A Orde do 15 de xaneiro de 2021 pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao Sistema integrado de xestión e control (DOG núm. 19, do 29 de xaneiro) regula, entre outras cuestións, o prazo para a presentación da solicitude única. En concreto, o seu artigo 10.3 prevé con carácter xeral que o prazo de presentación da solicitude única, para o ano 2021, se iniciará o 1 de febreiro e finalizará o día 30 de abril, ambos incluídos. Así mesmo, o artigo 13, parágrafo 1 desta norma regula o prazo de modificación da solicitude única e, para tal efecto, dispón que, unha vez finalizado o prazo para a presentación da solicitude única, as persoas solicitantes poderán presentar solicitudes de modificación ata o 31 de maio.
Estes prazos adecúanse ao disposto no Real decreto 1075/2014, do 19 de decembro, sobre a aplicación a partir de 2015 dos pagamentos directos á agricultura e á gandaría e outros réximes de axuda. Este real decreto regula, con carácter de normativa básica, o prazo de presentación da solicitude única e da súa modificación.
Nesta campaña 2021, a pandemia internacional do virus da COVID-19 segue afectando todo o territorio nacional e, por tanto, esta comunidade autónoma, e manténdose unha serie de restricións temporais, que teñen impacto no proceso de presentación da solicitude única.
Co obxecto facilitar o máximo posible a presentación de solicitudes ás persoas interesadas, máxime tendo en conta as dificultades económicas por que atravesan os diversos sectores da actividade, e co obxecto de promover en particular a mellora do sector agrícola, considérase preciso flexibilizar o prazo de presentación da solicitude única mediante a súa ampliación ata o día 15 de maio de 2021 e tamén o da súa modificación ata o día 15 de xuño do mesmo ano.
Neste sentido, os artigos 95 e 96 do Real decreto 1075/2014, do 19 de decembro, facultan as comunidades autónomas para ampliaren os ditos prazos de presentación da solicitude única e da súa modificación no seu ámbito territorial, de maneira debidamente motivada.
A maior abastanza, o día 29 de marzo de 2021 publicouse no Diario Oficial de la Unión Europea (DOUE) o Regulamento de execución (UE) 2021/540 da Comisión, polo que se modifica o Regulamento de execución (UE) 809/2014 no que atinxe a determinadas obrigas de notificación, controis sobre o terreo das solicitudes de axuda por gando e solicitudes de pagamento no marcos das medidas de axuda relacionadas cos animais, así como a presentación da solicitude única, as solicitudes de axuda ou as solicitudes de pagamento.
No considerando 3 deste regulamento europeo a Comisión Europea indica que a experiencia demostrou que os Estados membros deben dispoñer de maior flexibilidade na fixación das datas límite para a presentación da solicitude única, as solicitudes de axuda ou as solicitudes de pagamento a que se refire o artigo 13, número 1, do Regulamento de execución (UE) 809/2014, co fin de ter en conta máis adecuadamente as súas circunstancias específicas e, en particular, as cambiantes condicións climáticas e meteorolóxicas.
A seguir o artigo 1.3 do Regulamento 2021/540 suprime as frases segunda e terceira do artigo 13.1, parágrafo primeiro do Regulamento 809/2014. Precisamente as frases que se suprimen son as que estipulaban as concretas datas límite de presentación das solicitudes, polo que na actualidade, segundo a regulación vixente citada, se facultan os Estados membros para fixaren as datas límite de presentación da solicitude única coa única limitación de ter en conta o prazo necesario para a obtención de todos os datos pertinentes para unha correcta xestión administrativa e financeira da axuda e garantir a programación de controis eficaces.
Tendo en consideración as circunstancias actuais e a normativa publicada, o Ministerio de Agricultura, Pesca e Alimentación está planeando a tramitación dun novo proxecto de orde de modificación dos prazos de presentación e modificación da solicitude única, establecidos nos artigos 95 e 96 do Real decreto 1075/2014, do 19 de decembro. Neste proxecto saliéntase o obxectivo de facilitar o máximo posible a presentación da solicitude da política agrícola común do ano 2021, ante a excepcionalidade das medidas decretadas para a xestión da situación de crise sanitaria, así como evitar desigualdade de trato aos agricultores en función da comunidade autónoma que xestione a solicitude única e diferenzas na xestión dos requisitos de admisibilidade, dados todos os fitos e prazos relacionados con estas datas.
A Comunidade Autónoma de Galicia xa comunicou ao Fondo Español de Garantía Agraria a súa vontade de modificar a data límite de presentación da solicitude única ata o día 15 de maio de 2021, de forma que se flexibilice a data de presentación sen mingua da xestión.
Por outra banda, unha vez que entrou en vigor a Orde do 15 de xaneiro de 2021, que se modifica mediante esta norma, detectouse que no anexo III, relativo a «zonas de concentración parcelaria en que se empregarán obrigatoriamente referencias identificativas correspondentes a planos de concentración», faltaba incluír dúas zonas, polo que se engaden a través desta modificación, para que o anexo III quede completo.
En consecuencia, de conformidade co previsto no artigo 30.1.3 do Estatuto de autonomía de Galicia, no uso das facultades que me confiren a Lei 9/2007, do 13 de xuño, de subvencións de Galicia, e a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo único. Modificación da Orde do 15 de xaneiro de 2021 pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao Sistema integrado de xestión e control
A Orde do 15 de xaneiro de 2021 pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao Sistema integrado de xestión e control queda modificada como segue:
Primeiro. O número 3 do artigo 10 queda redactado do seguinte modo:
«3. O prazo de presentación da solicitude única, para o ano 2021, iníciase o 1 de febreiro e finalizará o día 15 de maio, ambos incluídos, agás o previsto no número seguinte».
Segundo. O número 1 do artigo 13 queda redactado do seguinte modo:
«1. Unha vez finalizado o prazo para a presentación da solicitude única, as persoas solicitantes poderán presentar solicitudes de modificación ata o 15 de xuño incluído».
Terceiro. No anexo III, relativo a «zonas de concentración parcelaria en que se empregarán obrigatoriamente referencias identificativas correspondentes a planos de concentración» deben engadirse as seguintes zonas ás xa incluídas:
Provincia |
Concello |
Código zona |
Nome da zona |
||
15 |
A Coruña |
80 |
Santiso |
7 |
Visantoña |
27 |
Lugo |
46 |
Pol |
1 |
Santo Estevo |
Disposición derradeira. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 20 de abril de 2021
José González Vázquez
Conselleiro do Medio Rural