Para os efectos previstos na Disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Roca da Comunidade de Montes Veciñais en Man Común de Roca, no concello de Ponte Caldelas (expediente RE22069).
O 2.5.2024 o Servizo de Montes deste departamento territorial emite o seguinte informe:
Feitos:
Primeiro. O 26.9.2022 e número de rexistro de entrada 2022/2354312 a Comunidade de Montes Veciñais en Man Común (en diante, CMVMC) de Roca (Ponte Caldelas) solicita a revisión do esbozo no perímetro cos propietarios particulares do Monte Veciñal en Man Común (en diante, MVMC) Roca (ID3053). A dita solicitude deu lugar a apertura do expediente RE22069. Consta no expediente:
– Memoria revisión esbozo CMVMC de Roca, de setembro de 2022. Asinada pola enxeñeira de montes núm. 2275 do Colexio de Madrid e modificada o 22.3.2024 co núm. rexistro de entrada 2024/1005237.
– Certificado da secretaria coa conformidade do presidente da CMVMC de Roca do 22.2.2024 da aprobación en Asemblea Xeral do 26.2.2022.
– Cartografía en formato dixital ETRS89 DATUM29 EPSG:25829.
A proposta recolle a revisión parcial do MVMC Roca:
– Realízase a revisión do esbozo no perímetro cos propietarios particulares con precisión do GPS centimétrico. Percorreuse todo o perímetro cos particulares, levantando os muros que as delimitan, antigos camiños veciñais, corredoiras e camiños reais. Sobre a capa resultante do perímetro elimináronse as estradas autonómicas e leitos de ríos. Utilizouse como apoio a fotografía aérea do voo americano do ano 1957.
– A proposta de revisión do esbozo recolle os deslindamentos administrativos consonte ao artigo 53 da Lei 7/2012, de montes de Galicia, de todas as comunidades veciñais coas que linda: CMVMC de Insua, CMVMC de Rebordelo e CMVMC de Barbudo.
– A proposta inicial incluía a parcela Pedra do Carballo de 7,48 has e a parcela da capela Virxe da Saúde de 0,47 has que foron excluídas por non ter a condición de monte veciñal.
Segundo. O obxecto da revisión do esbozo é o perímetro con particulares do MVMC de Roca con Resolución do Xurado de MVMC de Pontevedra do 5.12.1980 e unha superficie inicial de 115,00 has. Segundo os datos do Sistema Rexistral Forestal regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Roca dispón dun documento de ordenación forestal inscrito no Rexistro de montes ordenados de Galicia co núm. 360113 e vixente ata 2032.
– Constan os seguintes expedientes de deslindamento: CMVMC de Insua (DESC20003), CMVMC de Rebordelo (DESC22029) e CMVMC de Barbudo (DESC22139). A revisión proposta xa os recolle.
– O 21.2.2024 e núm. 2024/585494 no Rexistro electrónico da Xunta de Galicia a CMVMC de Roca solicita a clasificación do monte Carballo da Pedra, xa que logo, non ten a condición de monte veciñal.
Terceiro. A superficie e perímetro da revisión do esbozo proposto parcial é de 68,13 has e 2,09 km e segundo o indicado na memoria técnica non se modifican os lindes da resolución de clasificación do Xurado de MVMC de Pontevedra do 5.12.1980.
O perímetro revisado obtense da cartografía dixital recibida no Rexistro electrónico da Xunta de Galicia co núm. 2024/1178512 e descontados os tramos de deslindamento antes citados.
Cuarto. O 2.10.2023, o Xurado Provincial de MVMC de Pontevedra acorda solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Roca (Ponte Caldelas),expediente RE22069, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en adiante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
Segunda. A revisión parcial do esbozo do monte veciñal Roca proposta polo Servizo de Montes é a presentada pola CMVMC de Roca e queda definida consonte aos datos reflectidos no feito terceiro e a memoria técnica indicada no feito primeiro.
Vista a proposta de revisión presentada polo Servizo de Montes sobre a adaptación do esbozo do monte veciñal denominado Roca e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado por unanimidade dos seus membros,
ACORDA:
Aprobar a revisión parcial do esbozo do monte veciñal denominado Roca clasificado a prol da CMVMC de Roca (Ponte Caldelas), segundo a proposta do Servizo de Montes e a planimetría elaborada polo mesmo.
Pontevedra, 7 de agosto de 2024
Antonio Crespo Iglesias
Presidente do Xurado Provincial
de Clasificación de Montes Veciñais
en Man Común de Pontevedra