Mediante a Resolución do 26 de novembro de 2020 publicouse no DOG do 3 de decembro de 2020 o Acordo do Consello de Dirección que aproba as bases reguladoras das axudas para a instalación, reforma e adaptación das terrazas dos establecementos de hostalaría e restauración e a adquisición de elementos de envasado e empaquetado para o servizo de consumo no domicilio, e convoca as ditas axudas en réxime de concorrencia non competitiva. O programa está cofinanciado polo Fondo Europeo de Desenvolvemento Rexional, no marco do programa operativo Feder Galicia 2014-2020.
Nesa resolución establécese que o crédito dispoñible para o programa é de 3.000.000 de €. As previsións de asignación de axudas levan a estimar que, para atender a maior cantidade de solicitudes posible será necesaria unha ampliación orzamentaria por un importe de 4.000.000 de €. Para iso, dado que a convocatoria está nunha fase de xestión inicial no que a operación Feder non está finalizada, proponse reconducir as bases reguladoras e o financiamento da convocatoria cara ao eixe REACT-UE, por entender que responde plenamente aos obxectivos perseguidos por este novo eixe, e permitirá incrementar o financiamento da convocatoria cos fondos REACT adicionais dispoñibles.
Co fin de apoiar a maior cantidade de solicitudes de axuda posible,
RESOLVO:
Artigo 1
Modificación da Resolución do 26 de novembro de 2020 pola que se dá publicidade do Acordo do Consello de Dirección que aproba as bases reguladoras das axudas para a instalación, reforma e adaptación das terrazas dos establecementos de hostalaría e restauración e a adquisición de elementos de envasado e empaquetado para o servizo de consumo no domicilio, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020, e se procede á súa convocatoria en réxime de concorrencia non competitiva para o ano 2021 (código de procedemento IG524E).
Un. O título da resolución de convocatoria queda redactado do seguinte xeito:
«Resolución do 26 de novembro de 2020 pola que se dá publicidade ao acordo do Consello de Dirección que aproba as bases reguladoras das axudas para a instalación, reforma e adaptación das terrazas dos establecementos de hostalaría e restauración e a adquisición de elementos de envasado e empaquetado para o servizo de consumo no domicilio, financiadas polo Fondo Europeo de Desenvolvemento Rexional, no marco do programa operativo Feder Galicia 2014-2020, como parte da resposta da UE á pandemia da COVID-19 e se procede á súa convocatoria en réxime de concorrencia non competitiva para o ano 2021 (código de procedemento IG524E)».
Dous. O punto primeiro do resolvo queda redactado do seguinte xeito:
«Primeiro. Publicar as bases reguladoras das axudas para a instalación, reforma e adaptación das terrazas dos establecementos de hostalaría e restauración e a adquisición de elementos de envasado e empaquetado para o servizo de consumo no domicilio e convocar para o ano 2021 as ditas axudas en réxime de concorrencia non competitiva (código de procedemento IG524E).
A convocatoria é susceptible de ser financiada ao 100 % no marco do eixe REACT-UE do programa operativo Feder Galicia 2014-2020, como parte da resposta da UE á pandemia da COVID-19».
Tres. O punto cuarto do Resolvo queda redactado do seguinte xeito:
«Cuarto. O crédito dispoñible para concesións nesta convocatoria aboarase con cargo ás seguintes aplicacións orzamentarias e polos seguintes importes:
|
Partida orzamentaria |
Ano 2021 |
|
06.A1-741A-7700 |
6.400.000 € |
|
06.A1-741A-4702 |
600.000 € |
O director xeral do Igape poderá ampliar os créditos, logo da declaración da súa dispoñibilidade, como consecuencia das circunstancias establecidas no artigo 30.2 do Decreto 11/2009, mediante resolución publicada para o efecto».
Cuarto. O título das bases reguladoras queda redactado do seguinte xeito:
«Bases reguladoras das axudas para a instalación, reforma e adaptación das terrazas dos establecementos de hostalaría e restauración e a adquisición de elementos de envasado e empaquetado para o servizo de consumo no domicilio, financiadas polo Fondo Europeo de Desenvolvemento Rexional, no marco do programa operativo Feder Galicia 2014-2020, como parte da resposta da UE á pandemia da COVID-19».
Quinto. O artigo 2.4 das bases reguladoras queda redactado do seguinte xeito:
«4. Esta convocatoria é susceptible de ser financiada ao 100 % no marco do eixe REACT-UE do programa operativo Feder Galicia 2014-2020, como parte da resposta da UE á pandemia da COVID-19. Está sometida ás obrigas de información e difusión establecidas na regulamentación da UE, en particular ás establecidas no anexo XII, punto 2.2 do Regulamento (UE) nº 1303/2013 do Parlamento Europeo e do Consello, do 17 de decembro de 2013 (DOUE L 347, do 20 de decembro de 2013) (en diante, Regulamento (UE) nº 1303/2013)».
Sexto. Modifícase o título do procedemento, a referencia ao financiamento e a lexislación aplicable no anexo II de Solicitude, que se substitúe polo que se anexa a esta resolución.
Sétimo. Modifícase o título do anexo III de Solicitude de cobramento, que se substitúe polo que se anexa a esta resolución.
Artigo 2
Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 18 de febreiro de 2021
Fernando Guldrís Iglesias
Director xeral do Instituto Galego de Promoción Económica
