O programa de incentivos para a implantación de instalacións de enerxías renovables térmicas nos diferentes sectores da economía, no marco do Plan de recuperación, transformación e resiliencia europeo, está regulado polo Real decreto 1124/2021, do 21 de decembro, e foi convocado en Galicia pola Resolución do Inega do 21 de marzo de 2022, publicada no DOG núm. 63, do 31 de marzo.

A Resolución do Inega do 21 de marzo de 2022 pola que se convoca o programa de incentivos para a implantación de instalacións de enerxías renovables térmicas foi modificada pola Resolución do 8 de agosto de 2022 (DOG núm. 158, do 22 de agosto); pola Resolución do 5 de xuño de 2023 (DOG núm. 111, do 13 de xuño); pola Resolución do 28 de decembro de 2023 (DOG núm. 246, do 29 de decembro) e pola Resolución do 27 de febreiro de 2024 (DOG núm. 48, do 7 de marzo).

Co obxectivo de adecuar o orzamento á demanda promoveuse unha redistribución de 2.600.000,00 € do orzamento ampliado pola Resolución do 22 de decembro de 2022, da presidenta do IDAE, pola que se amplía para Galicia o orzamento do Real decreto 1124/2021 sobre o orzamento orixinario asignado ao Programa de incentivos 1: Programa de incentivos para a implantación de instalacións de enerxías renovables térmicas en diferentes sectores da economía, ao Programa de incentivos 2: Programa de incentivos para a implantación de instalación de enerxías renovables térmicas en edificios non residenciais, establecementos e infraestruturas do sector público.

En canto á posibilidade de redistribuír o orzamento, o artigo 8.3 in fine do Real decreto 1124/2021, do 21 de decembro, sinala: «nos dous meses posterior ao peche das convocatorias dos programas 1 e 2 permitirase compensar o saldo dos fondos existente entre os programas co obxecto de comprometer o maior número de solicitudes existentes».

De acordo con isto, a Xunta de Galicia notificou con carácter previo a redistribución ao IDAE, organismo responsable da coordinación e seguimento conforme o artigo 13 do citado real decreto.

O artigo 4.2 da convocatoria prevé a posibilidade de redistribuír o crédito pasados tres meses desde a apertura do prazo de presentación de solicitudes para adaptarse á evolución da axuda solicitada en cada unha das epígrafes.

O artigo 31 do Decreto 11/2009 establece que, cando a contía total máxima das subvencións convocadas se distribúa entre distintos créditos orzamentarios, a alteración da dita distribución non precisará de nova convocatoria, pero si das modificacións que procedan no expediente de gasto e da publicación nos mesmos medios que a convocatoria.

Por todo o anterior, sobre a base dos requisitos e das condicións previstas na normativa anteriormente citada,

RESOLVO:

Primeiro. Minorar e redistribuír os fondos destinados á implantación de instalacións de enerxías renovables térmicas nos diferentes sectores da economía, modificando os números 1 e 2 do artigo 4 da Resolución do 21 de marzo de 2022, que quedan redactados do seguinte xeito:

«1. As subvencións previstas nesta convocatoria con cargo aos orzamentos do Inega e coa repartición plurianual recollida na seguinte táboa financiaranse con fondos europeos procedentes do Mecanismo de recuperación e resiliencia. O importe total asignado a esta convocatoria ascende a 9.690.541,20 €, coa seguinte distribución orzamentaria por anualidades:

Importe 2022 (€)	Importe 2023 (€)	Importe 2024 (€)	Importe 2025 (€)	Total (€)
290.436,39	4.400.801,47	4.235.258,83	764.044,51	9.690.541,20

O orzamento por partida e anualidade redistribuirase tendo en conta as solicitudes rexistradas conforme o establecido no artigo 31 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, entre as seguintes partidas: 09.A3.733A.714.2, 09.A3.733A.760.5, 09.A3.733A.760.9, 09.A3.733A.770.5, 09.A3.733A.770.6, 09.A3.733A.781.1 e 09.A3.733A.781.6.

2. O crédito máximo segundo a tipoloxía de proxecto será o seguinte:

Tecnoloxía renovable	Orzamento anterior	Orzamento final
Biomasa	8.250.000,00 €	5.100.000,00 €
Xeotermia e hidrotermia	2.400.000,00 €	2.750.000,00 €
Aerotermia	1.540.000,00 €	1.740.000,00 €
Solar térmica	100.541,20 €	100.541,20 €
Total	12.290.541,20 €	9.690.541,20 €

Os orzamentos por tecnoloxía renovable poderán ser redistribuídos pasados tres meses desde a apertura do prazo de solicitudes para adaptarse á evolución da axuda solicitada en cada unha das epígrafes».

Segundo. Esta modificación, unha vez publicada no Diario Oficial de Galicia, non implicará a modificación do prazo establecido para presentar solicitudes.

Terceiro. Esta modificación entrará en vigor o día da súa publicación no Diario Oficial de Galicia.

Santiago de Compostela, 20 de setembro de 2024

Pablo Fernández Vila
Director da Axencia Instituto Enerxético de Galicia