Por Orde do 5 de abril de 2021 (DOG núm. 67, do 12 de abril) regulouse o procedemento de integración como persoal laboral da Xunta de Galicia do persoal laboral fixo da Axencia para a Modernización Tecnolóxica de Galicia procedente do suprimido Centro Informático para a Xestión Tributaria, Económico-Financeira e Contable. No artigo 2.1 establécese que o prazo de presentación de solicitudes é de 15 días hábiles contados a partir do seguinte ao da publicación da orde no Diario Oficial de Galicia, o que se produciu o día 12 de abril de 2021.

O artigo 32.1 da Lei 39/2015, do 1 de outubro, do procedemento administrativo común das administracións públicas, establece a posibilidade de que a Administración poida conceder, de oficio ou por petición dos interesados, unha ampliación dos prazos establecidos que non exceda da metade destes, se as circunstancias o aconsellan e con iso non se prexudican dereitos de terceiro.

De acordo co anterior, tendo en conta que se está a tramitar unha modificación da relación de postos de traballo da axencia para adaptala á nova situación derivada da supresión do Cixtec, circunstancia alegada pola Axencia para a Modernización Tecnolóxica de Galicia na súa solicitude, enténdese que concorren circunstancias suficientes que aconsellan ampliar o prazo de presentación de solicitudes para a integración como persoal laboral da Xunta de Galicia do persoal laboral fixo da Axencia para a Modernización Tecnolóxica de Galicia procedente do suprimido Centro Informático para a Xestión Tributaria, Económico-Financeira e Contable. Esta prórroga garantirá que o persoal afectado dispoña da máxima información de cara a presentar as solicitudes de integración.

En consecuencia, de acordo co disposto no artigo 32 da Lei 39/2015, do 1 de outubro, do procedemento administrativo común das administracións públicas, esta Consellería de Facenda e Administración Pública,

ACORDA:

Artigo único. Modificación do prazo fixado no artigo 2 da Orde de 5 de abril de 2021 pola que se regula o procedemento de integración como persoal laboral da Xunta de Galicia do persoal laboral fixo da Axencia para a Modernización Tecnolóxica de Galicia procedente do suprimido Centro Informático para a Xestión Tributaria, Económico-Financeira e Contable (código de procedemento AP100A).

Ampliar o prazo para presentar solicitudes para a integración como persoal laboral da Xunta de Galicia do persoal laboral fixo da Axencia para a Modernización Tecnolóxica de Galicia procedente do suprimido Centro Informático para a Xestión Tributaria, Económico-Financeira e Contable ata o 13 de maio de 2021.

Disposición derradeira única. Entrada en vigor

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 28 de abril de 2021

Valeriano Martínez García
Conselleiro de Facenda e Administración Pública