A Orde do 15 de outubro de 2012, da Consellería de Presidencia, Administracións Públicas e Xustiza, pola que se fixan as contías e as porcentaxes dos premios do xogo do bingo, apróbase baixo o amparo da habilitación contida na disposición derradeira segunda do Decreto 113/2010, do 1 de xullo, polo que se modifica o Decreto 181/2002, do 10 de maio, polo que se aproba o Regulamento do xogo do bingo, e o Decreto 116/1986, do 4 de xuño, polo que se aproba o Catálogo de xogos da Comunidade Autónoma de Galicia.
Na devandita orde establécese que «A porcentaxe destinada a premios no xogo do bingo, na súa modalidade de bingo tradicional, será do 59 % das cantidades xogadas». No Regulamento do xogo de bingo estaba establecida no 61 % e, transitoriamente, foi modificada, pola súa vez, pola Orde do 22 de febreiro de 2012 ao 66,875 % das cantidades xogadas e aplicable unicamente para o xogo do bingo explotado por aquelas empresas que, acolléndose ao que sinala a disposición transitoria segunda da Lei 12/2011, do 26 de decembro, de medidas fiscais e administrativas para 2012, non reduzan o cadro de persoal medio da sala de bingo durante o exercicio 2012.
Así mesmo, a Orde do 15 de outubro determina, no que se refire á contía dos premios, que a contía da liña será do 3 %; a do bingo ordinario, do 46 %, e a da prima, o 10 % do valor facial dos cartóns vendidos en cada partida.
Os cambios nas porcentaxes de premios establecidas na citada orde faranse efectivos desde a primeira partida correspondente á sesión de xogo en que a orde entre en vigor. Non obstante, os premios de prima e prima-plus en xogo pendentes de outorgar nese momento rexeranse polas regras establecidas para eles con anterioridade, ata que se produza o seu efectivo outorgamento. A orde entrará en vigor o 1 de xaneiro de 2013 e a partir desa data poden subsistir cartóns coas modificacións derivadas dos cambios mencionados anteriormente.
En consecuencia,
resolvo:
Primeiro. Os cartóns de bingo actualmente existentes poderán seguir sendo utilizados polas empresas de bingo a partir da entrada en vigor da Orde do 15 de outubro de 2012, da Consellería de Presidencia, Administracións Públicas e Xustiza, pola que se fixan as contías e as porcentaxes dos premios do xogo do bingo, nas salas de bingo de Galicia, ata o seu esgotamento.
Segundo. No reverso dos cartóns deberán entenderse as actuais lendas como segue:
Onde di: «A cantidade que se distribuirá en premios en cada partida consistirá no 61 por 100 do valor facial da totalidade dos cartóns vendidos, correspondendo:
O 5 por 100 á liña, o 50 por 100 ao bingo e o 6 por 100 á prima».
Debe dicir: «A cantidade que se distribuirá en premios en cada partida consistirá no 59 por 100 do valor facial da totalidade dos cartóns vendidos, correspondendo:
O 3 por 100 á liña, o 46 por 100 ao bingo e o 10 por 100 á prima».
Terceiro. Esta resolución deberá estar exposta, de forma clara e visible para as persoas xogadoras, nas instalacións das salas de bingo.
Cuarto. O contido modificado por esta resolución do reverso dos cartóns deberá recollerse nun soporte material, tipo tarxeta ou cartel, que permanecerá exposto de xeito visible en todas e cada unha das mesas de xogo e debidamente protexido para evitar a súa deterioración, e deberá ademais estar á vista do público na área de recepción ou vestíbulo.
Disposición derradeira. Entrada en vigor
Esta disposición entrará en vigor o 1 de xaneiro de 2013.
Santiago de Compostela, 11 de decembro de 2012
Carlos Rodríguez Sánchez
Director xeral de Tributos