Procedemento: aprobación de polígonos agroforestais de iniciativa pública.
Expediente: PA-21-01.
Antecedentes:
1. O 15 de novembro de 2021, acordouse o inicio do procedemento de aprobación para o desenvolvemento do polígono agroforestal de iniciativa pública de Oímbra (DOG núm. 247, do 27 de decembro).
2. O 8 de febreiro de 2022, aprobáronse o estudo de viabilidade co perímetro do polígono, o catálogo parcial de usos, os prezos, as superficies mínimas e a vida útil do polígono agroforestal de iniciativa pública de Oímbra (Oímbra-Ourense).
3. Polo Decreto 33/2022, do 3 de marzo, declarouse de utilidade pública e interese social o polígono agroforestal de iniciativa pública de Oímbra (Oímbra-Ourense) (DOG núm. 55, do 21 de marzo).
4. O 3 de maio de 2022, acordouse iniciar o procedemento para a redacción do proxecto básico e dos pregos de condicións polos cales se rexería o procedemento de concorrencia do polígono agroforestal de iniciativa pública de Oímbra (Oímbra-Ourense).
5. O 3 de xuño de 2022, acordouse o inicio do procedemento para a revisión do parcelario e estado das parcelas e trámites previos da investigación da titularidade das parcelas do polígono agroforestal de iniciativa pública de Oímbra (Oímbra-Ourense), polo que debían realizarse as actuacións e os trámites dos artigos 89 e 90 da Lei 11/2021, do 14 de maio, de recuperación da terra agraria de Galicia. O plano parcelario e o resto de documentación foron expostos ao público, tanto no Concello de Oímbra como na páxina web da Axencia Galega de Desenvolvemento Rural (a Axencia), durante o prazo de vinte (20) días hábiles.
6. O 2 de xuño de 2023, asinouse a resolución de revisión do parcelario e estado das parcelas e trámites previos da investigación da titularidade das parcelas, que lles foi notificada ás persoas interesadas, xunto coa comunicación dos prezos de transmisión ou arrendamentos mínimos, orientación de produción establecida e o compromiso de adhesión.
7. O 22 de xuño de 2023, acordouse someter a exposición pública as actuacións do polígono agroforestal de iniciativa pública de Oímbra (Oímbra-Ourense) (DOG núm. 127, do 5 de xullo).
8. Rexistrouse a presentación dos compromisos de adhesión ao proxecto nunha porcentaxe total do 93,96 % da superficie das terras incluídas no perímetro do polígono agroforestal.
9. O 10 de novembro de 2023, acordouse o inicio do procedemento de investigación da titularidade de catro inmobles carentes de posuidor, con base no artigo 19 da Lei 11/2021, do 14 de maio, de recuperación da terra agraria de Galicia, e a integración transitoria destas parcelas ao Banco de Terras, así como a súa entrega para a xestión provisional pola Axencia (DOG núm. 224, do 24 de novembro).
10. O 2 de xullo de 2024, a presidenta da Axencia Galega de Desenvolvemento Rural aprobou a proposta de reestruturación da propiedade do polígono agroforestal de Oímbra (Oímbra-Ourense).
11. O 3 de xullo de 2024, aprobouse a proposta de resolución de aprobación do proxecto básico do polígono agroforestal de iniciativa pública de Oímbra (Oímbra-Ourense) (DOG núm. 138, do 17 de xullo, taboleiro de edictos do Concello de Oímbra do 24 de xullo de 2024 por máis de vinte (20) días hábiles, páxina web da Axencia do 17 de xullo de 2024). Abriuse un prazo de audiencia de quince (15) días hábiles para que as persoas interesadas formulasen alegacións e foilles notificada ás persoas interesadas. Non se presentaron alegacións.
12. Mediante a Resolución do 15 de outubro de 2024, da presidenta da Axencia, aprobouse o proxecto básico do polígono agroforestal de iniciativa pública de Oímbra.
13. O 16 de outubro de 2024, a directora xeral da Axencia asinou a proposta de resolución de aprobación do polígono agroforestal de iniciativa pública de Oímbra (Oímbra-Ourense).
Consideracións legais e técnicas:
1. Este procedemento réxese polo disposto na Lei 11/2021, do 14 de maio, de recuperación da terra agraria de Galicia (DOG núm. 94, do 21 de maio); o acordo da Comisión Bilateral de Cooperación Administración Xeral do Estado-Comunidade Autónoma de Galicia, en relación coa Lei 11/2021, do 14 de maio, de recuperación da terra agraria de Galicia, publicado pola Resolución do 1 de febreiro de 2022, da Dirección Xeral de Relacións Institucionais e Parlamentarias (DOG núm. 36, do 22 de febreiro); a Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro); a Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común (DOG núm. 135, do 12 de xullo); a Lei 40/2015, do 1 de outubro, de réxime xurídico do sector público (BOE núm. 236, do 2 de outubro); a Lei 16/2010, do 17 de decembro, de organización e funcionamento da Administración xeral e do sector público autonómico de Galicia (DOG núm. 251, do 31 de decembro), e demais disposicións normativas de aplicación.
2. De conformidade cos artigos 95 e 96 da Lei 11/2021, do 14 de maio, de recuperación da terra agraria de Galicia, os pregos de condicións e criterios de avaliación que aprobe a Presidencia da Axencia son os sometidos a informe da Asesoría Xurídica da Consellería do Medio Rural con data do 1 de xullo de 2024.
3. O artigo 96 da Lei 11/2021, do 14 de maio, de recuperación da terra agraria de Galicia, dispón que «1. A resolución de aprobación do polígono agroforestal por parte da persoa que exerza a Presidencia da Axencia Galega de Desenvolvemento Rural comportará a aprobación dos pregos de condicións da concorrencia competitiva e a constitución formal do polígono agroforestal. 2. Na resolución expresaranse o réxime xurídico aplicable e as potestades que, de acordo co disposto nesta lei, lle corresponden á Axencia Galega de Desenvolvemento Rural no marco do servizo público prestado polo Banco de Terras de Galicia e as súas finalidades públicas de recuperación das terras abandonadas. 3. A resolución de aprobación, que pon fin á vía administrativa, notificaráselles aos interesados no procedemento e publicarase no Diario Oficial de Galicia».
4. No expediente instruído cumpríronse os requisitos e trámites do procedemento establecidos nos artigos 67 a 72 e 83 a 101 da Lei 11/2021, do 14 de maio, de recuperación da terra agraria de Galicia.
5. Instrución e motivación.
De conformidade co disposto no artigo 75 e seguintes da Lei 39/2015, do 1 de outubro, do procedemento administrativo común das administracións públicas, a competencia para a instrución do procedemento e a realización dos actos inherentes a ela, necesarios para a determinación, coñecemento e comprobación dos feitos en virtude dos cales se deba pronunciar a resolución, correspóndelle a Subdirección de Mobilidade de Terras.
6. Competencia.
O órgano competente para resolver sobre a aprobación do polígono agroforestal é a Presidencia da Axencia Galega de Desenvolvemento Rural, de conformidade co artigo 96.1 da Lei 11/2021, do 14 de maio, de recuperación da terra agraria de Galicia.
Por todo o exposto,
RESOLVO:
Primeiro. Aprobar o polígono agroforestal de iniciativa pública de Oímbra, no concello de Oímbra (Ourense), que comporta a aprobación dos pregos de condicións da concorrencia competitiva e a constitución formal do polígono agroforestal.
Segundo. Publicar a resolución no Diario Oficial de Galicia e notificárllela ás persoas interesadas no procedemento, en cumprimento do disposto no artigo 96.3 da Lei 11/2021, do 14 de maio, de recuperación da terra agraria de Galicia.
Contra esta resolución, que pon fin á vía administrativa, poderase interpoñer potestativamente recurso de reposición, ante a Presidencia da Axencia Galega de Desenvolvemento Rural, no prazo dun mes, ou directamente recurso contencioso-administrativo, ante o Xulgado do Contencioso-Administrativo de Santiago de Compostela, no prazo de dous meses, de conformidade cos artigos 123 e 124 da Lei 39/2015, do 1 de outubro, do procedemento administrativo común das administracións públicas, e 6 e seguintes e 46 da Lei 29/1998, do 13 de xullo, reguladora da xurisdición contencioso-administrativa; en ambos os dous casos, o prazo contarase desde o día seguinte ao da súa notificación. Non obstante, poderase interpoñer calquera outro recurso que se considere procedente.
Notificarlles ás persoas interesadas o contido da resolución, en cumprimento do disposto no artigo 40.1 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 17 de outubro de 2024
María José Gómez Rodríguez
Presidenta da Axencia Galega de Desenvolvemento Rural