Examinada a solicitude de conciliación formulada polos representantes dos MVMC Veiga e Campo de Sas e Veiga, Costa, Chaira, Val de Barredoiro, Campo de Cibilleira e Campos, no concello de Castro Caldelas, resultan os seguintes
Feitos:
Primeiro. Con data do 3 de outubro de 2016, a presidenta da comunidade de montes veciñais en man común da parroquia de Sas de Penelas e o presidente da comunidade de montes veciñais en man común da parroquia de Vilamaior comunicaron a realización dun deslindamento entre os MVMC Veiga e Campo de Sas e Veiga, Costa, Chaira, Val de Barredoiro, Campo de Cibilleira e Campos, no concello de Castro Caldelas.
Segundo. Con data do 21 de setembro de 2017, o Servizo de Montes, despois de examinar a documentación presentada, emitiu un informe en que indicou que deben presentar novas certificacións de aprobación por parte de cada unha das comunidades implicadas, xa que as que remitiron se refiren a un deslindamento que foi modificado posteriormente, por consideralo incompleto o propio Servizo de Montes da Xefatura Territorial de Ourense.
Terceiro. O día 24 de abril de 2018, a comunidade de montes veciñais en man común da parroquia de Vilamaior achegou a certificación solicitada.
Cuarto. O día 17 de setembro de 2018, a comunidade de montes veciñais en man común de Sas de Penelas presentou a certificación requirida.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de clasificación de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, o xurado provincial de clasificación de montes veciñais en man común acordou por unanimidade, o día 7 de novembro de 2018:
Aprobar o acto de conciliación acadado polas xuntas reitoras do MVMC Veiga e Campo de Sas e Veiga, Costa, Chaira, Val de Barredoiro, Campo de Cibilleira e Campos, no Concello de Castro Caldelas.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 22 de marzo de 2019
Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense