Mediante o Acordo do Pleno do 5 de outubro de 2017, en sesión ordinaria, aprobouse definitivamente o Plan especial de protección do predio Altos de Torona, en Tomiño, o que se publica para os efectos dos artigos 82 e 88 da Lei 2/2016, do 10 de febreiro, do solo de Galicia, e nos artigos 199 e 208 do seu regulamento. O acordo literal é o seguinte:

• «Aprobar definitivamente o Plan especial de protección do Plan especial Altos de Torona, vista a tramitación do citado Plan, e o informe favorable á súa aprobación antes recollido, para o cal é necesario o quórum da maioría absoluta dos membros desta corporación.

• Publicar a aprobación definitiva no Diario Oficial de Galicia, para os efectos do establecido no artigo 82 da Lei 2/2016, do 10 de febreiro, do solo de Galicia. Esta publicación deberá realizarse no prazo dun mes desde a adopción da aprobación definitiva.

• Igualmente, publicarase a aprobación definitiva xunto coa normativa e as ordenanzas do Plan especial no Boletín Oficial da provincia.

• Comunicar o acordo de aprobación definitiva, en virtude do artigo 88 da Lei 2/2016, do 10 de febreiro, do solo de Galicia, á consellería competente en materia de urbanismo, para a súa inscrición no Rexistro de Planeamento Urbanístico de Galicia, e achegar un exemplar en soporte dixital, debidamente dilixenciado».

Así mesmo, estará á disposición dos interesados na sede electrónica deste Concello www.tomino.gal.

Contra o presente acordo, en aplicación do artigo 112.3 da Lei 39/2015, do 1 de outubro, do procedemento administrativo común das administracións públicas, e dado que aproba unha disposición de carácter xeral, poderá interporse recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contado desde o día seguinte ao da publicación, de conformidade co artigo 46 da Lei 29/1998, do 13 de xullo, da xurisdición contencioso-administrativa. Todo iso sen prexuízo de que poida interpoñer calquera outro recurso que se considere oportuno.

Tomiño, 18 de outubro de 2017

Sandra González Álvarez
Alcaldesa