Mediante a Resolución do 20 de maio de 2019 establecéronse as bases reguladoras e a convocatoria de subvencións, en réxime de concorrencia competitiva, das subvencións para as asociacións de nais e pais do alumnado de centros educativos de Galicia destinadas a financiar actividades de promoción da igualdade e de prevención da violencia de xénero, financiadas en desenvolvemento do Pacto de Estado contra a violencia de xénero, para o ano 2019 (SI449B).
Poderán ser obxecto de subvención ao abeiro desta convocatoria a realización de programas e actividades de difusión, información e formación para a promoción da igualdade e a prevención da violencia de xénero, a realizar polas asociacións de nais e pais de alumnos, federacións e confederacións de asociacións de nais e pais de alumnos, dirixidos ao alumnado de centros educativos non universitarios e/ou ás familias e á comunidade educativa, no marco do Pacto de Estado contra a violencia de xénero, realizadas entre o 1 de maio de 2019 e o 30 de novembro de 2019, e que respondan a algunha ou algunhas das seguintes tipoloxías contempladas nas medidas do Pacto de Estado contra a violencia de xénero do eixe 1:
a) Escolas de pais e nais e/ou formación para as familias en temas de igualdade, de educación afectivo-sexual (aspectos fisiolóxicos e afectivo-emocionais) e sobre violencia de xénero.
b) Elaboración de materiais informativos para nais e pais que lles axuden a detectar a violencia de xénero da que poden ser vítimas ou agresores as súas fillas ou fillos adolescentes.
c) Realización de accións de formación, sensibilización e difusión, contra a cosificación do corpo das mulleres e contra a hipersexualización das nenas.
d) Formación para pais e nais e/ou para mozas e mozos sobre o uso adecuado e crítico da internet e as novas tecnoloxías, especialmente na protección da privacidade e sobre os ciberdelitos (stalking, sexting, grooming, etc).
e) Accións de formación coas familias e/ou alumnado sobre novas masculinidades para romper cos micromachismos e os comportamentos machistas adquiridos polos estereotipos.
f) Outras accións de formación e información para nais e pais que sensibilicen ás familias sobre os estereotipos persistentes na sociedade e tamén no eido educativo e sobre pautas para previr a violencia de xénero, ou para detectala e que se dean a coñecer entre as familias os protocolos existentes nos casos de agresións ou violencia contra as mozas.
De acordo co establecido no artigo 2 da convocatoria, o crédito destinado ao financiamento destas axudas é o seguinte:
Aplicación |
Proxecto |
Importe (€) |
2019.05.11.313D.481.2 |
2018 00112 |
300.000,00 |
Ao existiren remanentes doutra convocatoria financiada con cargo ao mesmo crédito, co fin de poder amparar o maior número posible de solicitudes presentadas que cumpran os requisitos para ser beneficiarias das axudas, e tendo en conta que é a primeira vez que se regula unha convocatoria destas características tendo por destinatarias ás asociacións de nais e pais e federacións e confederacións constituídas por estas para estas actuacións, e que houbo moita demanda e solicitudes; estímase conveniente ampliar a dotación orzamentaria consignada, a través do suposto previsto na letra b) do artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, e no artigo 2.2 da Resolución do 20 de maio de 2019, da Secretaría Xeral da Igualdade, pola que se establecen as bases reguladoras das axudas destinadas a financiar actividades de promoción da igualdade e de prevención da violencia de xénero, financiadas en desenvolvemento do Pacto de Estado contra a violencia de xénero, para as asociacións de nais e pais do alumnado de centros educativos de Galicia, e se procede á súa convocatoria para o ano 2019.
De conformidade cos devanditos preceptos regulamentarios, o órgano concedente debe publicar a ampliación de crédito nos mesmos medios que a convocatoria, sen que tal publicidade implique a apertura de prazo para presentar novas solicitudes nin o inicio dun novo cómputo de prazo para resolver.
En consecuencia co exposto, de acordo co previsto no Decreto 74/2018, do 5 de xullo, polo que se establece a estrutura orgánica da Vicepresidencia e da Consellería de Presidencia, Administracións Públicas e Xustiza, correspóndelle á Secretaría Xeral da Igualdade, como órgano superior da Administración autonómica en materia de igualdade, entre outras, impulsar as actuacións conducentes á promoción da igualdade e á eliminación da discriminación entre mulleres e homes, así como á eliminación da violencia de xénero nos termos establecidos na Constitución, no Estatuto de autonomía de Galicia, no Decreto lexislativo 2/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de igualdade, e na Lei 11/2007, do 27 de xullo, galega para a prevención e o tratamento integral da violencia de xénero, e na demais lexislación aplicable na materia, correspóndelle á Secretaría Xeral da Igualdade a aprobación das bases, da convocatoria e as resolucións en materia de axudas e subvencións, así como a administración dos créditos para gastos do seu respectivo ámbito de competencia,
DISPOÑO:
Artigo único
1. Amplíase a dotación orzamentaria prevista no artigo 2.1 da Resolución do 20 de maio de 2019 pola que se estableceron as bases reguladoras e a convocatoria de subvencións, en réxime de concorrencia competitiva, das subvencións para as asociacións de nais e pais do alumnado de centros educativos de Galicia destinadas a financiar actividades de promoción da igualdade e de prevención da violencia de xénero, financiadas en desenvolvemento do Pacto de Estado contra a violencia de xénero, para o ano 2019 (SI449B).
2. O incremento da dotación será de 80.000,00 euros con cargo á aplicación orzamentaria 05.11.313D.481.2, no código de proxecto 2018 00112 coa denominación «Pacto de Estado contra a violencia de xénero» consignada no estado de gastos dos orzamentos xerais da Comunidade Autónoma de Galicia para o ano 2019.
3. O crédito total dispoñible para atender as axudas previstas na citada Resolución do 20 de maio de 2019 queda así establecido en 380.000,00 euros:
Aplicación |
Proxecto |
Crédito inicial (€) |
Ampliación (€) |
Crédito total (€) |
05.11.313D.481.2 |
2018 00112 |
300.000,00 |
80.000,00 |
380.000,00 |
4. Esta ampliación de crédito non afecta ao prazo de presentación de solicitudes establecido no artigo 7.1 da Resolución do 20 de maio de 2019 nin supón o inicio dun novo cómputo do prazo para resolver.
Disposición derradeira
Esta resolución entrará en vigor o día da súa publicación no Diario Oficial de Galicia.
Santiago de Compostela, 6 de agosto de 2019
Susana López Abella
Secretaria xeral da Igualdade