar consideración como actor relevante.
• Impulsar o comercio, na súa máis ampla acepción: o comercio mundial é un factor fundamental na redución de custos, xa que o custo dos produtos internacionalizados crece por baixo da inflación, e por tanto os intercambios xerados polo comercio reforzan o benestar colectivo.
• Facilitar a xeración de alianzas entre espazos económicos e entre empresas: a cooperación é un factor de primeira magnitude para impulsar o acceso aos mercados internacionais.
• Estimular a atracción de investimento estranxeiro directo, mesmo a pesar das dificultades e da competencia internacional existente.
• Atraer talento, especialmente no plano colectivo, pero tamén de maneira individual. Neste caso resulta moi relevante impulsar Galicia como un país de oportunidades.

Data de aprobación polo Consello da Xunta: 24/02/2025