Antecedentes:
Para os efectos previstos no artigo 21.1 da Lei 8/2013, do 28 de xuño, de estradas de Galicia, sométese ao trámite de información pública o documento de reforma da intersección do punto quilométrico (p.q.) 6+000 da AC-840 en Oza-Cesuras, de clave AC/18/137.06. O ámbito de actuación sitúase na estrada AC-840, pertencente á Rede Primaria Básica de Estadas de Galicia, na contorna do p.q. 6+000 da dita estrada, no concello de Oza-Cesuras, na provincia da Coruña.
Esta intersección dispón na actualidade de visibilidade insuficiente, situación que unida á velocidade no treito e a importante intensidade de tráfico na zona, crea un escenario de grave perigo para o condutor á hora de realizar as distintas manobras de incorporación e de cambio de sentido. O proxecto ten por obxecto, polo tanto, a reordenación da intersección situada no p.q. 6+000 da estrada AC-840 (Betanzos-A Golada), mellorando as incorporacións desde o camiño de Carraceda á AC-840 e viceversa, para o que se proxectan carrís de aceleración e deceleración e dous carrís centrais de espera, permitindo deste xeito, todos os xiros á esquerda. Así, a solución proxectada ten como finalidade mitigar ou eliminar os actuais riscos e, como consecuencia, incrementar a seguridade viaria dos condutores.
Considerando todo o exposto e o establecido na normativa vixente,
RESOLVO:
Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia e no artigo 50 do Decreto 66/2016, do 26 de maio, polo que se aproba o Regulamento xeral de estradas de Galicia, o mencionado documento sométese ao trámite de información pública durante un período de trinta (30) días hábiles, contados a partir do seguinte ao da publicación deste anuncio no Diario Oficial Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.
Segundo. Que simultaneamente ao trámite sinalado no parágrafo anterior, e para os efectos previstos no artigo 56.1 do Decreto do 26 de abril de 1957, polo que se aproba o Regulamento de expropiación forzosa, sométese a información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.
Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no Servizo de Infraestruturas da Coruña (rúa Vicente Ferrer, 2, 15008 A Coruña), na Casa do Concello de Oza-Cesuras (Lois, 33. Oza. 15380 Oza Cesuras).
Así mesmo, na páxina web da Consellería de Infraestruturas e Mobilidade
(https://infraestruturasemobilidade.xunta.gal/organizacion/c/CIV_Axencia_Galega_de_Infraestruturas), atópase á disposición dos interesados o proxecto de construción.
Santiago Compostela, 3 de xaneiro de 2020
Francisco Menéndez Iglesias
Director da Axencia Galega de Infraestruturas