Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Loureda da Comunidade de Montes Veciñais en Man Común de Bertola, no concello de Vilaboa (expediente RE22047).

O 30.4.2024, o Servizo de Montes deste departamento territorial emite o seguinte informe:

Feitos:

Primeiro. O 27.9.2022 e número de rexistro de entrada 2022/2369164, a Comunidade de Montes Veciñais en Man Común (en diante, CMVMC) de Bértola (Vilaboa) solicita a revisión do esbozo parcial do monte veciñal en man común (en diante, MVMC) Loureda (ID3216) e non se revisa a parcela Sabaxáns. A dita solicitude deu lugar á apertura do expediente RE22047. Consta no expediente:

– Mellora descritiva e xustificativa da revisión de esbozo do monte veciñal en man común Loureda, concello de Vilaboa, Pontevedra. Asinada o 15.3.2024 polo enxeñeiro técnico forestal núm. 296 do COETF de Galicia.

– Certificado do secretario coa conformidade do presidente da CMVMC de Bértola do 11.9.2022 da aprobación en Asemblea Xeral do 11.9.2022.

– Cartografía en formato dixital ETRS89 DATUM29 EPSG:25829.

A proposta recolle a revisión parcial do MVMC Loureda:

– Para a determinación dos límites do monte cos propietarios particulares estableceuse como guía principal a cartografía catastral.

– A proposta recolle os acorde de lindes coas comunidades veciñais: CMVMC de Canicouva (Pontevedra), CMVMC de Tomeza (Pontevedra) e CMVMC de Figueirido (Pontevedra).

Segundo. O obxecto da revisión do esbozo é o perímetro con particulares do MVMC Loureda con Resolución do Xurado de MVMC de Pontevedra do 18.12.1981 e unha superficie inicial de 82,00 ha. Segundo os datos do Sistema rexistral forestal regulado no artigo 126 da Lei 7/2012, de montes de Galicia:

– Non consta contrato de xestión coa Consellería do Medio Rural.

– A CMVMC de Bértola dispón dun documento de ordenación forestal inscrito no Rexistro de Montes Ordenados de Galicia co núm. 360241 e vixente ata 2029.

– Constan os seguintes expedientes de deslinde: CMVMC de Canicouva (DESC22085), CMVMC de Tomeza (DESC22086) e CMVMC de Figueirido (DESC22087).

Terceiro. A superficie e perímetro da revisión do esbozo proposto parcial do MVMC de Loureda é de 57,40 ha e 15,18 km (descontados os tramos de deslindamento) e segundo o indicado na memoria técnica non se modifican os lindes da Resolución de clasificación do Xurado de MVMC de Pontevedra do 5.12.1980 nin a parcela núm. 2 Sabaxáns.

Cuarto. O 30.11.2022, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Bértola (Vilaboa), expediente RE22047, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.

Consideracións legais e técnicas:

Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.

Segunda. A revisión parcial do esbozo do MVMC Loureda proposta polo Servizo de Montes é a presentada pola CMVMC de Bértola e queda definida consonte os datos reflectidos no feito terceiro e a memoria técnica indicada no feito primeiro.

Vista a proposta de revisión presentada polo Servizo de Montes sobre a adaptación do esbozo do monte veciñal denominado Loureda e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,

ACORDA:

Aprobar a revisión parcial do esbozo do monte veciñal denominado Loureda clasificado a prol da CMVMC de Bértola (Pontevedra), segundo a proposta do Servizo de Montes e a planimetría elaborada por este.

Pontevedra, 5 de agosto de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra