Mediante a Resolución do Inega do 7 de marzo de 2024, que foi publicada no DOG número 56, do 19 de marzo, establecéronse as bases reguladoras e anunciouse a convocatoria de subvencións para proxectos de enerxía fotovoltaica.

O artigo 3.1 das bases reguladoras prevé a posibilidade de redistribuír o orzamento se nalgunha das epígrafes non se rexistraron solicitudes suficientes para esgotar os fondos dispoñibles e noutra das epígrafes existe lista de espera. O prazo de presentación de solicitudes rematou o 19 de abril e non se rexistraron solicitudes suficientes para esgotar os fondos dispoñibles na epígrafe correspondente a empresas e, porén, non hai dispoñibilidade orzamentaria suficiente nas epígrafes correspondentes a Administración local e entidades sen ánimo de lucro.

O artigo 31 do Decreto 11/2009 establece que cando a contía total máxima das subvencións convocadas se distribúa entre distintos créditos orzamentarios, a alteración da dita distribución non precisará de nova convocatoria pero si das modificacións que procedan no expediente de gasto e da publicación nos mesmos medios que a convocatoria.

Por todo o anterior, dado que nas aplicacións orzamentarias correspondentes existe crédito dispoñible, e coa finalidade de incrementar a eficacia administrativa e a eficiencia na asignación de recursos públicos, maximizando o impulso de proxectos de enerxía fotovoltaica,

RESOLVO:

Primeiro. Redistribuír os fondos destinados ás subvencións para proxectos de enerxía fotovoltaica para as anualidades 2024 e 2025 en función do volume de solicitudes recibido, modificando a táboa do artigo 3.1 da Resolución do 7 de marzo de 2021 do seguinte xeito:

– Modificación orzamentaria:

Beneficiario	Importe inicial	Modificación	Importe final
Empresas	4.300.000	- 900.000	3.400.000
Administración local	1.000.000	+ 650.000	1.650.000
Entidades sen ánimo de lucro	224.800	+250.000	474.800
Total	5.524.800	0	5.524.800

– Dotación orzamentaria final:

	2024	2025	Total
Empresas	1.800.000	1.600.000	3.400.000
Administración local	160.000	1.490.000	1.650.000
Entidades sen ánimo de lucro	40.000	434.800	474.800
Total	2.000.000	3.524.800	5.524.800

Segundo. A presente modificación, unha vez publicada no Diario Oficial de Galicia, non implicará a modificación do prazo establecido para presentar solicitudes.

Santiago de Compostela, 2 de agosto de 2024

Pablo Fernández Vila
Director do Instituto Enerxético de Galicia