Mediante a Orde do 14 de xullo de 2014 (DOG do 23 de xullo) autorizouse a posta en marcha, con carácter experimental, dunha sección bilingüe de lingua inglesa no Conservatorio Profesional de Música da Coruña, no Conservatorio Profesional de Música de Santiago de Compostela e no Conservatorio Profesional de Música de Vigo a partir do curso académico 2014/15. Mediante a Resolución do 4 de xullo de 2016 (DOG do 19 de xullo ), a Resolución do 7 de xuño de 2018 (DOG do 19 de xuño ), a Resolución do 15 de xullo de 2020 (DOG do 24 de xullo) e a Resolución do 21 de xullo de 2022 (DOG do 5 de agosto ) prorrogáronse as anteditas seccións bilingües.

Así mesmo, a través da Orde do 7 de xullo de 2016 (DOG do 20 de xullo), autorizouse a posta en marcha, con carácter experimental, dunha sección bilingüe de lingua inglesa no Conservatorio Superior de Música de Vigo e na Escola de Arte Superior de Deseño Pablo Picasso a partir do curso académico 2016/17. Mediante a Resolución do 10 de outubro de 2018 (DOG do 23 de outubro), a Resolución do 15 de xullo de 2020 (DOG do 24 de xullo) e a Resolución do 21 de xullo de 2022 (DOG do 5 de agosto) prorrogouse a sección bilingüe en lingua inglesa destes dous centros de ensinanzas artísticas superiores.

No artigo 9 das correspondentes ordes de autorización establécese que o proxecto ten unha duración de dous cursos académicos, prorrogables en períodos de dous cursos académicos, logo do informe favorable do Servizo de Inspección Educativa emitido, tendo en conta a adecuación ás condicións e obxectivos indicados na súa posta en marcha e a permanencia das circunstancias que xustificaron a súa implantación.

Igualmente, na disposición derradeira primeira das citadas ordes autorízase a Dirección Xeral de Formación Profesional para ditar cantas normas se consideren oportunas para o seu desenvolvemento.

Emitidos os correspondentes informes favorables polos servizos de inspección educativa, de acordo co establecido no artigo 9 das citadas ordes,

RESOLVO:

Primeiro. Prorrogar, por un período de dous cursos académicos e coa finalidade de favorecer a práctica de idiomas entre o alumnado de ensinanzas artísticas, as seguintes seccións bilingües:

– A sección bilingüe de lingua inglesa no Conservatorio Profesional de Música da Coruña.

– A sección bilingüe de lingua inglesa no Conservatorio Profesional de Música de Santiago de Compostela.

– A sección bilingüe de lingua inglesa no Conservatorio Profesional de Música de Vigo.

– A sección bilingüe de lingua inglesa no Conservatorio Superior de Música de Vigo.

– A sección bilingüe de lingua alemá na Escola de Arte Superior de Deseño Pablo Picasso.

Segundo. Contra esta resolución poderá interpoñerse recurso de alzada ante a persoa titular da Consellería de Educación, Ciencia, Universidades e Formación Profesional, no prazo dun mes contado a partir do día seguinte ao da súa publicación no Diario Oficial de Galicia, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 31 de xullo de 2024

María Eugenia Pérez Fernández
Directora xeral de Formación Profesional