Con data do 15 de xaneiro de 2018 publicouse no Diario Oficial de Galicia a Resolución de 11 de xaneiro de 2018 pola que se aproban as bases reguladoras para a concesión de subvencións, en réxime de concorrencia competitiva, para a extensión de redes de banda larga ultrarrápida en entidades singulares de poboación, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se procede á súa convocatoria para o período 2018-2020 (procedemento administrativo PR605A).
No artigo 8 da convocatoria establécese que o despregamento da rede poderá prolongarse no tempo ata o prazo máximo para a posta en servizo, que é o 24 de marzo de 2020, e que a execución dos investimentos subvencionables se levará a cabo entre o día seguinte á data de presentación da solicitude e o 30 de xuño de 2020.
Con data do 14 de marzo de 2020 publicouse o Real decreto 463/2020, de 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, que estableceu unhas medidas especiais que afectan directamente as tarefas precisas para o despregamento das redes obxecto desta convocatoria, impedindo en moitos casos a súa execución.
Por outra banda, a realización dos despregamentos comporta a necesidade de consecución de licenzas e permisos de particulares, que están a sufrir atrasos, o que afecta o cumprimento dos obxectivos do proxecto nos prazos estipulados, máis aínda nas circunstancias actuais.
Así mesmo, ante a posibilidade de que a situación actual continúe a afectar con maior ou menor intensidade a realización dos despregamentos previstos, así como a consecución dos permisos e licenzas necesarios para a súa execución, considérase precisa a modificación dos prazos previstos inicialmente.
Con base no anterior, e en uso das competencias atribuídas no Decreto 252/2011, do 15 de decembro, polo que se crea a Axencia para a Modernización Tecnolóxica de Galicia,
RESOLVO:
Artigo único. Modificación da Resolución do 11 de xaneiro de 2018 pola que se aproban as bases reguladoras para a concesión de subvencións, en réxime de concorrencia competitiva, para a extensión de redes de banda larga ultrarrápida en entidades singulares de poboación, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se procede á súa convocatoria para o período 2018-2020 (procedemento administrativo PR605A)
Un. O artigo 6.1 da convocatoria queda redactado como segue:
«1. Para o financiamento desta convocatoria está prevista unha dotación orzamentaria máxima de 14.200.000€, que se financiarán con cargo á aplicación orzamentaria 04.A1.571A.770.0, coa seguinte distribución:
|
Aplicación |
Código proxecto |
2018 |
2019 |
2020 |
2021 |
|
04.A1.571A.770.0 |
2016 00001 |
2.683.739,20 € |
7.677.507,20 € |
1.919.376,80 € |
1.919.376,80 € |
».
Dous. O artigo 8, puntos 1, 2 e 3, da convocatoria quedan redactados como segue:
«1. A execución dos investimentos subvencionables levarase a cabo entre o día seguinte á data de presentación da solicitude e o 31 de xullo de 2021.
2. A documentación xustificativa do cumprimento da finalidade da subvención deberá presentarse ata o 31 de xullo de 2021.
3. O despregamento da rede poderá prolongarse no tempo ata o prazo máximo para a posta en servizo, que é o 31 de xullo de 2021».
Disposición derradeira única. Entrada en vigor
A presente resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 9 de xuño de 2020
Mar Pereira Álvarez
Directora da Axencia para a Modernización Tecnolóxica de Galicia
