Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Covelo da Comunidade de Montes Veciñais en Man Común de Covelo, no concello de Ponte Caldelas (expediente RE22044).

O 22.2.2024 o Servizo de Montes deste departamento territorial emite o seguinte informe:

Feitos:

Primeiro. O 26.9.2022 e número de rexistro de entrada 2022/2357343 a Comunidade de Montes Veciñais en Man Común (en diante, CMVMC) de Covelo, do lugar de Covelo e parroquia da Insua, concello de Ponte Caldelas, solicita a revisión total do esbozo do monte veciñal en man común (en diante, MVMC) Covelo (ID 3048). A dita solicitude deu lugar á apertura do expediente RE22044. Consta no expediente:

– Memoria descritiva e xustificativa da revisión de esbozo do monte veciñal en man común de Covelo (Ponte Caldelas), asinada o 22.12.2023 polo enxeñeiro forestal número 296 do COETF de Galicia.

– Certificado da secretaria coa conformidade do presidente da CMVMC de Covelo do 9.7.2022 da aprobación en asemblea xeral do 9.7.2022.

– Cartografía en formato dixital.

Proponse a revisión do esbozo do MVMC de Covelo:

– No linde coa CMVMC de Rebordelo: axústase ao expediente de deslinde DC22027 entre ambas as CMVMC. A CMVMC de Rebordelo deberá revisar o seu esbozo.

– No linde coa CMVMC de Pazos: segundo os esbozos non serían lindeiras pero a realidade é que parte do esbozo orixinal do MVMC de Covelo pertence á CMVMC de Pazos, que deberá revisar o seu esbozo. Xúntanse as fotografías dos marcos.

– O perímetro coas propiedades particulares está rodeado na súa totalidade mediante muros de cachotaría e foi levantado con GPS e apoiado en fotografías do catastro histórico, o voo americano de 1956, fotografías aéreas, cartografía catastral actualizada, os límites que se nomean na carpeta ficha e o límite dos concellos propostos polo IGN e límites parroquiais.

Segundo. O obxecto da revisión do esbozo é o perímetro coas propiedades particulares do MVMC de Covelo con Resolución do Xurado de MVMC de Pontevedra do 5.12.1980 e unha superficie inicial de 26 ha. Segundo os datos do Sistema rexistral forestal regulado no artigo 126 da Lei 7/2012, de montes de Galicia:

– Non consta contrato de xestión coa Consellería do Medio Rural.

– A CMVMC de Covelo non dispón de instrumento de xestión forestal.

– Non constan actos de disposición que modifiquen o MVMC.

– Non constan sentencias xudiciais ou deslindes previos.

Terceiro. A superficie e perímetro da revisión do esbozo proposto total é de 26,63 ha e 4,19 km e non se modifican os límites establecidos na resolución de clasificación do 5.12.1980.

Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Covelo (Ponte Caldelas), expediente RE22044, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.

Consideracións legais e técnicas:

Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.

Segunda. A revisión do esbozo total do MVMC Covelo proposta polo Servizo de Montes é a presentada pola CMVMC de Covelo e queda definida consonte os datos reflectidos no feito terceiro e a cartografía que consta no expediente.

Vista a proposta de revisión presentada polo Servizo de Montes sobre a adaptación do esbozo do monte veciñal denominado Covelo e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,

ACORDA:

Aprobar a revisión do esbozo total do monte veciñal denominado Covelo clasificado a prol da CMVMC de Covelo (Ponte Caldelas), segundo a proposta do Servizo de Montes e a planimetría elaborada por este.

Pontevedra, 5 de agosto de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra