A Resolución do 11 de maio de 2012 pola que se convocan para o período 2012/13 as subvencións aos proxectos dinamizadores das áreas rurais de Galicia, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2007-2013 (DOG nº 106, do 5 de xuño de 2012), establece a repartición da dotación económica entre as anualidades 2012 (2.000.000 €) e 2013 (1.500.000 €). Igualmente, establece o 30 de outubro de 2012 como prazo para executar e xustificar correctamente o investimento correspondente á anualidade 2012, e o 30 de xuño de 2013 como prazo límite para a execución e xustificación final dos proxectos.

Debido á concorrencia no tempo de catro convocatorias e ao gran número de expedientes manexados, non foi posible resolver a convocatoria de xeito que os beneficiarios tivesen tempo suficiente para executar e xustificar os investimentos nos prazos previstos.

Co obxecto de non causar un prexuízo aos beneficiarios das axudas, e unha vez tramitado o oportuno expediente,

RESOLVO:

1. O crédito previsto para a anualidade 2012 na Resolución do 11 de maio de 2012, pola que convocan para o período 2012/13 as subvencións aos proxectos dinamizadores das áreas rurais de Galicia, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2007-2013, pasa integramente á anualidade 2014, manténdose a de 2013.

2. O prazo límite para a execución e xustificación dos investimentos vinculados aos proxectos subvencionados correspondentes á anualidade 2013 será o 30 de agosto de 2013. O feito de non xustificar correctamente esta anualidade, e dependendo das dispoñibilidades ou situación orzamentaria, podería devir en perda de dereito ao cobramento da axuda.

3. O prazo límite para a execución e xustificación da anualidade 2014 será o 30 de abril de 2014.

Santiago de Compostela, 12 de febreiro de 2013

P.D. (Resolución 2.7.2007; DOG nº 134, do 11 de xullo)
Antonio Crespo Iglesias
Director xeral da Axencia Galega de Desenvolvemento Rural