Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Gradín da Comunidade de Montes Veciñais en Man Común de Gradín, no concello de Ponte Caldelas (expediente RE22068).
O 2.5.2024, o Servizo de Montes deste departamento territorial emite o seguinte informe:
Feitos:
Primeiro. O 30.9.2022 e número de rexistro de entrada 2022/2414099 a Comunidade de Montes Veciñais en Man Común (en diante, CMVMC) de Gradín (Ponte Caldelas) solicita a revisión do esbozo parcial no perímetro cos propietarios particulares do Monte Veciñal en Man Común (en diante, MVMC) Gradín (ID3060). A dita solicitude deu lugar a apertura do expediente RE22068. Consta no expediente:
– Informe revisión do esbozo da CMVMC de Gradín, de setembro do 2022. Asinada pola enxeñeira técnica forestal núm. 954 do COETF de Galicia.
– Certificado do 22.2.2024 da secretaria da CMVMC de Gradín coa conformidade da presidenta da aprobación en asemblea xeral do 13.11.2022.
– Cartografía en formato dixital ETRS89 DATUM29 EPSG:25829.
A memoria técnica establece que:
– O plano da clasificación do monte veciñal de Gradín contén un erro importante, xa que inclúe toda a valgada de San Vicente, ocupando o que realmente é monte veciñal da CMVMC de Paradela.
– A proposta recolle os acordos de lindes coa CMVMC de Paradela e coa CMVMC de Cuñas.
– No linde coas propiedades particulares percorreuse todo o perímetro con particulares co GPS de precisión centimétrica. O parcelario de Catastro nesta zona está moi mal, especialmente nos dous enclavados existentes no monte: As Cavadas e os Cambeiros (non grafados no esbozo). Na fotografía aérea do voo americano do ano 1957 e na fotografía interministerial dos anos 80 aprécianse bastante ben os muros das propiedades particulares.
Segundo. O obxecto da revisión do esbozo é o perímetro parcial do MVMC de Gradín con Resolución do Xurado de MVMC de Pontevedra do 5 de decembro de 1980 e unha superficie inicial de 160,83 has. Proponse a modificación do perímetro cos propietarios particulares e a actualización dos lindeiros coa CMVMC de Paradela e CMVMC de Cuñas (ambas no concello de Ponte Caldelas).
Segundo os datos do Sistema rexistral forestal regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Gradín dispón dun documento de ordenación forestal inscrito no Rexistro de montes ordenados de Galicia co núm. 360028 e non vixente na actualidade.
– A proposta de esbozo respecta o linde aprobado polo Xurado de MVMC de Pontevedra segundo o Anuncio do 18 de decembro de 2020, do Xurado Provincial de Clasificación de Montes Veciñais en Man Común de Pontevedra, polo que se publica o acordo sobre o deslindamento parcial realizado entre as comunidades de montes veciñais en man común de Paradela e de Gradín, no concello de Ponte Caldelas (Pontevedra), ao respecto da estrema común dos seus montes (DOG núm. 7, do 13 de xaneiro de 2021).
– A proposta de esbozo respecta os deslindamentos coa CMVMC de Paradela (expediente DC22140) e CMVMC de Cuñas (expediente DC22141).
Terceiro. A superficie e perímetro da revisión do esbozo proposto total é de 78,04 ha e 3,33 km e segundo o indicado na memoria técnica non se modifican os límites establecidos na resolución.
O perímetro revisado obtense da cartografía dixital descontados os tramos de deslindamento coa CMVMC de Paradela e coa CMVMC de Cuñas.
Cuarto. O 2.10.2023, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Gradín (Ponte Caldelas), expediente RE22068, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas.
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
Segunda. A revisión do esbozo parcial do monte veciñal Gradín proposta polo Servizo de Montes é a presentada pola CMVMC de Gradín e queda definida consonte os datos reflectidos no feito terceiro e a memoria técnica indicada no feito primeiro.
Vista a proposta de revisión presentada polo Servizo de Montes sobre a adaptación do esbozo do monte veciñal denominado Gradín, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión do esbozo parcial do monte veciñal denominado Gradín clasificado a prol da CMVMC de Gradín (Ponte Caldelas), segundo a proposta do Servizo de Montes e a planimetría elaborada por este.
Pontevedra, 7 de agosto de 2024
Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra