O artigo 28.2 da Constitución española recoñece, como dereito fundamental da persoa, o dereito á folga. O exercicio deste dereito queda condicionado ao mantemento dos servizos esenciais definidos no artigo 2 do Decreto 155/1988, do 9 de xuño (DOG nº 116, do 20 de xuño).
A Confederación Intersindical (CI), o Sindicato Comisións de Base (CO.BAS), Alternativa Sindical de Trabajadores (AST), Intersindical de Aragón (IA), Sindicato Asambleario de Sanidade la Comunidad de Madrid (SAS), Sindicato Único de Trabajadores Solidaridad Obrera (SUTSO), a Central Sindical Independiente y de Funcionarios (CSIF), a Confederación General del Trabrajo (CGT), a Confederación Nacional del Trabajo (CNT) e o Sindicato de Oficios Varios daquela confederación en Vigo, a Unión General de Trabajadores (UGT), o Sindicato Nacional de Comisiones Obreras, a súas federacións de Enseñanza e Servicios y Sindicato Nacional de Comisiones Obreras de Galicia (CC.OO.), a Unión Sindical Obrera (USO), a Central Unitaria de Traballadores (CUT), o Sindicato Labrego Galego, o Sindicato Ferroviario-Intersindical, a Confederación Intersindical Galega (CIG), Erguer Estudantes da Galiza, e o Sindicato de Traballadoras e Traballadores do Ensino de Galiza (STEG), comunicaron diversas convocatorias de folga xeral con diversos tramos horarios para o día 8 de marzo de 2019, e que afectará todas as actividades e centros de traballo, tanto de empresas privadas como do sector público, con vínculo funcionarial, estatuario ou laboral, no ámbito territorial da Comunidade Autónoma de Galicia ou na Administración Exterior, e que se desenvolverá desde as 00.00 horas do 8 de marzo ata as 24.00 do mesmo día.
Non obstante, naquelas empresas, administracións e organismos que teñan varias quendas de traballo, o comezo da folga efectuarase na primeira quenda, aínda que empece antes das 00.00 horas do día 8 de marzo, e a súa finalización terá lugar unha vez rematada a última quenda, aínda que se prolongue despois das 24.00 horas do día 8 de marzo. Así mesmo, naquelas empresas, administracións e organismos que teñan unha única quenda de traballo pero que comence antes das 00.00 horas do día 8 de marzo, o paro iniciarase á hora de comezo da actividade laboral e finalizará o día 8 de marzo na hora en que conclúa esta.
Así pois, a necesaria conciliación entre o exercicio do dereito constitucional de folga e o mantemento dos servizos esenciais obriga esta Administración autonómica galega, de acordo coa normativa vixente, a fixar uns servizos mínimos indispensables para o funcionamento dos servizos esenciais, que se concretan neste decreto.
Desta forma, establécense servizos mínimos respecto dos sectores e actividades cuxa regulación é competencia dalgunha das consellerías da Xunta de Galicia e que poden afectar o desenvolvemento ordinario da actividade cidadá, no sentido do artigo 2 do Decreto 155/1988, do 9 de xuño, é dicir, sanidade, seguridade, protección civil, transportes e comunicacións, medios de comunicación social, rexistros públicos, edificios, bens e instalacións públicas, asistencia social e educación, servizos de vixilancia e extinción de incendios e bombeiros.
Os criterios determinantes para a fixación dos servizos mínimos establecidos no presente decreto tiveron en conta os distintos pronunciamentos do Tribunal Superior de Xustiza de Galicia en relación cos servizos esenciais fixados nas xornadas das anteriores folgas do 8 de xuño de 2010, do 29 de setembro de 2010, do 27 de xaneiro de 2011, do 29 de marzo de 2012, o 14 de novembro de 2012 e do 8 de marzo de 2018.
Aínda que é certo que o dito tribunal ditou sentenzas que anulaban as normas polas que se establecían os referidos servizos mínimos, non é menos certo que as ditas sentenzas viñeron motivadas fundamentalmente polo déficit de expresión da ponderación dos factores e criterios tidos en conta para a súa fixación, considerando insuficiente a motivación na determinación das prestacións mínimas garantidas.
Por todo isto, no caso concreto e tendo en conta os pronunciamentos anteriores, preténdense dar a coñecer máis xustificadamente, se cabe, os criterios en virtude dos cales se procedeu a identificar os servizos mínimos como esenciais e a determinar os efectivos necesarios para aseguralos á luz da presente convocatoria de folga. Todo isto observando a necesaria proporción entre o sacrificio para o dereito dos traballadores e os bens e intereses que se teñen que salvagardar.
Ademais da xustificación concreta e pormenorizada que se establece nos parágrafos seguintes, debe sinalarse que, con carácter residual e atendendo ás circunstancias particulares concorrentes en que se desenvolve esta convocatoria de folga, determínanse nalgún caso como servizos mínimos aqueles que non exceden o número de persoas que normalmente permanecen neles con ocasión dun domingo ou día festivo, salvo que se trate de órganos que tales días permanezan pechados, caso en que se terá que atender ás quendas establecidas para os sábados. Este criterio, é incorporado e tido en conta, como xa se sinalou, con carácter residual en ámbitos concretos de actividade á hora de garantir os servizos esenciais para o vindeiro 8 de marzo, tal e como se particulariza e xustifica en relación cos servizos fixados a través desta norma reguladora.
Tense en conta, igualmente, o feito de que a folga se desenvolverá unicamente durante un período dun día, coas matizacións correspondentes ás quendas de traballo que comecen antes das 00.00 horas e rematen despois das 24.00 horas.
• No ámbito da Presidencia da Xunta de Galicia, e dependendo da Secretaría Xeral para o Deporte, o Centro Galego de Tecnificación Deportiva ten ao seu cargo diariamente 94 deportistas residentes menores de idade e baixo a responsabilidade directa da Xunta de Galicia, e entre as súas obrigas con eles/elas está darlles o almorzo, o xantar, a cea e o coidado durante a súa pernoita. Xunto a estes/as deportistas, tamén comen no CGTD 60 deportistas externos, 12 deportistas residentes maiores de 18 anos e 21 adestradores/as.
A atención indispensable que é debida a estes/estas residentes menores de idade xustifica plenamente os servizos mínimos necesarios para o mantemento das instalacións operativas e accesibles aos/ás menores residentes, a preparación do almorzo, xantar e cea e o coidado dos/das menores polo menos fóra do horario de clase.
Á vista dos tramos horarios das distintas convocatorias de folga o vindeiro 8 de marzo, tívose en conta para o establecemento dos servizos mínimos indispensables a circunstancia de que a actividade desenvolvida os venres pola tarde non é a mesma que o resto dos días da semana. Os venres pola tarde marchan para a súa casa os residentes menores de idade, e é precisa a supervisión da recollida destes e que se verifique e se asinen as súas saídas. En consecuencia, polo que se refire á xornada de tarde, estabécense os servizos mínimos imprescindibles para o desenvolvemento desta actividade de supervisión e non se considera indispensable a presenza de persoal de cociña ou de limpeza durante a xornada de tarde.
Redes de Telecomunicación Galegas Retegal, S.A. garante a atención de emisores e reemisores para conseguir a cobertura do sinal de comunicación audiovisual, a continuidade da rede de emerxencias e a conectividade da Xunta de Galicia.
Redes de Telecomunicación Galegas Retegal, S.A. é a sociedade mercantil pública autonómica cuxo obxecto social, de acordo cos seus estatutos, é:
«1. […] a realización de actividades dirixidas á prestación de servizos en materia de telecomunicacións na Comunidade Autónoma de Galicia, para as que obterá os títulos habilitantes que sexan necesarios en cada caso.
Así mesmo, terá por obxecto tanto a planificación, instalación, xestión, mantemento e explotación de infraestruturas, sistemas e servizos de telecomunicacións en Galicia, como a elaboración de propostas, análises e estudos relacionados coas telecomunicacións que correspondan á Comunidade Autónoma de Galicia.
2. En particular constituirán parte do obxecto social as seguintes actividades:
a) A promoción, planificación, deseño, construción, conservación, mantemento, dotación de equipamento e explotación, por si mesma ou mediante terceiros, de toda clase de infraestruturas e servizos de telecomunicacións que sexan promovidas pola Comunidade Autónoma de Galicia ou en que esta participe, vinculadas ao ámbito das telecomunicacións».
Para o desenvolvemento das súas funcións, Retegal conta con seis (6) centros emisores-San Marcos-O Pedroso-Santiago de Compostela (A Coruña), A Bailadora-Ares (A Coruña), Domaio-Moaña (Vigo), Xistral-Vilalba (Lugo), O Páramo-Sarria (Lugo), Meda-Montederramo (Ourense)-e cun Centro de Xestión e Atención de Rede –CEXAR–.
Os traballadores prestan servizos nestes centros, ininterrompidamente, 24 horas ao día, os 365 días do ano, en horario presencial no CEXAR. Nos centros emisores, préstanse servizos ininterrompidamente as 24 horas do día, os 365 días do ano, e parte é en horario presencial e parte en dispoñibilidade (gardas).
Resulta necesaria a presenza ou atendemento (dispoñiblidade) dos referidos centros permanentemente, coa finalidade de asegurar as prestacións de servizos contratadas.
Polo exposto, Retegal debe asegurar a presenza dun traballador, polo menos, en cada centro emisor e no CEXAR.
Polos servizos esenciais que presta Retegal, que non son obxecto de discrepancia, no centro de San Marcos, nas oficinas centrais de Retegal, en todo momento debe haber, ao menos, un enxeñeiro/a do departamento técnico de garda (soporte nivel 2), imprescindible para atender as incidencias que non poden ser resoltas polo persoal dos centros emisores.
A inclusión de catro técnicos/as no CEXAR obedece a que o horario da xornada de folga comeza ás 00.00 horas, e inclúese, polo tanto, o persoal que inicia a súa xornada o día 7 de marzo ás 22.30 horas.
• No ámbito da Vicepresidencia e Consellería de Presidencia, Administracións Públicas e Xustiza cómpre a fixación de servizos mínimos no funcionamento dos rexistros administrativos, tanto nos servizos centrais como nos servizos periféricos, garantindo as actuacións da cidadanía cuxo incumprimento pode supor a perda ou prexuízo dos seus dereitos. Considérase, así mesmo, esencial o mantemento dos edificios administrativos co obxecto de garantir o correcto funcionamento das súas instalacións nas posibles situacións de emerxencia que puideren acontecer.
No ámbito da Administración de xustiza, de conformidade coa doutrina do Tribunal Constitucional e coa xurisprudencia ditada na materia, e en particular coa Sentenza 463/2018, do 7 de novembro, do Tribunal Superior de Xustiza de Galicia, considéranse servizos esenciais necesarios para garantir o servizo público:
1. Servizos de garda de xulgados, fiscalías e Instituto de Medicina Legal.
2. Xuízos orais na orde penal de causas con preso.
3. Medidas precautorias ou provisionais en materia de familia, de violencia sobre a muller e de liberdade provisional, entre outras.
4. Actuacións relativas á violencia de xénero nos xulgados de violencia sobre a muller, sexan ou non exclusivos.
5. Actuacións urxentes do Rexistro Civil, tales como a expedición de licenzas de enterramento, entre outras.
6. Rexistro de asuntos e documentos en que venza un prazo preestablecido por lei e cuxo vencemento poida deparar perda de dereitos á cidadanía, así como a atención daquelas actuacións en que venza un prazo improrrogable establecido na lei cuxo incumprimento poida afectar o dereito da tutela xudicial efectiva e aquelas cuxa urxencia veña determinada polas leis procesuais ou polos bens xurídicos en xogo.
Así mesmo, a Administración ten en conta igualmente, para a fixación dos servizos mínimos, os criterios determinantes que establece a doutrina do Tribunal Constitucional e a xurisprudencia contencioso-administrativa.
Para garantir a prestación dos anteditos servizos esenciais, por tanto, establécense os servizos mínimos que se concretan no articulado, para o que se ten en conta a extensión territorial e temporal da folga convocada, as distintas funcións dos distintos corpos, así como a existencia de órganos especializados nalgunhas cidades, entre outros.
Así mesmo, debe terse en conta que, de producirse durante a xornada de folga algunha das actuacións urxentes ou esenciais das establecidas polo artigo 42 do Regulamento 1/2005, do Consello Xeral do Poder Xudicial, dos aspectos accesorios para as actuacións xudiciais ou pola normativa procesual correspondente, estas non poderían ser atendidas polo xulgado de garda, dado que o xulgado competente está en horas de audiencia, motivo este polo que é preciso dispoñer dun mínimo de persoal nos distintos órganos xudiciais que figuran no articulado para atender ás actuacións urxentes e inaprazables, sen vulnerar a atribución de competencias previstas nas correspondentes leis procesuais e no citado Regulamento 1/2005. Cómpre sinalar, a modo de exemplo, as seguintes: autorización de medias precautorias ou de permisos extraordinarios polo Xulgado de Menores; medidas sanitarias urxentes de saúde pública, medidas precautorias en materia de estranxeiría, asilo político e refuxiado que impliquen expulsión, devolución ou retorno polos xulgados do contencioso-administrativo; a celebración de vistas que poidan afectar os dereitos dos traballadores e traballadoras, tales como as demandas de tutela de dereitos fundamentais e liberdades públicas, e as actuacións declaradas urxentes pola lexislación procesual, tales como medidas cautelares necesarias para asegurar a efectividade da tutela xudicial polos xulgados do social.
Por outra banda, e na determinación do concreto número de efectivos de servizos mínimos que se establecen no articulado, téñense en conta as distintas funcións que corresponden a cada corpo funcionarial, establecidas polos artigos 476 e seguintes da Lei orgánica 6/1985, do 1 de xullo, do poder xudicial, que fan necesaria, na determinación dos efectivos que deben atender os servizos esenciais en cada órgano, a concorrencia de persoal dos distintos corpos, imprescindible para garantir estes servizos esenciais.
Neste sentido, o persoal funcionario do corpo de auxilio xudicial, polas súas funcións, non se considera preciso para garantir os servizos esenciais en determinados órganos, como no caso do Imelga ou rexistros civís principais ou delegados, ou ben esta Administración entende suficiente, noutros supostos, que a persoa funcionaria designada servizo mínimo sexa compartida por distintos xulgados ou seccións dos tribunais. Só naquel suposto en que exista un único órgano por xurisdición, como sucede nos xulgados exclusivos de violencia sobre a muller, se considera necesaria a fixación dun auxilio xudicial en cada órgano.
Por outra banda, e para a maior protección do dereito fundamental de folga, esta Administración considera, con respecto ao persoal funcionario do corpo de xestión e tramitación, que os servizos esenciais que se produzan nesta única xornada de folga poden ser atendidos coa presenza dunha única persoa funcionaria, que poderá designarse, en consecuencia, tanto dun corpo como doutro.
Respecto dos órganos xudiciais que estean de garda, e polo carácter esencial do servizo prestado nas citadas circunstancias, esta Administración entende que a dotación mínima necesaria é o equipo de persoal que presta o servizo de garda.
En conclusión, por tanto, no ámbito da Administración de xustiza, como regra xeral, e en prol da protección do dereito de folga, non se fixan servizos mínimos naqueles órganos que non atenden servizos esenciais nesta xornada única de folga, e sí se establecen naqueles que si os atenden, as dotacións mínimas de persoal necesario para que os poidan garantir e, neste sentido, non se designa persoal funcionario do corpo de auxilio xudicial nalgúns órganos nin comparten estas persoas funcionarias dos distintos órganos xudiciais e, con respecto ao persoal funcionario dos corpos de xestión ou tramitación, establécese a suficiencia dunha persoa funcionaria dos citados corpos por órgano, de forma alternativa. Finalmente, nesta mesma liña, naqueles órganos que prestan servizo de garda estableceuse que sexan estes equipos de garda os que atendan tamén os servizos mínimos.
Entrando xa na concreta xustificación que motiva o número de efectivos establecidos para cada tipo de órgano ou xurisdición, sinálase que:
Na Secretaría de Goberno do Tribunal Superior de Xustiza, a xustificación da necesidade de establecer servizos mínimos radica, particularmente, no feito de ser o órgano que se encarga das apostilas. Polo que respecta ao número de efectivos establecido, é o mínimo indispensable para garantir a atención do servizo esencial, unha única persoa funcionaria, que ben pode ser do corpo de xestión ou ben de tramitación.
Polo que respecta ás seccións penais e mixtas das audiencias provinciais, a xustificación estriba na necesidade de atender, entre outras, as seguintes cuestións que se relacionan a título non exhaustivo: rexistro de asuntos en que venza un prazo preestablecido por lei cuxo incumprimento poida supor perda ou prexuízo de dereitos á cidadanía, actuacións en que venza un prazo improrrogable e preestablecido na lei cuxo incumprimento poida afectar a tutela xudicial efectiva, atención de sala en causas con preso, medidas cautelares (prisión provisional, liberdade provisional), en materia de dereito de familia, incluídas as derivadas dos xulgados de violencia sobre a muller, ou actuacións en execución de sentenza que afecten dereitos fundamentais (liberdades).
No caso dos xulgados do penal, a xustificación fundaméntase na necesidade de garantir, entre outras, as actuacións que se describen a seguir a título exemplificativo: a celebración de xuízos orais en causas con preso, asegurando deste xeito as vistas con preso sinaladas, así como atender aquelas actuacións en que venza un prazo preestablecido na lei cuxo incumprimento poida supor perda ou prexuízo de dereitos aos cidadáns, dilixencias urxentes e asuntos de violencia de xénero.
O número de efectivos establecido, tanto nas seccións penais e mixtas das audiencias provinciais como nos xulgados do penal é o mínimo indispensable para garantir a atención do servizo esencial nun órgano xudicial, dado que se designa unha única persoa funcionaria por sección/xulgado, que ben pode ser do corpo de xestión ou ben de tramitación, e unha persoa funcionaria de auxilio, compartido, por cada dúas seccións/dous xulgados.
Nos xulgados de menores, a xustificación estriba na necesidade de atender, entre outras, as seguintes cuestións que se relacionan a título non exhaustivo: actuacións en que venza un prazo preestablecido na lei cuxo incumprimento poida supor perda ou prexuízo de dereitos aos menores, adopción de medidas cautelares ou provisionais urxentes (internamentos de menores…), celebración de vistas con un/unha menor suxeita a medida de internamento ou tramitación de permisos extraordinarios. Respecto da concreta dotación dos servizos mínimos, establécese neste suposto a dotación mínima: 1 persoa funcionaria, que ben pode ser de xestión ou ben de tramitación.
Nos xulgados de violencia sobre a muller, a xustificación fundaméntase na necesidade de atender, entre outras, as cuestións que se describen a seguir a título exemplificativo: actuacións en que venza un prazo preestablecido na lei cuxo incumprimento poida supor perda ou prexuízo de dereitos á cidadanía, adopción de medidas cautelares ou provisionais urxentes en materia de familia ou de violencia sobre a muller, ou causas con detido na materia. O número de efectivos establecido é o mínimo indispensable para garantir a atención do servizo esencial nun órgano xudicial, dado que se designa unha única persoa funcionaria por órgano, que ben pode ser do corpo de xestión ou ben de tramitación e, no tocante ao persoal funcionario de auxilio xudicial, establécese unha persoa funcionaria como servizo mínimo, dado que non existe máis dun xulgado deste tipo na mesma localidade.
Nos xulgados de instrución de garda, así como nos xulgados de primeira instancia e instrución de garda, establécese que os servizos mínimos estarán atendidos polo equipo de persoal que presta o servizo de garda, dado que a xustificación estriba precisamente na necesidade de atender as actuacións que xorden durante o servizo de garda que teñen carácter esencial como, entre outras, as seguintes a modo de exemplo: actuacións con detido ou actuacións inaprazables, como a adopción de medidas cautelares urxentes.
Nos xulgados do contencioso-administrativo, a motivación reside na necesidade de atender, entre outras, as seguintes cuestións que se relacionan a modo de exemplo: actuacións en que venza un prazo preestablecido na lei cuxo incumprimento poida supor perda ou prexuízo de dereitos á cidadanía, adopción de medidas cautelares ou provisionais urxentes como medidas sanitarias urxentes de saúde pública, medidas precautorias en materia de estranxeiría, asilo político e refuxiado que impliquen expulsión, devolución ou retorno, procesos de tramitación preferente ou en materia de dereitos fundamentais.
Nos xulgados do social, a xustificación radica na necesidade de atender, entre outras, as cuestións que se relacionan a seguir sen ánimo exhaustivo: actuacións en que venza un prazo preestablecido na lei cuxo incumprimento poida supor perda ou prexuízo de dereitos á cidadanía, asegurando desta forma a celebración de vistas que poidan afectar os dereitos dos traballadores e das traballadoras, tales como as demandas de tutela de dereitos fundamentais e liberdades públicas, actuacións declaradas urxentes pola lexislación procesual, tales como medidas cautelares necesarias para asegurar a efectividade da tutela xudicial.
Nos xulgados de familia exclusivos e xulgados de primeira instancia con competencia en materia de familia, a motivación descansa na necesidade de atender, entre outras, as cuestións que se relacionan a seguir a título exemplificativo: actuacións en que venza un prazo preestablecido na lei cuxo incumprimento poida supor perda ou prexuízo de dereitos á cidadanía, internamentos urxentes, medidas cautelares ou outras actuacións inaprazables, como as medidas de protección de menores.
Nos xulgados do mercantil exclusivos e xulgados de primeira instancia con competencia en materia mercantil, a xustificación radica na necesidade de atender, entre outras, as cuestións que se relacionan a seguir sen ánimo exhaustivo: rexistro de asuntos en que venza un prazo preestablecido por lei cuxo incumprimento poida supor perda ou prexuízo de dereitos á cidadanía, actuacións en que venza un prazo improrrogable preestablecido na lei cuxo incumprimento poida afectar a tutela xudicial efectiva, tales como medidas cautelares ou provisionais urxentes en materia mercantil, embargos preventivos de buques, medidas cautelares cuxa demora dificulte a efectividade da tutela xudicial, tales como en materia de patentes e relacionadas coa propiedade intelectual e industrial, ou despedimentos colectivos en sede concursal.
Respecto da concreta dotación dos servizos mínimos dos anteditos xulgados do contencioso-administrativo, do social, de familia exclusivos e de primeira instancia con competencia en materia de familia, así como os mercantís exclusivos ou xulgados de primeira instancia con competencia en materia mercantil; a dotación establecida é a mínima de que se parte naqueles órganos que atenden servizos esenciais: un funcionario por órgano, que ben pode ser de xestión ou ben de tramitación, para garantir o dereito de folga do persoal, e un auxilio xudicial compartido por cada dous xulgados ou fracción.
Nos xulgados de vixilancia penitenciaria, a xustificación estriba na necesidade de atender entre outras, as cuestións que se relacionan a seguir a título non exhaustivo: actuacións en que venza un prazo preestablecido na lei cuxo incumprimento poida supor perda ou prexuízo de dereitos aos internos, tutelar os dereitos das persoas presas, administración forzosa de medicación ou alimentación, intervencións corporais coactivas, permisos extraordinarios ou libertade condicional en caso de perigo de morte. Respecto do número de efectivos establecido é o mínimo indispensable para garantir a atención do servizo esencial nun órgano xudicial, unha única persoa funcionaria por órgano, que ben pode ser do corpo de xestión ou ben de tramitación e, no tocante ao persoal funcionario de auxilio xudicial, establécese unha persoa funcionaria como servizo mínimo, dado que non existe máis dun xulgado deste tipo na mesma localidade.
Nas oficinas de fiscalías, así como nas subdireccións territoriais do Instituto de Medicina Legal, a dotación que prestarán os servizos mínimos serán os/as funcionarios/as que presten o servizo de garda. No caso das oficinas de fiscalías, esta decisión fundaméntase na necesidade de atender as actuacións que xorden durante o servizo de garda que teñen carácter esencial como, entre outras, as seguintes a título de exemplo: garantir as medidas cautelares ou provisionais urxentes en materia de familia, de menores, de violencia sobre a muller e de liberdade provisional. No caso das subdireccións territoriais do Instituto de Medicina Legal, fundaméntase na necesidade de garantir o servizo que lles é propio na materia, a prestación do servizo de garda, a asistencia médico-forense ao xulgado de garda, o levantamento de cadáveres, a asistencia a detidos e a vítimas de violencia de xénero ou asistir nos internamentos, entre outros.
Nos rexistros civís principais e delegados, e coa finalidade de atender as actuacións que teñan carácter esencial, como as que se describen a seguir a título exemplificativo: as inscricións de defunción, inscricións de nacemento en prazo perentorio ou os certificados de defuncións; establécese o número de efectivos mínimo indispensable, designando unha única persoa funcionaria por órgano, que ben pode ser do corpo de xestión ou ben de tramitación.
Por último, e tanto nas oficinas de rexistro e repartición e nos decanatos dos xulgados que realizan as ditas funcións, como nos servizos comúns de atención á cidadanía e á vítima, establécese que atenderán os servizos mínimos a dotación mínima indispensable para garantir a atención do servizo esencial nun órgano xudicial: 1 xestor/a ou 1 tramitador/a. A xustificación nas oficinas de rexistro e repartición e nos decanatos dos xulgados que realizan as ditas funcións radica no feito de que se trata dun servizo que ten encomendada, entre outras funcións principais, a da recepción de demandas e escritos dirixidos a todos os órganos xudiciais do partido xudicial, o que podería afectar a tutela xudicial efectiva, especialmente se se trata do vencemento dun prazo preestablecido na lei. No caso do servizos comúns de atención á cidadanía e á vítima, a decisión vén motivada polo feito de que se trata dun servizo que ten encomendada, entre outras funcións principais, a da asistencia ás vítimas de delitos.
Posto que a Dirección Xeral de Emerxencias e Interior presta servizo ao Centro de Atención ás Emerxencias 112, os mínimos propostos establécense coa mesma intensidade ca un domingo ou festivo.
Na Dirección Xeral de Avaliación e Reforma Administrativa permanecerá 1 auxiliar administrativo/a para efectos da captura dos datos de seguimento da folga.
Polo que respecta ao servizo prestado desde o Centro Integrado de Atención ás Emerxencias 112 Galicia (en diante, CIAE 112) ten carácter fundamental e esencial para a cidadanía. O volume de chamadas ou atención requirida depende das emerxencias acaecidas, catástrofes, accidentes e demais situacións de urxencia que teñen, por definición, carácter imprevisible, polo que o servizo debe estar suficientemente dimensionado para atendelas.
O número de traballadores/as que se establece como servizos mínimos, dadas as características do servizo dispensado polo CIAE 112 de Galicia, resulta imprescindible para manter a axeitada cobertura na atención das emerxencias e para evitar que se produzan graves prexuízos á poboación.
Na fixación dos servizos mínimos pártese do feito de que o CIAE 112 funciona as 24 horas do día, 7 días á semana e os 365 días do ano. A carga de traballo ao longo dunha xornada vén determinada, en primeiro lugar, polo número de incidencias que se produzan e a cantidade de chamadas que efectúe a cidadanía ao número 1-1-2 ante as cales o servizo, como se sinalou, debe contar co número de profesionais suficiente para prestar a atención que se demanda.
Tívose en conta para o dimensionamento o feito de que o día 8 de marzo é un venres, sendo este o día intersemanal en que se rexistra un maior número de requirimentos ao 112 (os venres son días en que se producen maior número de saídas coincidindo co comezo da fin de semana, así como un incremento de desprazamentos en coche, co aumento do risco de accidentes e incidencias nas estradas etc.), así no ano 2018 rexistráronse de media 2.747 chamadas e atenderonse 643 incidencias, mentres que un martes rexistráronse de media 2.617 e 589 respectivamente.
Ao anterior engádese o feito de que unha xornada de folga non é como calquera día habitual desde o punto de vista das emerxencias que poidan acontecer, posto que pode incrementarse o número de incidencias con respecto a un día laborable común (maior concentración de persoas en determinados puntos e actividades diferentes ás de calquera outra xornada).
Igualmente, tívose en conta que actualmente se atopan integrados no CIAE 112, na súa sede da Estrada, a Fundación Pública Urxencias Sanitarias de Galicia-061 (que se trasladou no mes de outubro de 2018) e a Unidade de Policía Adscrita á Comunidade Autonóma-UPA (desde xullo de 2018), o que incide nos labores de xestión tecnolóxica.
Tendo en conta estas circunstancias, no seu conxunto, na área do 112 establécense uns servizos mínimos que son mesmo inferiores ao dimensionamento dun sábado ou un domingo.
Cómpre sinalar ademais que desde o 112, ademais da prestación de asistencia ás persoas que a requiren ante situacións de urxencia, desenvólvense outros servizos como a difusión de información á cidadanía por exemplo ante situacións de risco, sendo un medio fundamental as redes sociais e a web do 112, que permiten trasladar información dotada de inmediatez, veraz e contrastada, o que constitúe unha ferramenta de autoprotección das persoas ante situacións de emerxencia que poidan acontecer.
Por canto antecede, e atendido o carácter esencial deste servizo público, establécense os servizos mínimos, determinados en función das diversas categorías do persoal en cada quenda de traballo, posto que as funcións e traballo que cada unha leva a cabo, pola súa especialidade, non é substituíble ou intercambiable por outra. Neste senso cómpre salientar que:
O persoal de estrutura do CIAE 112 está composto polas seguintes categorías de persoal: xefatura de xestión operativa; formación; comunicación, prensa e imaxe; calidade, protocolos e documentación.
En primeiro lugar, dentro do denominado persoal de estrutura, atopamos os efectivos da xefatura de xestión operativa. Debemos salientar que esta figura é fundamental na prestación do servizo, posto que está relacionada coa xestión de recursos humanos). No caso de producirse calquera tipo de problema durante as xuntanzas ou concentracións que se leven a cabo durante o día 8 de marzo (organizadas en horarios de mañá e tarde), se resultase preciso incrementar o número de operadores na sala por un incremento de chamadas por situacións de emerxencia, entraría esta figura do persoal de xefatura de xestión operativa, facendo en primeira instancia tamén labores de apoio á operación ata que cheguen os reforzos necesarios. Ademais, levan o control de actuación e incidencias do CIAE 112, así como a dirección e avaliación dos resultados. Esta categoría debe contar con presenza no centro durante a mañá e a tarde, por se resultar preciso levar a cabo un redimensionamento na sala ante unha situación de emerxencia que o faga necesario (máis tendo en conta que se trata dunha xornada de folga en que, como se dixo previamente, se desenvolven concentracións de persoas e demais circunstancias que fan necesario atoparse preparados para calquera posible eventualidade que se poida producir relativa á seguridade das persoas. A xefatura de xestión operativa realiza a coordinación, o control e a supervisión das tarefas realizadas polo persoal de sala e encárgase de verificar o adecuado dimensionamento. Entre as súas funcións podemos destacar o control de cumprimento das funcións; a detección da necesidade de activación de recursos extraordinarios aos previstos, elevándoa á decisión da Xerencia da AXEGA; a modificación dos procedementos de actuación da sala de operacións do CIAE 112; a xestión das solicitudes de particulares, organismos e/ou colaboradores externos (xulgados, forzas e corpos de seguridade etc); e a adecuación dos recursos materiais e humanos necesarios para garantir o correcto servizo á cidadanía. As funcións do persoal de xefatura de xestión operativa non poden ser desenvolvidas por ningún outro persoal.
Dentro do persoal de estrutura atopamos tamén a área de Comunicación, Prensa e Imaxe. A tarefa principal deste departamento céntrase na relación do CIAE 112 Galicia cos medios de comunicación, para os efectos de facilitar a información necesaria requirida por eles. As súas funcións non son intercambiables con outra categoría de persoal. O persoal de prensa e comunicación encárgase, entre outras tarefas, da actualización de información a través das redes sociais do 112 (actividade nova que comezou o seu funcionamento no mes de maio de 2018). As redes sociais son unha canle fundamental para facer chegar a información á cidadanía, sendo especialmente relevante nunha xornada de folga, na cal se ten que dar puntual conta de datos relacionados con posibles incidencias de seguridade ou situacións de urxencia que poidan acaecer, e é ademais, a canle mais axeitada pola súa inmediatez para informar a aquelas persoas que se atopen participando en manifestacións ou concentracións convocadas nesa xornada. A xestión das redes como vías directas de transmisión de información á cidadanía, así como a atención a medios no caso de que suceda algunha incidencia, supón que deba contarse cunha persoa localizada en cada quenda de traballo, posto que pode ser preciso atender a demanda de información sobre mobilización de recursos ou informacións sobre asistencias que poidan ser precisas ante situacións ou eventualidades que teñan lugar durante as manifestacións, concentracións, etc. As anteditas funcións xustifican os servizos mínimos establecidos para o persoal desta categoría do CIAE 112.
Finalmente, dentro do persoal de estrutura atópanse tanto os efectivos de Calidade, Protocolos e Documentación, como o correspondente a área de Formación, respecto dos cales non se sinalan servizos mínimos, atendido o carácter das súas funcións.
Respecto da área de Coordinación, debemos sinalar que o/a coordinador/a ten por finalidade o control da correcta xestión telefónica por parte da área de operación telefónica do CIAE 112. Supervisa e asesora os/as operadores/as se a emerxencia é de certa entidade e, en atención á súa cualificación, leva a cabo a coordinación, supervisión e seguimento directo da actividade dos/das operadores/as, aos/ás cales presta o seu asesoramento cando a situación o require. Deste xeito, non contar con esta figura dificultaría o correcto desenvolvemento do servizo e afectaría o labor dos/das operadores/as, que non poderían tomar determinadas decisións ante unha emerxencia nas debidas condicións de rapidez e eficacia. Entre as súas funcións podemos destacar: o seguimento das incidencias e dos recursos mobilizados pola sala de operacións do CIAE 112, en especial daquelas situacións de emerxencia que poidan dar lugar á activación dalgún plan; o control da recepción, resposta e atención de chamadas recibidas; o control da tipificación e xestión das chamadas, así como a confirmación da aplicación dos procedementos e das tácticas operativas; seguimento das incidencias ata o seu peche. Os/as coordinadores/as toman a decisión da conversión da actividade de xestión na sala ao modelo de «sala partida» en momentos de alta actividade, creando grupos de traballo compartimentados dentro dos/as operadores/as e aumentando as súas función e tarefas de xeito propocional a este incremento. Por canto antecede, atendendo á súa cualificación e especialización, a figura do coordinador/a non resulta substituíble por outra categoría de persoal do CIAE 112.
Os/as operadores/as de enlace son persoal cualificado ao cal lle corresponde recibir as chamadas dos/das xefes/as dos servizos de emerxencias e demais organismos e autoridades públicas para coordinar actuacións, evitando que estas chamadas pasen ao resto de operadores/as que están recibindo as chamadas da cidadanía. A iso súmase que lles corresponde facer o seguimento dos fenómenos meteorolóxicos adversos e da documentación precisa para o envío das distintas alertas ou avisos. O enlace tamén informa e asiste o técnico de garda do CIAE 112, non só nas emerxencias ordinarias de certa envergadura, senón tamén naquelas que acadan niveis de gravidade importante en que sexa necesaria a activación de plans e toma de medidas extraordinarias, de acordo cos procedementos daquel. Os/as operadores/as de enlace son persoal con especialización nas súas funcións, que non poden ser desempeñadas por ningún outro/a operador/a.
Os/as operadores/as de atención telefónica constitúen a peza básica do sistema de xestión de chamadas de emerxencia. A súa función consiste na recepción das chamadas, a recollida dos datos precisos, a tipificación das incidencias e a súa transmisión aos organismos implicados na mobilización de recursos. Son os/as operadores/as os que, a través da aplicación de xestión de emerxencias, teñen que conseguir xestionar no menor tempo posible unha situación de emerxencia, desde a chamada inicial. De non contar co suficiente persoal desta categoría, poríase en risco o funcionamento do servizo. Se non existisen operadores/as telefónicos/as suficientes, o servizo prestado polo 112 carecería do primeiro e fundamental elo da cadea. Sería imposible funcionar segundo os estándares mínimos de rapidez e eficacia exixibles nun centro desta natureza cun dimensionamento inferior ao establecido, atendendo ao número diario de chamadas que, de media, se reciben no número 112. Neste caso, redúcense os efectivos ao 80%, o que supón un número de efectivos incluso inferior ao establecidos para un domingo.
Por último, o persoal de soporte técnico (Área de Informática do CIAE 112) resulta fundamental, dada a especificidade e criticidade dun centro como o CIAE 112 e atendidas as características e complexidade da plataforma de xestión de emerxencia. Trátase de persoal formado e especializado e é imprescindible, cando menos, a súa dispoñibilidade (estar localizables) para resolver calquera incidencia, avaría ou eventualidade de tipo técnico que poida xurdir, máxime tendo en conta que actualmente no CIAE 112 se integraron novos servizos no edificio da Estrada (a do 061, que tivo lugar no mes de outubro de 2018, e a da UPA).
Por tanto, no seu conxunto, na área do 112 establécense unhs servizos mínimos que son mesmo inferiores ao dimensionamento dun sábado ou un domingo.
• No ámbito da Consellería de Facenda, no Centro Informático para a Xestión Tributaria, Económico-Financeira e Contable (Cixtec) a designación de servizos mínimos vén exixida pola necesidade de poder solucionar posibles incidencias técnicas co suficiente grao de eficacia que permite o mantemento básico dos servizos.
O Cixtec é o órgano encargado de prestar apoio informático aos servizos da Consellería de Facenda e, especialmente, ten asignadas as funcións de xestión dos procesos de natureza informática, tributaria, contable, orzamentaria e económico-financeira.
Todos os sistemas de información deben ser mantidos operativos as 24 horas do día, pero especialmente críticos son os de natureza tributaria, a que no caso de que se paralizasen, repercutiría moi gravosamente nos cidadáns que se verían impedidos para presentar dentro dos prazos establecidos calquera escrito, alegación ou recurso ante os órganos tributarios da Comunidade Autónoma.
Isto implicaría un grave prexuízo para o cidadán, xa que afectaría o seu dereito fundamental de defensa, que repercutiría, así mesmo, na responsabilidade patrimonial da Administración ante as posibles reclamacións dos usuarios.
De igual forma, é imprescindible que o Sistema informático de licitación electrónica da Xunta de Galicia (Silex), como medio necesario para a presentación de propostas nos expedientes de contratación que xestiona a Xunta de Galicia, estea en todo momento en condicións óptimas de funcionamento, xa que os licitadores poderían verse afectados por incidencias nos trámites de prazos preclusivos, que afectarían de forma grave e irrecuperable a presentación das ofertas.
De acordo co exposto, os servicios mínimos do Cixtec establécense para dar o máis esencial cumprimento ás posibles incidencias nos diferentes sistemas de información da Consellería de Facenda, de tal xeito que se poida atender aos requirimentos máis básicos respectando o dereito á folga dos traballadores.
Neste sentido, cabe sinalar que os servizos mínimos establecidos supoñen un 0,9 % respecto ao total de traballadores do centro, polo que se fixa como servizos mínimos
un/unha analista-programador/a.
• No marco das competencias atribuídas á Consellería de Medio Ambiente Territorio e Vivenda en materia de xestión de residuos, cómpre a fixación de servizos mínimos na Sociedade Galega de Medio Ambiente, empresa que ten encomendada a xestión dos residuos sólidos urbanos a partir do seu depósito nas estacións de transferencia ou plantas de tratamento, conforme sinala o artigo 10 da Lei 10/2008, do 3 de novembro, de residuos de Galicia, xa que a parada das instalacións centrais de Sogama (motores, caldeiras e turbinas) e plantas de transferencia, en caso de non se fixaren servizos mínimos, imposibilitaría directamente a prestación dos servizos esenciais, o que ocasionaría graves consecuencias ambientais e de saúde pública, e desde a base de que estes servizos mínimos afectan o menor persoal que o que estaría operativo en sábados, domingos ou festivos.
No ámbito de competencias da conservación da natureza, cómpre a fixación duns servizos mínimos que garantan o adecuado desenvolvemento da xestión dos recursos naturais e cinexéticos, considerando indispensable a presenza de persoal dos espazos naturais protexidos e da biodiversidade, dada a especial protección que requiren tanto os bens como os recursos naturais existentes nestes espazos. Así mesmo, tamén se tiveron en conta as necesidades mínimas de funcionamento, sen colapso, dos centros de recuperación da fauna salvaxe, piscifactorías e demais centros de fauna. Constitúe esta proposta o persoal mínimo para poder cubrir as continxencias que poidan acontecer en cada distrito, parque natural e nos centros de traballo da Dirección Xeral que, polas súas características especiais, precisen dunha atención instantánea.
No que atinxe ao ámbito concreto do Parque Nacional Marítimo Terrestre das Illas Atlánticas de Galicia, cómpre fixar uns servizos mínimos que poidan atender unha eventual situación de urxencia nas illas, tendo en conta que son catro arquipélagos (Cíes, Ons, Sálvora e Cortegada).
• No marco das competencias atribuídas á Consellería de Infraestruturas e Mobilidade no sector do transporte, cómpre distinguir:
A) Servizos públicos de transporte regular de viaxeiros de uso xeral por estrada:
Neste tipo de servizos cómpre ter en consideración que a Lei 2/2017, do 8 de febreiro, de medidas fiscais, administrativas e de ordenación, previu a integración de diferentes tipos de servizos da competencia da Xunta de Galicia.
No marco desta previsión legal, a Xunta de Galicia procedeu, nunha primeira fase da planificación do sistema de transporte público, a un primeiro paso na integración da prestación do servizo de transporte de escolares no sistema de transporte público de uso xeral. Xa que logo, este último sistema dá servizo actualmente a un elevado número de escolares nos seus desprazamentos habituais para accederen aos seus centros educativos e, por tanto, ao dereito á educación.
Por tal motivo, establécese unha regulación dos servizos mínimos dos servizos públicos de transporte regular de uso xeral de viaxeiros/as por estrada que diferencia, por unha parte, os servizos correspondentes a expedicións «integradas», nas cales existe unha reserva de prazas a favor de escolares, e que, consonte coa citada Lei 2/2017, do 8 de febreiro, a súa prestación se considera prioritaria.
Por outra parte, respecto do resto das expedicións, cómpre incidir especialmente na mobilidade que se produce cara aos principais centros urbanos, nos cales se localizan servizos esenciais aos cales cómpre garantir o dereito a acceder ás persoas usuarias, e cara aos cales se presentan pautas de mobilidade cotiá recorrente en transporte público, vinculada co desenvolvemento ordinario das persoas. Neste sentido, diferenciarase a mobilidade que ten como orixe e/ou destino algunha das sete principais cidades galegas, tanto en servizos de curto percorrido, normalmente vinculados coa mobilidade máis recorrente, como en servizos de máis longo percorrido, vinculados cunha mobilidade dirixida fundamentalmente a acceder a servizos xerais radicados nas ditas entidades de poboación.
Deste xeito, nas expedicións de curto percorrido, de ata 25 km, manterase ata un 50 % do servizo nas franxas horarias da primeira e última hora do día (das 6.00 ás 9.00 e das 18.00 ás 21.00 horas), co que se garante a posibilidade de acceder e retornar aos centros de traballo ou de educación, entre outros, aínda que as persoas usuarias poderían ter que adaptar as súas pautas habituais de mobilidade.
En canto ás expedicións de máis longo percorrido, garantirase con elas o acceso aos principais núcleos de poboación, ben na xornada de mañá ben na de tarde, mais limitando a súa prestación a un servizo de ida e volta antes das 14.00 horas e outro despois das 18.00 horas, o que fai un total de 2 servizos diarios de ida e outros tantos de volta.
Deste xeito, o total de servizos que se establecen, con criterios equivalentes aos doutras situacións anteriores, sitúanse entre os que deberían prestarse un sábado ou domingo, sen prexuízo de resaltar que, excluíndo do cómputo os servizos integrados, o resto de servizos que se establecen non alcanzaría o 50 % dos que se prestan en domingo ou festivo, nin o 35 % dos que teñen lugar en sábado.
B) Servizos regulares de uso especial para transporte de escolares: o campo destes servizos resulta especialmente sensible, tanto por ser o transporte un mecanismo auxiliar para o exercicio dun dereito fundamental como é o da educación como polas especiais exixencias que implica a protección dos menores.
Do mesmo xeito, a dispersión poboacional en Galicia determina que, diariamente, se teña que realizar unha significativa cantidade de desprazamentos para os cales non existe alternativa real de mobilidade, polo que o mantemento dos servizos de transporte público resulta fundamental.
Coa finalidade de, garantindo o esencial dereito á folga dos traballadores e traballadoras, manter a garantía do igualmente elemental dereito de acceso ao sistema educativo, deberán manterse aqueles servizos sen os cales se presentaría unha clara dificultade para o acceso ao sistema educativo.
C) Servizos regulares de uso especial para transporte de traballadores: co fin de garantir o acceso e a saída dos postos de traballo naqueles servizos de carácter interurbano en que a ausencia dunha previsión mínima crebaría toda posibilidade de acceso ao traballo, propóñense como mínimos todos os servizos nas expedicións anteriores ás 9.00 horas e e posteriores ás 18.00 horas.
D) Transporte de mercadorías: neste ámbito debe terse en conta a dependencia que deste tipo de transporte teñen os servizos de asistencia sanitaria, que non poden afrontar unha falta de subministración suficiente dos produtos precisos para a atención á cidadanía.
En consecuencia, proponse manter a totalidade dos transportes de toda clase de mercadorías para e desde os establecementos sanitarios.
E) Transporte funerario: polas necesidades sociais inaprazables que atende esta modalidade de transporte, proponse manter a totalidade dos servizos de transporte funerario.
No ámbito da materia de infraestruturas viarias, a Comunidade galega caracterízase pola dispersión da súa poboación e pola existencia de innumerables asentamentos de poboación (máis de 30.000 entidades de poboación no conxunto dos 315 municipios galegos) distribuídos nun territorio caracterizado pola súa difusión xeográfica e atendidos por unha extensa rede de infraestruturas de diversa escala.
Garantir a súa utilización polos cidadáns en condicións de normalidade exixe, por un lado, manter as estradas nunhas condicións mínimas que garantan o funcionamento das infraestruturas coas debidas condicións de seguridade para os seus usuarios, e doutro, permitir a súa utilización de acordo cos principios de igualdade, universalidade e non discriminación, posibilitando, deste xeito, a liberdade de circulación, e, xunto a esta, o acceso ao exercicio doutros dereitos fundamentais, como o acceso aos servizos de saúde ou a liberdade de elección entre o exercicio ao dereito de folga e o dereito ao traballo.
Neste marco, é nas vías de alta capacidade en réxime de concesión e naquelas cuxa contraprestación sexa o pagamento dunha tarifa por parte da Administración onde debe prestarse o servizo nunhas condicións mínimas que garantan o funcionamento das infraestruturas coas debidas condicións de seguridade e considérase indispensable a presenza de persoal nos centros de control, así como a existencia de persoal que actuará cando se prevexan circunstancias adversas de calquera tipo: emerxencias ou situacións excepcionais derivadas de accidentes, posibilidade de obstáculos na estrada ou desprendementos, presenza de animais na vía, circulación de vehículos con cargas perigosas, fenómenos meteorolóxicos (neve, xeo, sarabia, chuvia) etc.
Pola súa banda, e ao respecto da conservación ordinaria das estradas de titularidade autonómica que se xestionen baixo o réxime de concesión, por parte das empresas adxudicatarias dos contratos de servizo para a realización da vialidade invernal e da conservación ordinaria tamén se considera indispensable a existencia de persoal que actuará cando se prevexan circunstancias adversas de calquera tipo: emerxencias ou situacións excepcionais derivadas de accidentes, posibilidade de obstáculos na estrada ou desprendementos, presenza de animais na vía, circulación de vehículos con cargas perigosas, fenómenos meteorolóxicos (xeo, sarabia, chuvia) etc. Ademais, dado que está operativo o dispositivo para garantir a vialidade nas estradas autonómicas en circunstancias meteorolóxicas adversas propias do inverno, considérase en calquera caso indispensable a presenza do persoal necesario para a realización da vialidade invernal.
En ambos os casos, tanto as empresas concesionarias como as empresas adxudicatarias de servizo en vías explotadas pola Administración, atenderán as necesidades, establecendo as medidas preventivas e correctivas, e a transmisión de información sobre elas, adoptando para iso as medidas precisas para atender axeitadamente as incidencias acaecidas durante as horas en que teña lugar a folga convocada.
Asemade, considérase necesario que nas áreas de peaxe das autoestradas A Coruña-Carballo (AG-55) e Puxeiros-Val Miñor (AG-57) en que non existen vías automáticas (Paiosaco e A Laracha na AG-55 e Vincios ramal na AG-57) permaneza operativa unha vía manual, dado que doutra forma se impediría a circulación de vehículos por eses treitos.
• No ámbito da Consellería de Economía, Emprego e Industria tómase en consideración, para determinar os servizos mínimos, a necesidade da presenza efectiva que garanta, por un lado, a defensa dos intereses e dereitos das persoas consumidoras e usuarias na posta de manifesto de situación que poidan representar un risco para a seguridade ou a saúde colectiva; e por outro, a seguridade e saúde laboral de persoal empregado no ámbito da prevención de riscos laborais.
En canto á seguridade e saúde laboral, o mínimo imprescindible para cubrir as necesidades urxentes é contar con 1 técnico/a de prevención de riscos laborais por cada un dos centros provinciais do Instituto Galego de Saúde e Seguridade Laboral. Así mesmo, para garantir os dereitos das persoas consumidoras, o Instituto Galego do Consumo e da Competencia atenderá cunha persoa funcionaria do rexistro específico de servizos centrais, as situacións especiais derivadas das alertas que se poidan producir.
• No ámbito da Consellería de Educación, Universidade e Formación Profesional, polo que se refire ao servizo esencial da educación, este non pode ser reducido exclusivamente á actividade docente, xa que xunto a esta actividade se realizan outras funcións como son a vixilancia e coidado dos nenos e nenas, menores de idade, que acoden aos centros docentes públicos, así como o coidado, mantemento e vixilancia das instalacións destinadas ao servizo público educativo.
Con carácter xeral, o artigo 39 da Constitución depara unha protección especial aos menores; dun xeito máis específico, a Lei 4/2011, do 30 de xuño, de convivencia e participación da comunidade educativa (DOG do 15 de xullo), dispón no seu artigo 7 que o alumnado ten dereito a que se respecte a súa identidade, integridade e dignidade persoal, e á protección integral contra toda agresión física e moral. Por tanto, a custodia e seguridade dos menores de idade que accedan a un centro docente, o cumprimento dos principios constitucionais mencionados e dos dereitos citados é responsabilidade ineludible da Administración educativa e parte indivisible do dereito esencial á educación.
O dereito á seguridade e o correlativo deber de protección dos menores, dada a súa entidade, debe exercerse continuamente. Como servizo mínimo para garantilos establécese que os centros docentes permanezan abertos no seu horario habitual, coa necesaria presenza nos ditos centros do/da director/a, ou, de ser o caso, doutro membro do equipo directivo que o/a substitúa, xa que tales membros do equipo directivo teñen a representación do centro e garanten o cumprimento das leis e demais disposicións vixentes, como sinalan as alíneas a) e d) do artigo 132 da Lei orgánica 2/2006, do 3 de maio, de educación, publicada no BOE do 4 de maio e, por tanto, están capacitados e facultados para resolver calquera incidencia respecto da seguridade dos menores de idade. Así mesmo, consonte a normativa citada, o director tamén está facultado e capacitado para resolver calquera incidencia que se poida producir respecto do conxunto dos bens que integran un centro docente.
A presenza dun subalterno ou subalterna deriva das funcións que a este tipo de persoal competen respecto do coidado e vixilancia das instalacións e do control de entrada e saída do centro educativo, tanto para evitar a entrada de persoas alleas ao centro como para evitar a saída dos menores de idade cando non corresponda.
Dentro do deber de outorgar protección básica ao menor de idade debemos incluír a súa alimentación, así, cando un servizo público asume esta responsabilidade, non pode desatendela, o que motiva que unha persoa con funcións de cociña deba permanecer nos centros educativos ordinarios con servizo de comedor.
O dereito á seguridade e o correlativo deber de protección dos menores que, como se dixo, non pode ser paralizado, inclúe a actividade básica de coidar a integridade física e hixiene daqueles que, por teren diminuídas as súas capacidades, necesitan unha constante vixilancia e atención (artigo 49 da Constitución) por parte de coidadores de alumnado con necesidades educativas especiais presentes nos centros docentes ordinarios. O alumnado dos centros de educación especial ten unhas necesidades relativas á súa atención aínda máis reforzadas, polo que debe haber unha presenza mínima de persoal sanitario, persoal coidador, de comedores e de limpeza. A determinación dos anteditos servizos mínimos por porcentaxes nos centros de educación especial considérase como criterio máis apropiado para a fixación do persoal que debe prestalos, dada a diversidade existente na dimensión e tamaño dos diferentes centros desa tipoloxía que hai na nosa comunidade.
Os centros residenciais docentes teñen como característica propia a presenza do alumnado fóra do horario lectivo para realizar actos da vida cotiá que o resto fai no seu domicilio particular, como estudar, durmir ou comer. Nestes centros debe quedar garantida, xa que logo, a atención mínima para que esas actividades non se poidan ver alteradas con risco ou desatención para os usuarios do servizo; trátase de garantir minimamente a hixiene, a alimentación e a seguridade, razón pola cal resulta necesaria a presenza dun membro do equipo directivo, así como de parte do persoal de limpeza, de comedor e subalternos.
Polo que se refire ás universidades, cos servizos mínimos que se fixan garántase a asistencia do alumnado e do persoal que non exerza o seu dereito á folga. A presenza mínima do persoal de conserxaría resulta precisa para a seguridade das instalacións. O persoal previsto para os rexistros busca garantir a actuación das persoas que puideren necesitalo e cuxo incumprimento poida supor perda ou prexuízo nos seus dereitos.
• No ámbito da Consellería de Cultura e Turismo.
O Centro Superior de Hostalaría de Galicia (CSHG), integrado como área na Dirección de Profesionalización da Axencia turismo de Galicia, é un centro de ensinanza superior que forma directivos hostaleiros e xestores en cociña, impartindo dúas titulacións: o Diploma Superior en Xestión Hoteleira e o Diploma de Gastronomía e Xestión en Cociña.
O CSHG ofrece residencia aos/ás seus/súas alumnos/as, e conta, neste curso 2018/19, cun total de 58 alumnos que residen no Centro.
Os centros residenciais docentes teñen como característica propia a presenza do alumnado fóra do horario lectivo para realizar actos da vida cotiá que o resto fai no seu domicilio particular, como estudar, durmir ou comer. Nestes centros debe quedar garantida, xa que logo, a atención mínima para que esas actividades non se poidan ver alteradas con risco ou desatención para os usuarios do servizo, polo que se require a presenza mínima do persoal de conserxaría para atender as instalacións e o alumnado. O servizo de conserxería está externalizado, a través do correspondente contrato de servizos. A proposta que se formula respecta o criterio de fixar como servizos mínimos os que normalmente prestan con ocasión dun domingo ou día festivo.
No eido da Consellería de Sanidade os servizos mínimos que se establecen resultan totalmente necesarios para manter a adecuada cobertura dos servizos esenciais que presta a Consellería de Sanidade, evitando que se produzan graves prexuízos para a saúde da cidadanía e permitindo cumprir coa normativa vixente.
Estes servizos mínimos responden á necesidade de compatibilizar o respecto ineludible ao exercicio do dereito á folga co mantemento dunha serie de servizos á poboación que, baixo ningún concepto, poden quedar desasistidos, xa que se realizan no eido da protección da saúde, cun carácter marcademente preventivo, e deberán ser prestados tendo en conta as obrigas que o marco normativo vixente, no contexto europeo, nacional ou autonómico, establece en materia ambiental e alimentaria co obxectivo de protexer a saúde da cidadanía. No ámbito sanitario, os servizos deben garantir o cumprimento das normas esenciais para asegurar o control de calquera incidencia que se poida producir nos establecementos e servizos de sanidade ambiental ou alimentaria.
En canto aos/ás inspectores/as veterinarios/as oficiais de saúde pública de comarca, cubriranse as necesidades urxentes ou de perentoria necesidade, entre as cales se encontran alertas nivel I, intoxicacións alimentarias, abrochos e actuacións especiais en establecementos e servizos no marco das competencias da Consellería de Sanidade.
Os/as inspectores/as veterinarios/as de saúde pública de matadoiro cubrirán as situacións especiais derivadas das urxencias que se poidan producir, entre as cales se atopan as de benestar animal, as de desabastecemento que se poidan producir por festividades locais, no día anterior ou posterior ao día da folga, e outras de semellante natureza.
Os/as inspectores/as veterinarios/as de saúde pública de lonxa asegurarán a calidade sanitaria dos produtos que son obxecto de inspección.
Os/as inspectores/as farmacéuticos/as de saúde pública cubrirán as necesidades urxentes ou de perentoria necesidade, entre as cales se encontran alertas, casos illados de lexionela, abrochos e actuacións especiais en establecementos e servizos no marco das súas competencias.
En canto ás alertas epidemiolóxicas, o obxectivo principal é o de detectar rapidamente aquelas ameazas e situacións que poidan ter un impacto grave na saúde da poboación e requiran a toma de medidas de xeito rápido, coa finalidade de dar una resposta de saúde pública adaptada á situación, polo que a persoa que estea de garda nesta data cubrirá os servizos mínimos
• No ámbito da Consellería de Política Social tómase en consideración para a determinación dos servizos mínimos a necesidade da presenza efectiva que garanta o funcionamento dos centros, tendo como referencia para os centros asistenciais o número de efectivos presentes nun domingo ou nun día festivo por seren estes os días en que a prestación de servizos e realización de actividades, así como o número de usuarios, acada os seus niveis mínimos, limitándose ao mantemento básico e esencial dos centros, o cal non pode ser desatendido. Estes servizos mínimos fixados no ámbito dos servizos sociais considéranse imprescindibles para garantir unha atención adecuada ás persoas residentes ou usuarias destes centros, máxime cando é necesario dar unha resposta inmediata ás diferentes situacións de emerxencia social.
• No que respecta á Consellería do Medio Rural e debido á época de baixo risco de incendio en que nos atopamos, redúcense os servizos mínimos fixando unicamente como imprescindible o persoal previsto para un domingo ou festivo, no dispositivo de prevención e extinción de incendios. O dito dispositivo comprende tanto os servizos prestados nos centros de coordinación central e nos catro centros de coordinación provincial de cada unha das catro provincias como os servizos prestados en cada un dos dezanove distritos forestais.
Os servizos fixados na Dirección Xeral de Gandaría, Agricultura e Industrias Agroalimentarias permitirán responder á necesidade imperiosa de manter activo o sistema de alerta sanitaria veterinaria e son os determinados no menor grao posible para asegurar a sanidade animal.
Así, nos servizos de sanidade de servizos centrais, a presenza dun veterinario/a para realizar os labores de coordinación no casos de aparición dunha grave epizootia, tanto cos servizos provinciais coma co Ministerio de Agricultura, Pesca e Alimentación. Unha única persoa veterinaria nos servizos provinciais, con ámbito de actuación provincial para, se for o caso, realizar a oportuna coordinación a nivel provincial, cos servizos veterinarios comarcais, como cos servizos centrais. Un veterinario/a por área, para, se for o caso, realizar as oportunas actuacións nas explotacións afectadas. Así mesmo, é necesario unha persoa veterinaria no Laboratorio de Sanidade e Produción Animal para cubrir a necesidade de recibir mostras que puideren existir nunha alerta sanitaria e, en caso de urxente necesidade, se for preciso, derivalas aos laboratorios nacionais de referencia.
En todos os centros de formación da dita Consellería do Medio Rural se designa un efectivo para a apertura dos centros que imparten formación regrada. Naqueles centros que, polo seu carácter, teñen gando ao seu coidado, para non desatendelo, desígnase o persoal necesario para o mantemento de cultivos e gando, manténdose así os servizos dun domingo.
Así mesmo, no caso dos centros de formación de Sergude e Lourizán, que teñen réxime de internado, desígnanse os servizos que permiten atender minimamente os seus usuarios e que se prestan en domingo, polo que se establece un cociñeiro de 1ª.
En relación cos centros de investigación, naqueles centros que, polo seu carácter, teñen gando ao seu coidado, para non desatendelo, desígnase o persoal necesario para o mantemento de cultivos e gando; desta forma mantéñense así os servizos dun domingo.
• Respecto da Consellería do Mar, nos centros educativos con alumnos/as en réxime de internado é preciso un mínimo de persoal que manteña a atención que se debe prestar aos residentes.
Os dous centros de ensino dependentes desta consellería nos cales se propón fixar servizos mínimos, o IPMP de Vigo e a EONP de Ferrol, teñen durante os días lectivos da semana servizo de residencia e comedor, pero os sábados, domingos e festivos permanecen pechados. Existe un servizo de vixilancia exclusivamente de dúas horas os domingos e os festivos que son vésperas de días lectivos, que teñen como misión abrir o centro e permanecer nel para recibir os residentes mentres non empeza a quenda do/da educador/a.
Os/as educadores/as (persoal laboral) desenvolven o seu traballo a quendas, de luns a venres en horario de mañá, tarde e noite. En ausencia dun servizo de vixilancia faise necesario garantir que ao menos un/unha educador/a estea presente de maneira permanente para control e servizo dos/das alumnos/as residentes.
A vixilancia pesqueira non só é necesaria para manter o control do sector, coa finalidade de ofrecer unha efectiva protección dos recursos mariños, senón que tamén colabora en tarefas e actuacións de salvamento e rescate marítimo cando as necesidades así o exixen. Así, os servizos mínimos deben cubrir de xeito efectivo a área de busca e salvamento marítimo e loita contra a contaminación do mar en Galicia, dada a imposibilidade de que tal servizo quede desatendido, pola transcendencia que esta actividade ten no salvamento de vidas e na protección e prevención de contaminacións mariñas.
O Servizo de Gardacostas de Galicia está operativo as 24 horas do día, os 365 días do ano, sen que se diferencien os servizos establecidos para festivos, sábados e domingos dos programados para o resto do días laborables. As emerxencias, de producirse, poden ser atendidas garantindo unha tripulación (composta por un/unha patrón/oa, un/unha mecánico/a e un/unha vixilante mariñeiro/a) por provincia, nas bases operativas da Coruña, Celeiro e Vigo.
Portos de Galicia non ten servizos ordinarios (nin de oficinas nin nos portos) os sábados e domingos; aínda que para casos de incidencias nos portos en días de festivo, sábado ou domingo si se acostuma actuar desde os cargos de goberno do organismo a través de instrucións aos tres xefes/as de zona territorial de Portos, que pola súa vez, dispoñen a actuación dos gardapeiraos adscritos a cada zona de Portos.
Na súa virtude, por proposta conxunta das persoas titulares de todas as consellerías da Xunta de Galicia, co refrendo do vicepresidente e conselleiro de Presidencia, Administracións Públicas e Xustiza, oídos os comités de folga e logo de deliberación do Consello da Xunta de Galicia na súa reunión do vinte e oito un de febreiro de dous mil dezanove,
DISPOÑO:
Artigo único
1) Terán a consideración de servizos mínimos os que se relacionan a seguir:
1.1. Presidencia da Xunta de Galicia.
1.1.1. Secretaría Xeral para o Deporte.
Centro Galego de Tecnificación Deportiva (Pontevedra).
1 garda/ordenanza na quenda de noite, que inicia a súa xornada o día 7 de marzo ás 22.00 horas e remata ás 5.30 horas.
1 preceptor/a na quenda de noite, que inicia a súa xornada o día 7 de marzo ás 22.00 horas e remata ás 5.30 horas.
1 oficial cociña na quenda de mañá de 8.00 a 15.30 horas.
1 garda/ordenanza na quenda de mañá de 7.30 a 15.00 horas.
1 camareiro/a-limpador/a na quenda de mañá de 8.00 a 15.30 horas.
1 preceptor/a na quenda de mañá de 8.00 a 15.30 horas.
2 gardas/ordenanzas na quenda de tarde de 14.30 a 22.00 horas.
1.1.2. Redes de Telecomunicación Galegas Retegal, S.A, adscrita á Axencia para a Modernización Tecnolóxica de Galicia.
San Marcos: 1 enxeñeiro/a do Departamento técnico (soporte nivel 2).
Centro emisor de San Marcos-O Pedroso: 2 oficiais técnicos electrónicos (1 de mañá e 1 de tarde).
Centro emisor de Bailadora: 2 oficiais técnicos electrónicos (1 de mañá e 1 de tarde).
Centro emisor de Domaio: 2 oficiais técnicos electrónicos (1 de mañá e 1 de tarde).
Centro emisor do Xistral: 2 oficiais técnicos electrónicos (1 de mañá e 1 de tarde).
Centro emisor do Páramo: 2 oficiais técnicos electrónicos (1 de mañá e 1 de tarde).
Centro emisor da Meda: 2 oficiais técnicos electrónicos (1 de mañá e 1 de tarde).
CEXAR: 4 oficiais de comunicación (1 por quenda de 8 horas).
1.2. Vicepresidencia e Consellería de Presidencia, Administracións Públicas e Xustiza.
1.2.1. Servizos centrais:
1.2.1.1 Secretaría Xeral Técnica:
1 funcionario/a da Oficina Técnica.
1 persoa no Rexistro Xeral.
1.2.1.2. Dirección Xeral de Xustiza:
Na Secretaría de Goberno do Tribunal Superior de Xustiza: 1 xestor/a ou 1 tramitador/a.
Nas seccións penais e mixtas das audiencias provinciais e nos xulgados do penal: 1 xestor/a ou 1 tramitador/a, e 1 funcionario/a de auxilio por cada dúas seccións ou xulgados.
Nos xulgados de menores: 1 xestor/a ou 1 tramitador/a.
Nos xulgados de violencia sobre a muller: 1 xestor/a ou 1 tramitador/a e 1 funcionario/a de auxilio.
Nos xulgados de instrución de garda: o equipo de persoal que presta o servizo de garda.
Nos xulgados de primeira instancia e instrución de garda: o equipo de persoal que presta o servizo de garda.
Xulgados do contencioso-administrativo: 1 xestor/a ou 1 tramitador/a e 1 funcionario/a de auxilio por cada dous xulgados ou fracción.
Xulgados do social: 1 xestor/a ou 1 tramitador/a e 1 funcionario/a de auxilio por cada dous xulgados ou fracción.
Xulgados de familia exclusivos e xulgados de primeira instancia con competencia en materia de familia: 1 xestor/a ou 1 tramitador/a e 1 funcionario/a de auxilio por cada dous xulgados ou fracción.
Xulgados do mercantil exclusivos e xulgados de primeira instancia con competencia en materia mercantil: 1 xestor/a ou 1 tramitador/a e 1 funcionario/a de auxilio por cada dous xulgados ou fracción.
Xulgados de vixilancia penitenciaria: 1 xestor/a ou 1 tramitador/a e 1 auxilio.
Nas oficinas de fiscalías: os/as funcionarios/as que presten o servizo de garda.
Nas subdireccións territoriais do Instituto de Medicina Legal: o equipo de persoal que presta o servizo de garda.
Nos rexistros civís principais e delegados: 1 xestor/a ou 1 tramitador/a.
Nas oficinas de rexistro e repartición e nos decanatos dos xulgados que realizan as ditas funcións: 1 xestor/a ou 1 tramitador/a.
Nos servizos comúns de atención ao cidadán e á vítima: 1 xestor/a ou 1 tramitador/a.
1.2.1.3. Dirección Xeral de Emerxencias e Interior: 2 técnicos/as do sistema integrado de protección civil e emerxencias con tarefas de garda do sistema.
1.2.1.4. Dirección Xeral de Avaliación e Reforma Administrativa: 1 auxiliar administrativo/a para efectos da captura dos datos de seguimento da folga.
1.2.1.5. Centro de Atención de Emerxencias 112:
– Persoal de estrutura:
Xefatura xestión operativa.
Quenda de mañá: 1 persoa.
Quenda de tarde: 1 persoa.
Quenda de noite: 1 persoa localizada.
Comunicación, prensa e imaxe.
1 persoa localizada en cada quenda de traballo.
– Coordinación:
1 coordinadores/as en cada quenda de traballo.
– Operadores/as de enlace:
1 operador/a de enlace en cada quenda de traballo.
– Operadores/as de atención telefónica:
Quenda de mañá: 6 operadores/as de atención telefónica.
Quenda de tarde: 7 operadores/as de atención telefónica.
Quenda de noite: 5 operadores/as de atención telefónica.
– Persoal de soporte técnico (Informática CIAE 112).
1 informático/a localizado/a en cada quenda de traballo.
1.2.2. Servizos periféricos:
1.2.2.1. Delegación Territorial da Coruña.
1 funcionario/a para o Rexistro Xeral do Edificio Administrativo da Coruña.
1 persoa para o mantemento do Edificio Administrativo da Coruña.
1 funcionario/a para o Rexistro da Oficina de Ferrol.
1 persoa para o mantemento do Edificio Administrativo de Ferrol.
1.2.2.2. Delegación Territorial de Lugo.
1 funcionario/a no Rexistro Xeral.
1 persoa para o mantemento do Edificio Administrativo de Lugo.
1.2.2.3. Delegación Territorial de Ourense.
1 funcionario/a no Rexistro Xeral.
1 persoa para o mantemento do Edificio Administrativo de Ourense.
1.2.2.4. Delegación Territorial de Pontevedra.
1 funcionario/a no Rexistro Xeral.
1 persoa para o mantemento do Edificio Administrativo de Pontevedra.
1.2.2.5. Delegación Territorial de Vigo.
1 funcionario/a no Rexistro Xeral.
1 persoa para o mantemento do Edificio Administrativo de Vigo.
1.3. Consellería de Facenda.
1.3.1. Servizos centrais:
1.3.1.a) Cixtec.
1 analista-programador/a.
1.4. Consellería de Medio Ambiente, Territorio e Vivenda.
1.4.1. Servizos mínimos en materia de xestión de residuos:
a) Complexo Medioambiental de Cerceda (CMC):
– Servizos xerais:
1 operario/a por quenda, control de accesos.
1 operario/a por quenda, pesaxe.
1 operario/a por quenda, limpeza de vestiarios e local de descanso.
1 operario/a por quenda, depuradoras CMC.
1 DUE por quenda (enfermaría).
– Planta termoeléctrica e coxeración:
1 xefe/a de quenda por quenda.
2 operadores/as por quenda.
1 roldista por quenda.
1 auxiliar de roldista por quenda.
1 camioneiro/a de escouras por quenda.
1 ensacadores/as por quenda en ensaca de cinzas.
1 camioneiro/a de cinzas por quenda en ensaca de cinzas.
1 enganchador/a por quenda en ensaca de cinzas.
– Planta de Clasificación de Materiales (PCM):
1 xefe/a de quenda por quenda.
1 axente de circulación por quenda.
2 camioneiro/a por quenda.
3 operadores/as de guindastre por quenda. (descarga de tren, alimentación de residuos e alimentación de finos a secadoiro).
4 triadores/as por quenda (control de calidade e triaxe).
1 operador/a por quenda.
1 operador/a de pa por quenda.
2 roldistas por quenda.
1 oficial de secadoiro por quenda.
1 oficial de trituradora por quenda.
1 oficial de prensa por quenda.
1 oficial de carretilla por quenda.
b) Vertedoiro de Areosa:
1 xefe/a de quenda por quenda.
1 operador/a de pa por quenda.
1 operario/a de control de accesos por quenda.
1 operario/a de depuradoras por quenda.
c) Plantas de transferencia:
A Rúa: 1 operario/a.
Barreiros: 1 operario/a.
Becerreá: 1 operario/a.
Boiro: 1 operario/a.
Cee: 1 operario/a.
Chantada: 1 operario/a.
Lugo: 1 condutor/a de camión por quenda.
Monforte de Lemos: 1 operario.
Narón: quenda de día: 1 condutor/a de camión + 1 operario/a de compactación. Quenda de noite: 1 condutor/a de camión.
O Rosal: 1 operario/a.
Ortigueira: 1 operario/a.
Ourense: 1 condutor/a de camión por quenda.
O Porriño: 1 operario/a de compactación por quenda.
Ribadumia: 1 operario/a de compactación por quenda + 1 condutor/a de camión por quenda.
Santa Comba: 1 operario/a.
Santiago: 1 condutor/a de camión por quenda.
Sarria: 1 operario/a.
Silleda: 1 operario/a.
Vigo: 1 operario/a de compactación por quenda + 1 condutor/a de camión por quenda.
Viveiro: 1 operario/a.
1.4.2. Servizos mínimos en materia de conservación da natureza:
a) A Coruña:
1 axente por distrito en quenda de mañá e outro/a en quenda de tarde:
Distrito ambiental I-Ferrol
Distrito ambiental II-Bergantiños/As Mariñas Coruñesas
Distrito ambiental III-Santiago/Meseta Interior:
Distrito ambiental IV-Noia:
Distrito ambiental V-Fisterra:
Parque Natural Fragas Eume:
Un/unha vixilante en quenda mañá e un/unha axente en quenda de tarde.
Parque Natural de Corrubedo e Lagoas de Carregal e Vixán:
Un/unha vixilante en quenda mañá e un/unha axente en quenda tarde.
Centro de Recuperación de Fauna en Oleiros:
Un/unha vixilante en quenda mañá e 1 peón en quenda de tarde.
b) Lugo:
1 axente por distrito en quenda de mañá e outra en quenda de tarde:
Distrito ambiental VI-A Mariña Lucense
Distrito ambiental VII-A Fonsagrada/Os Ancares
Distrito ambiental VIII-Terra de Lemos
Distrito ambiental-Sarria/Lugo
Distrito ambiental X-A Terra Chá
Complexo Ambiental O Veral:
1 capataz e 1 peón.
c) Ourense:
1 axente por distrito en quenda de mañá e outra en quenda de tarde:
Distrito ambiental XI-Ribeiro/Arenteiro
Distrito ambiental XII-Miño/Arnoia
Distrito ambiental XIII-Valdeorras/Trives
Distrito ambiental XIV-Verín/Viana
Distrito ambiental XV-A Limia
Parque Natural Baixa Limia-Serra do Xurés: 1 axente.
Parque Natural da Serra da Enciña e da Lastra: 1 axente.
Parque Natural do Invernadeiro: 1 axente.
Piscifactoría Carballiño: 1 capataz e 1 peón.
Centro de Recuperación da Fauna Rodicio: 1 capataz e 1 peón.
d) Pontevedra:
1 axente ou vixilante por distrito en quenda de mañá e outro/a en quenda de tarde:
Distrito ambiental XVI-Deza/Tabeirós
Distrito ambiental XVII-Condado/A Paradanta
Distrito ambiental XVIII-Vigo/Baixo Miño
Distrito ambiental XIX-Caldas/O Salnés
Parque Natural Monte Aloia-L.I.C. Gándaras de Budiño:
1 axente ou vixilante.
Centro Piscifactoría Carballedo:
1 capataz e 1 peón.
Complexo Ambiental Coutorredondo:
1 capataz e 1 peón.
e) Parque Nacional das Illas Atlánticas de Galicia:
4 axentes.
1 mecánico/a (tripulación).
1 patrón/patroa (tripulación).
1 mariñeiro/a (tripulación).
1.5. Consellería de Infraestruturas e Mobilidade.
1.5.1. Servizos mínimos en materia de infraestruturas viarias:
– Por parte das empresas concesionarias nas vías de alta capacidade en réxime de concesión e naquelas cuxa contraprestación sexa o pagamento dunha tarifa, deberá garantirse o funcionamento das infraestruturas nas debidas condicións de seguridade, mantendo o persoal correspondente a un domingo ou a un día festivo en materia de conservación e mantemento.
– Por parte das empresas adxudicatarias dos contratos de servizo para a realización da vialidade invernal e da conservación ordinaria das estradas de titularidade autonómica, deberá manterse o persoal necesario para a realización da vialidade invernal, así como do persoal correspondente a un domingo ou a un día festivo en materia de conservación e mantemento a maiores do especificamente destinado á vialidade invernal.
– Nas áreas de peaxe das autoestradas A Coruña-Carballo (AG-55) e Puxeiros-Val Miñor (AG-57) en que non existen vías automáticas (Paiosaco e A Laracha na AG-55 e Vincios Ramal na AG-57) permanecerá operativa unha vía manual.