O Concello Pleno, en sesión que tivo lugar o 28 de xuño de 2013, acordou aprobar inicialmente o Plan xeral de ordenación municipal de Noia, redactado pola empresa Monteoliva Arquitectura, S.L.P.

De acordo co previsto no artigo 85.2 da Lei 9/2002, do 30 de decembro, de ordenación urbanística e protección do medio rural de Galicia (LOUPMR), o dito documento aprobado inicialmente con todos os documentos integrantes do expediente, incluído o informe de sustentabilidade ambiental, sométese a un período de consultas e de exposición ao público polo prazo de dous meses, contados a partir do día seguinte ao da publicación do anuncio no Diario Oficial de Galicia, durante o cal os interesados poderán examinalo e presentar cantas alegaciones xulguen convenientes, para o cal estará á súa disposición no Servizo Municipal de Urbanismo do Concello de Noia, en horario de atención ao público de luns a venres, das 10.00 ás 14.00 horas.

Conforme o establecido no artigo 77.2 da LOUPMR e 118.1 e 120.1 do Regulamento de planeamento urbanístico, suspéndese o outorgamento de licenzas naqueles ámbitos do territorio obxecto de planeamento cuxas novas determinacións supuxesen a modificación da ordenación urbanística vixente. As áreas afectadas pola suspensión son as que se determinan no informe e plano de suspensión de licenzas elaborados polo equipo redactor, denominado Resumo executivo e que consta no expediente. Segundo o devandito informe a suspensión abrangue as seguintes:

– A suspensión establécese nas áreas do solo que reflicte o plano número 2 do Resumo executivo, por ser evidente a contradición entre o réxime de ambos os planeamentos.

Polo tanto, nas áreas onde non se suspenden licenzas, estas poderán ser outorgadas consonte as seguintes condicións e para os seguintes ámbitos:

Solo urbano consolidado: poderanse outorgar licenzas nos ámbitos que o novo PXOM mantén subsistentes (APS) baixo a ordenación dos seus respectivos instrumentos de ordenación de desenvolvemento ou figuras específicas, e coas determinacións particulares que, de ser o caso, son introducidas nas correspondentes fichas de planeamento subsistente, nomeadamente os seguintes:

– APS-PERIC Casco histórico de Noia.

– APS-PP Polígono industrial de Augalevada.

– APS-U.A.3 San Lázaro.

Solo de núcleo rural: poderase outorgar licenza naqueles ámbitos de solo de núcleo rural baixo a aplicación da disposición transitoria primeira da Lei 9/2002 nos ámbitos das normas subsidiarias, mesmo cumprindo simultaneamente as condicións exixidas por ambas as normativas.

Solo rústico: poderase outorgar licenza naqueles ámbitos de solo rústico cumprindo simultaneamente o réxime previsto na Lei 9/2002 para o solo rústico, o disposto nas normas subsidiarias para o solo non urbanizable e o disposto no novo PXOM para o solo rústico.

En todo caso, o cumprimento simultáneo, cando xurda a dúbida de interpretación, resolverase consonte o disposto no artigo 6 da Lei 9/2002.

Noia, 1 de xullo de 2013

Rafael García Guerrero
Alcalde